ޒިޔަދަމްގެ މަރަށް 7 އަހަރު: ޙުކުމް ކުރުން ޑިސެމްބަރު 18 ގައި
އެކި ފަހަރުމަތިން މި މައްސަލަ ބައްލަވަމުން ގެންދެވި ގާޒީން ބަދަލުވެފައިވޭ
މި މައްސަލާގައި ދައުލަތުން ދައުވާ އުފުލާފައިވަނީ މުހައްމަދު ޝަނޫނާއި، އަލީ ސިފާމްގެ މައްޗަށް
ލ. މުންޑޫ، ނޫވިލު، އަލީ ޒިޔަދަމް މަރާލި މައްސަލައިގައި އަންނަ ޑިސެމްބަރު މަހު ޙުކުމް ކުރައްވާނެކަމަށް މައްސަލަ ބައްލަވާ ގާޒީ ވިދާޅުވެއްޖެއެވެ.
އެކި ފަހަރުމަތިން މި މައްސަލަ ބައްލަވަމުން ގެންދެވި ގާޒީން ބަދަލުވެފައިވާއިރު، މީގެ ކުރިން މި މައްސަލައިގެ އަޑުއެހުމެއް ނުބޭއްވި 2 އަހަރެއްހާ ދުވަސްވެސް ވެފައި އެބަހުއްޓެވެ. އެގޮތުން 2015 ވަނަ އަހަރުގެ ތެރޭގައި އަޑުއެހުމެއް ބޭއްވުމަށްފަހު 2017 ވަނަ އަހަރާއި ހަމައަށްވެސް އަޑުއެހުމެއް ނުބާއްވައި ވޭތުވެ ގޮސްފައިވެއެވެ.
ކްރިމިނަލް ކޯޓުގައި މިހާރު މި މައްސަލަ ބައްލަވަމުން ގެންދަވަނީ ގާޒީ އިސްމާއިލް ޝަފީއުއެވެ. މި މައްސަލައަކީ ގާޒީ ބައްލަވަމުން ގެންދަވާ މައްސަލަތަކުގެ ތެރެއިން އެންމެ ގިނަ ދުވަސްވީ އެއް މައްސަލަކަން މީގެ ކުރިން ބޭއްވި އަޑުއެހުމެއްގައި ގާޒީ ޝަފީއު ވަނީ ވިދާޅުވެފައެވެ.
ޒިޔަދަމްގެ މަރަށް 7 އަހަރުވެފައިވާއިރު، މިއަހަރުގެ ތެރޭގައި ވަނީ މި މައްސަލައިގެ ޚުލާސާ ބަޔާންވެސް އިއްވާފައެވެ. ބުރާސްފަތި ދުވަހުގެ އަޑުއެހުމަކީ މި މައްސަލައިގެ ޙުކުމް ކުރެއްވުމުގެ ކުރިން ގާޒީ ސާފު ކުރައްވަން ބޭނުންވާ ކަންކަން ސާފު ކުރެއްވުމަށް ބޭއްވެވި އަޑުއެހުމެކެވެ. އެގޮތުން ޝަރީއަތުން ސާފު ކުރަން ބޭނުންވާ ސުވާލުތައް ގާޒީ ވަނީ ކިޔާދެއްވާފައެވެ.
ގާޒީ ވިދާޅުވީ، ސިއްރު ހެކިވެރިޔާ 3 ގެ ބަޔާންތަކަށް ބަލާއިރު އަލީ ސިފާމްގެ އަތުގައި ވަޅިއެއް އޮތް ކަމަށާއި، އޭނާ ޙަމަލާ ދިން ކަމަށް ބުނެފައިވާ ކަމަށެވެ. އެ ނޫން ހެކިވެރިއަކު އެހެން ބުނެފައި ނުވާކަން ފާހަގަ ކުރައްވައި ގާޒީ ވަނީ، މި މައްސަލައިގައި ހުށައެޅިފައިވާ ހެކިތަކުގެ ތެރެއިން އެ ވާހަކައަށް ބާރު ލިބެނީ ކޮން ހެއްކަކުންކަން ނުވަތަ އެވާހަކައަށް ބާރު ލިބިދޭ ހެއްކެއް ދައުލަތުގެ ހެކިތަކުގައި ހިމެނޭކަން ޝަރީއަތަށް ސާފު ކޮށްދިނުމަށް އެދިލައްވާފައެވެ.
އެ ދެ މީހުންގެ މައްޗަށް ދައުވާ އުފުލާފައިވަނީ 2015 ވަނަ އަހަރުގެ މާޗް 20 ވަނަ ދުވަހުގެ ރޭ 10:30 ހާއިރު އެރަށު ވަގުތީހިޔާ ކައިރިން ޒިޔަދަމް ހިނގާފައި ދަނިކޮށް އޭނާއަށް ޙަމަލާދީ މަރާލާފައިވާކަމަށް ބުނެއެވެ. ގާޒީ ވަނީ ސިފާމް ވަގުތީހިޔާއަށް ވަންއިރު ދޮރު ފަޅާލާފައި ވަންކަމަށް ހަމަ އެ ސިއްރު ހެކިވެރިޔާ ބުނެފައިވާކަން ފާހަގަ ކުރައްވައި، އެކަމަށް ބާރުދޭ ކަމެއް ހެކިތަކުން ނުވަތަ މައްސަލައިގެ ސީން އޮފް ކްރައިމް ރިޕޯޓުތަކުން ވިޔަސް ހިމެނިފައިވޭތޯ ސުވާލު ކުރައްވާފައެވެ.
އޭގެ އިތުރުން، މި މައްސަލައިގައި ޒިޔަދަމްއަށް ޙަމަލާ ދިން ކަމަށް ބުނާ ވަޅި ތަހުގީގުގެ ތެރެއިން ރިކަވަރ ކުރެވުނުތޯވެސް ގާޒީ ޝަފީއު ވަނީ ސުވާލު ކުރައްވާފައެވެ. އަދި އެ ވަޅިއާއި ސިފާމްއާ ގުޅުވާލެވޭ އެއްވެސް ހެއްކެއް އެބަހުރިތޯވެސް ގާޒީ ސުވާލު ކުރެއްވިއެވެ.
އޭގެ އިތުރުންވެސް ބައެއް ކަންކަން ޝަރީއަތުން ސާފު ކުރަން ބޭނުންވާކަން ބަޔާން ކުރައްވާފައިވާއިރު، 4 ޑިސެމްބަރުގެ ކުރިން އެކަންކަމަށް ލިއުމުން ޖަވާބު ދިނުމަށް ގާޒީ ވަނީ ދެފަރާތަށްވެސް ދަންނަވާފައެވެ.
ގާޒީ ޝަފީއު ވިދާޅުވީ، ޑިސެމްބަރު މަހުގެ 18 ވަނަ ދުވަހު މި މައްސަލައިގެ ޙުކުމް ކުރައްވާނެ ކަމަށެވެ.
