އާރަށުގެ ހިޔާނާތް: ދިފާއުން ވަނީ މައްސަލަ ސާބިތުކުރެވޭ ވަރަށް ދައުލަތަށް ހެކި ހުށަނޭޅޭ ކަމަށް ވިދާޅުވެފައި
30 ނޮވެމްބަރު 2022 | ބުދަ 13:52މި މައްސަލައިގެ ހުލާސާ ބަޔާން ނެގުން ވަނީ ބުދަ ދުވަހު ނިންމާލާފަ
ރައީސް ޔާމީނުގެ މައްޗަށް އުފުލާފައިވާ ދައުވާތަކުގެ އަޑުއެހުންތައް ކްރިމިނަލް ކޯޓުގައި ކުރިއަށްދޭ
ވ.އާރަށް ކުއްޔަށް ދިނުމުގައި ހިޔާނާތްތެރިވެފައިވާ ކަމަށް ބުނާ މައްސަލައިގައި، ކުރީގެ ރައީސް އަބްދުﷲ ޔާމީންގެ މައްޗަށް މައްސަލަ ސާބިތުކުރެވޭ ވަރަށް ދަތުލަތަށް ހެކި ހުށަހެޅިފައި ނުވާ ކަމަށް ދިފާއީ ވަކީލުން ވިދާޅުވެއްޖެއެވެ.
ބުދަ ދުވަހު އޮތީ ކުރީގެ ރައީސް އަބްދު ﷲ ޔާމީންގެ މައްޗަށް އުފުލާފައިވާ މަނީ ލޯންޑްރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާގެ އިތުރުން ރައްޔިތުންގެ މަޖިލީހުގެ ކުރީގެ މެމްބަރު ޔޫސުފް ނައީމްގެ މައްޗަށް އުފުލާފައިވާ ރިޝްވަތު ދިނުމުގެ ދައުވާގެ ހުލާސާ ބަޔާން އިއްވުމުވެ. ހުލާސާ ބަޔާން އިއްވަމުން ރައީސް ޔާމީންގެ ވަކީލުން ވަނީ މި މައްސަލައިގައި ރައީސް ޔާމީން ނުފޫޒު ފޯރުވާފައިވާކަމަށް ދައުލަތުން ބުނި ނަމަވެސް އެކަން ސާބިތުކޮށްދޭ ފަދަ ހެއްކެއް ދައުލަތުން ހުށަހަޅާފައި ނުވާ ކަމަށް ވިދާޅުވެފައެވެ. އަދި ދައުލަތުން ދައްކާ ވާހަކަތަކަކީ ހިޔާލީ ވާހަކަތަކެއް ކަމަށް ވެސް ދިފާއީ ވަކީލުން ސިފަކުރެއްވިއެވެ. އަދި މި މައްސަލައިގައި ރައީސް ޔާމީން އާއި ދެކޮޅަށް ހެކިބަސް ދެއްވާފައިވާ ކުރީގެ ނައިބު ރައީސް އަހުމަދު އަދީބާއި އެމްއެމްޕީއާރުސީގެ ރައީސް އަބްދުالله ޒިޔަތު ހިމެނޭތީ އެއީ އެމްއެމްޕީއާރުސީގެ މައްސަލައިގައި ހުކުމްކޮށްފައިވާ ބަޔަކަށް ވުމުން އެ މީހުންގެ ހެކިބަސް ބަލައި ނުގަނެވޭނެ ކަމަށް ވެސް ދިފާއުން ފާހަގަކުރިއެވެ. އަދި އަދީބަކީ ރައީސް ޔާމީން އާއި އަދާވާތްތެރި ފަރާތެއް ކަަމަށް ބުނާ ބުނުން ދިފާއުން ވަނީ ހުލާސާ ބަޔާން އިއްވަމުން ވެސް ތަކުރާރުކުރައްވާފައެވެ.
މި މައްސަލައިގައި ޔޫސުފް ނައީމްގެ ފަރާތުން ވެސް ވަނީ ހުށަހަޅާފައިވާ ދައުވާ ސާބިތު ކުރުމަށް ބޭނުން ކުރެވިދާނެ ހެކިތަކެއް ދައުލަތަށް ހުށަހެޅިފައި ނުވާ ކަމަށް ވިދާޅުވެފައެވެ. އަދި މައްސަލަ އާއި ގުޅޭ ހެކި އެކަށީގެންވާ ވަރަށް ދައުލަތަށް ހުށަނޭޅޭ ކަމަށް ވެސް ދިފާއީ ވަކީލުން ވިދާޅުވިއެވެ. އަދި ޔޫސުފް ނައީމް، ޔާމީންގެ އެކައުންޓަށް އެއްމިލިއަން ޑޮލަރު ޖަމާކުރި ކަން ސާބިތުކޮށް ނުދެވޭ ކަމަށް ވެސް ވަކީލު ވިދާޅުވިއެވެ. މި މައްސަލައިގެ ހުލާސާ ބަޔާން ނެގުން ވަނީ ބުދަ ދުވަހު ނިންމާލާފައެވެ.
