ސަންޓޯސްގެ އުއްމީދަކީ ހަތަރު އަހަރު ކުރީގެ ނަތީޖާ ބަދަލުކުރުން

ފީފާ ވޯލްޑް ކަޕް ގްރޫޕް ސްޓޭޖުގެ ދެ ވަނަ މެޗުގައި އުރުގުއޭއާ ދެކޮޅަށް ނުކުންނައިރު، އުއްމީދަކީ ހަތަރު އަހަރު ކުރީގެ ނަތީޖާ ބަދަލުކުރުން ކަމަށް ޕޯޗުގަލްގެ ކޯޗު ފެނާންޑޯ ސަންޓޯސް ބުނެފިއެވެ.

މިއަހަރުގެ މުބާރާތުގެ ގްރޫޕް ސްޓޭޖުގައި މި ދެ ޓީމު ބައްދަލުކުރާ އިރު، އެންމެ ފަހުން ރަޝިޔާގައި ބޭއްވި ވޯލްޑް ކަޕްގެ ގަދަ 16 ގައި ވެސް މި ދެ ޓީމު ވަނީ ބައްދަލުކޮށްފައެވެ. އެފަހަރުގެ މުބާރާތުން ޕޯޗުގަލް ކެޓީ އެ ބުރުގެ މެޗުގައި އުރުގުއޭ އަތުން 2-1 އިން ބަލިވުމުންނެވެ.

އުރުގުއޭ މެޗުގެ ކުރިން ވާހަކަ ދައްކަމުން ޕޯޗުގަލްގެ ކޯޗު ސަންޓޯސް ބުނީ ޓީމުގެ ޑިފެންޑަރު ޑެނީލޯ ޕެރެއިރާ އަށް ކައުންޓު ކުރެވޭނެ ކަމަށް އުއްމީދު ކުރާ ކަމަށެވެ. ސަންޓޯސް ބުނީ ޕެރެއިރާ އަށް އަނިޔާވި ނަމަވެސް އޭނާގެ މަގާމަށް ކުޅޭނެ އިތުރު ތިން ކުޅުންތެރިން ޓީމުގައި ތިބި ކަމަށެވެ. އޭނާ ބުނީ ކުރީގެ މުބާރާތްތައް ކުޅުނީ 23 ކުޅުންތެރިންނާއެކު ކަމަށާއި، ނަމަވެސް މިހާރު 26 ކުޅުންތެރިން ތިބި ކަމަށެވެ. އެހެންކަމުން ބޮޑު "ޑްރާމާ" އެއް ކުޅެން ބޭނުންނުވާ ކަމަށެވެ.

ސަންޓޯސް ބުނީ އުރުގުއޭ ޓީމުގެ އެޑިސަން ކަވާނީ އާއި ލުއިސް ސުއަރޭޒް މީގެ ފަސް އަހަރު ކުރިން ވެސް ތިބި ކަމަށާއި، އެ ދެ ކުޅުންތެރިންނަކީ ވަރަށް މޮޅަށް ކުޅޭ ދެ ކުޅުންތެރިން ކަމަށެވެ. އަދި ރަޝިޔާގައި ކުޅުނު އިރު ވެސް އުރުގުއޭގައި އޮތީ ވަރުގަދަ ޓީމެއް ކަމަށާއި، މިހާރު ވެސް އެ ޓީމު ވަރުގަދަ ކަމަށެވެ. އޭނާ ބުނީ ކުރީގައި ނުހިމެނޭ ހުނަރުވެރި އެހެން ކުޅުންތެރިން ވެސް އެ ޓީމުގައި ތިބި ކަމަށެވެ.

މި ޕްރެސްގައި ސަންޓޯސް އާއެކު ބައިވެރިވެ ވާހަކަ ދައްކަމުން ޕޯޗުގަލްގެ މިޑްފީލްޑަރު ބެނާޑޯ ސިލްވާ ބުނީ އުރުގުއޭ ޓީމަކީ ވަރަށް ވަރުގަދަ ޓީމެއް ކަމަށެވެ. އޭނާ ބުނީ އުރުގުއޭ ޓީމަކީ ކައުންޓަ އެޓޭކުގައި ވަރަށް ނުރައްކާ ކުރާ ޓީމެއް ކަމަށެވެ. ސިލްވާ ބުނީ އެ މީހުންނަށް ވީ އެންމެ ރަނގަޅަކަށް އުރުގުއޭ ޓީމު ދަސްކުރާނެ ކަމަށާއި، އެއަށްފަހު މެޗުގައި މޮޅު ކުޅުމެއް ދައްކާނެ ކަމަށެވެ. އަދި މެޗުން ބޭނުންވަނީ ތިން ޕޮއިންޓު ހޯދައިގެން ގަދަ 16 ވަނަ ބުރަށް ދަތުރުކުރުން ކަމަށެވެ.

މުބާރާތުގައި އުރުގުއޭ އަދި ޕޯޗުގަލް ބައްދަލު ކުރާ މެޗު ފަށާނީ ހޯމަ ދުވަހުގެ ރޭ ރާއްޖެ ގަޑިން 12 ޖަހާއިރުއެވެ.