ވ. އާރަށުގެ ޚިޔާނާތުގެ މައްސަލަ: ދައުލަތުން އެދުނީ ޔާމީން އިންވެސްޓުކުރެއްވި 3.4 މިލިއަނާއި އޭގެ ފައިދާ ނަގައިދޭން
ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްސަލައިގެ އަޑުއެހުމުގައި ދައުލަތުން އެފަދައިން އެދުނީ ހުލާސާ ބަޔާން އިއްވަމުން
ޔާމީން އަބްދުލްޤައްޔޫމް
ކުރީގެ ރައީސް އަބްދުﷲ ޔާމީން މޯލްޑިވްސް އިސްލާމިކް ބޭންކުގައި އިންވެސްޓުކޮށްފައި ހުރި 3.4 މިލިއަން ޑޮލަރާއި އިންވެސްޓުކޮށްގެން ލިބިފައިވާ ފައިދާ ނަގައިދޭން ކްރިމިނަލް ކޯޓުގައި ދައުލަތުން އެދިއްޖެއެވެ.
ބުދަ ދުވަހު ވ. އާރަށުގެ ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނާއި ޔޫސުފް ނައީމްގެ މައްސަލައިގެ އަޑުއެހުމުގައި ދައުލަތުން އެފަދައިން އެދުނީ ހުލާސާ ބަޔާން އިއްވަމުންނެވެ. ދައުލަތުން ހުލާސާ ބަޔާން ހުށަހަޅަމުން ބުނީ މި މައްސަލައިގައި ހުށަހަަޅާފައިވާ ހެކިތަކުން މައްސަލަ ސާބިތުވާ ކަމަށެވެ. އެގޮތުން ދައުލަތުން ހުށަހަޅާފައިވާ ހެކިތަކުން ރައީސް ޔާމީންގެ އެ ކައުންޓުގައި ހުރި ފައިސާ އަކީ ޔޫސުފް ނައީމް ރިޝްވަތުގެ ގޮތުގައި ދިން ފައިސާ ކަމާއި، ޔާމީން އެ ރިޝްވަތުގައި ހިފިކަން އެނގޭ ކަަމަށް ދައުލަތުން ވަނީ ބުނެފައެވެ. އަދި އެ ފައިސާގެ އަސްލު އޮޅުވާލުމުގެ ގޮތުން އިންވެސްޓުކޮށްފައިވާ ކަން އެ ހެކިތަކުން އެނގޭ ކަމަށް ވެސް ދައުލަތުން ވަނީ ބުނެފައެވެ.
އެހެންކަމުން ވ.އާރަށް ކުއްޔަން ދީގެން ރައީސް ޔާމީން އަށް ލިބިފައިވާ ކަމަށް ތުހުމަތުކުރާ 1 މިލިއަން ޑޮލަރާއި އިންވެސްޓުކުރަން އެއާ އެއްކުރި 2.4 މިލިއަން ޑޮލަރު ހިމަނައިގެން، 3.4 މިލިއަން ޑޮލަރު (53 މިލިއަން ރުފިޔާ) ނަގައިދޭން ދައުލަތުން ވަނީ އެދިފައެވެ.
ދައުލަތުގެ އެ ތުހުމަތުތައް ރައީސް ޔާމީންގެ ފަރާތުން ވަނީ ދޮގުކޮށްފައެެވެ. އެއީ ސައްހަ ޑޮލަރުގެ މުއާމަލާތެއް ކަމަށާއި ފައިސާ ބަދަލުކުރެވުނީ ޑޮލަރު މާރުކުރުމުގެ ގޮތުން ކަމަށް އެމަނިކުފާނު ވަނީ ޝަރީއަތުގައި ވިދާޅުވެފައެވެ. ނަމަވެސް އެކަން ސާބިތުކޮށްދޭނެ ހެއްކެއް ރައީސް ޔާމީން ހުށަހަޅުއްވާފައި ނުވާ ކަމަށާއި އާރަށް ދިނުމާ ގުޅޭ ކަންކަން ހިނގައިދިޔަ ތާރީހުތަކާއި ފައިސާއާ ގުޅޭ މުއާމަލާތްތައް ހިނގާފައިވާ ތާރީހުތަކަކީ އިއްތިފާގެއް ކަމަށް ނުބެލެވޭ ކަމަށް ދައުލަތުން ވަނީ ބުނެފައެވެ.
ކްރިމިނަލް ކޯޓުގެ އިސް ގާޒީ އަހުމަދު ޝަކީލް ވަނީ ދެން އޮންނާނީ މި މައްސަލައިގެ ހުކުމް ކުރުން ކަމަށް ވިދާޅުވެފައެވެ. ރައީސް ޔާމީންގެ, ހިނގައިދިޔަ އެމްއެމްޕީއާރުސީ ބޮޑު ޚިޔާނާތުގެ ތެރޭގައި ހިމެނޭ އާރަށުގެ މައްސަލައާ ގުޅިގެން މަނީ ލޯންޑަރިންގގެ ދައުވާއާއި ރިޝްވަތު ގަބޫލުކުރުމުގެ ދައުވާ ރައީސް ޔާމީންގެ މައްޗަށް ވަނީ އުފުލާފައެވެ. އަދި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމަށް ރިޝްވަތު ހިފުމުގެ ދައުވާ ވަނީ އުފުލާފައެވެ.
