ފީފާ ވޯލްޑް ކަޕްގައި ސްވިޒަލެންޑް އޮތީ ފުޓުބޯޅަ ކުޅެން ކަަމަށާއި، ބޭކާރު އެހެން ވާހަކަ ދައްކަން ނޫން ކަމަށް އެ ޓީމުގެ ކޯޗު މުރާދް ޔަކީން ބުނެފިއެވެ.

އޭނާ މިހެން ބުނީ މުބާރާތުގެ ގްރޫޕް ސްްޓޭޖުގެ ފަހު މެޗުގައި ސާބިއާއާ ދެކޮޅަށް ނުކުތުމުގެ ކުރިން އޮތް ޕްރެސްގައި ވާހަކަ ދައްކަމުންނެވެ. އޭނާ މިހެން ބުނެފައިވާއިރު ސްވިޒަލެންޑަކީ މުބާރާތުގައި އެއް ޖިންސުން ގުޅުން ހިންގުން ރަމްޒުކޮށްދޭ ކެޕްޓަން ބޭންޑު އެޅުމަށް ނިންމި ހަތް ޤައުމުގެ ތެރޭގައި ހިމެނޭ ޤައުމެކެވެ. ނަމަވެސް މުބާރާތް ބާއްވާ ޤައުމު ޤަތަރާއި، ފީފާގެ ޕްރެޝަރުތަކާއި އިންޒާރުތަކުގެ ސަބަބުން އެމީހުން ވަނީ އެ ބޭންޑު ނާޅަން ނިންމާފައެވެ. ނަމަވެސް މުބާރާތުގެ ކުރީކޮޅު އޭނާ ވަނީ އެކަމާ ހިތްހަމަނުޖެހޭ ފަދަ މޭރުމަކުން ވާހަކަ ދައްކާފައެވެ.

ޔަކީން ބުނީ މިއަހަރުގެ އޭޕްރިލް މަހުން ފެށިގެން އެ ޤައުމުގެ ފުޓުބޯޅަ ފެޑަރޭޝަންގެ ރައީސް، ޖެނަރަލް ސެކްރެޓަރީއާއެކު އެއްބަސްވުމަކަށް އާދެވިފައިވާ ކަމަށެވެ. އެއީ މުބާރާތް ކުރިއަށްދާއިރު ދައްކާނީ ހަމައެކަނި ކުޅިވަރު ނުވަތަ ފުޓުބޯޅައިގެ ވާހަކަ ކަމަށް އޭނާ ބުންޏެވެ. އޭނާ ބުނީ އެކަން އޭނާ އާއި ކުޅުންތެރިންގެ މައްޗަށް ވެސް އޮންނާނެ ކަމަށެވެ. އަދި އޭނާ ކުޅުންތެރިންނަށް އިހުތިރާމް ކުރާ ކަމަށާއި، ކުޅުންތެރިންނަކީ އަދަބުވެރި ބައެއް ކަމަށެވެ. ޔަކީން ބުނީ ސާބިއާ މެޗަކީ ހަމައެކަނި ފުޓުބޯޅަ އަށް ވިސްނަން ޖެހޭ މެޗެއް ކަމަށެވެ. އެގޮތުން ދަނޑުމަތީގައި ކުޅުންތެރިން މަސައްކަތް ކުރަން ޖެހޭނީ ކުޅިވަރު މީހުންގެ ގޮތުގައި ކަމަށެވެ. ޔަކީން ބުނީ އެހެން ކަންކަމާ ނުބެހެވޭނެ ކަމަށާއި، އެއީ އެމީހުންގެ އަތްމަތީގައި އޮތް ކަމެއް ވެސް ނޫން ކަމަށެވެ.

ޕްރެސްގައި ވާހަކަ ދައްކަމުން އެ ޓީމުގެ ޑިފެންޑަރު މެނުއަލް އަކަންޖީ ބުނީ ވިސްނުން ހުރީ ގަދަ 16 އަށް ނޫން ކަމަށާއި، ވިސްނުން ހުރީ ސާބިއާ މެޗަށް ކަމަށެވެ. އޭނާ ބުނީ އެ މެޗު ކާމިޔާބުކުރެވޭނެ ކަަމަށާއި، އެއަށްފަހު ކުރިއަށް އޮތް ބުރަށް ސްވިޒަލެންޑަށް ދެވޭނެ ކަމަށެވެ. އަދި ފުރަތަމަ ކަމަކީ އެ މެޗު ކާމިޔާބުކުރުން ކަމަށާއި، އެއަށްފަހު ދެން އޮތް ބުރުގައި ވާދަކުރަން ޖެހޭ ޓީމެއް އެނގޭނެ ކަމަށެވެ.

ސްވިޒަލެންޑް އަދި ސާބިއާ ކުޅޭ މެޗު ފަށާނީ ހުކުރު ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.