ފަނޑިޔާރުކަމުގެ މަގާމާ އެކަށީގެންނުވާވަރުގެ ބޮޑު އަމަލެއް ކުރިކަން، ޖުޑީޝަލް ސަރވިސް ކޮމިޝަން (ޖޭއެސްސީ)އަށް ސާބިތުވެއްޖެނަމަ ވަކީލުކަން ކުރުމުގެ ހުއްދަ ބާތިލްކުރުމަށް ގާނޫނީ ފަންނުގެ ގާނޫނަށް ހުށަހެޅި އިސްލާހުގެ ބިލު ތަޅުމަށް ފޮނުވުމަށް ކޮމިޓީން ފާސްކޮށްފިއެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީން އެގޮތަށް ފާސްކޮށްފައިވަނީ ހޯމަ ދުވަހުއެވެ.
ހޯމަ ދުވަހު އޮތް ކޮމިޓީ ބައްދަލުވުމުގައި ވަނީ ދިވެހިރާއްޖޭގެ ޤާނޫނީ ފަންނުގެ ޤާނޫނަށް އިސްލާޙު ގެނައުމުގެ ބިލު ޖުޑީޝަރީ ކޮމިޓީން ދިރާސާކޮށް ނިންމި ގޮތަށް ވޯޓަށް އަހާފައެވެ. އެގޮތުން މި ކޮމިޓީގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ވަނީ ރިޕޯޓު ކޮމިޓީން ދިރާސާކޮށް ނިންމި ގޮތަށް ތަޅުމަށް ފޮނުވުމަށް ފާސްކޮށްފައެވެ.
މި ބިލް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅުއްވީ ދިއްގަރު ދާއިރާގެ މެންބަރު އިކްރާމް ހަސަންއެވެ.
ބިލް ހުށަހެޅުމުގެ މަގުސަދަކީ ފަނޑިޔާރުކަމުގެ މަގާމާ އެކަށީގެންނުވާ އަމަލެއް ފަނޑިޔާރަކު ކޮށްގެން، ފަނޑިޔާރުކަމުގެ މަގާމުން ވަކިކުރުމަށް ރައްޔިތުންގެ މަޖިލީހަށް ހުށަހެޅުމަށް ޖޭއެސްސީން ނިންމާ ހާލަތުގައި، އެ ފަނޑިޔާރެއްގެ ގާނޫނީ ވަކީލުކަން ކުރުމުގެ ހުއްދައާ މެދު އަމަލުކުރެވޭނެ އުސޫލުތައް ގާނޫނުގައި ބަޔާންކުރުމެވެ.
މިއިސްލާހުގައި ވަނީ; ފަނޑިޔާރުކަމުގެ މަގާމުގައި ހުރި މީހަކު ކުރި އަމަލަކީ، އޭގެ ސަބަބުން ފަނޑިޔާރުކަމުގެ މަގާމުގެ އަދި ޝަރުއީ ދާއިރާގެ އިތުބާރުގެއްލޭފަދަ ބޮޑު އަމަލަކަށް ޖޭއެސްސީން ކަނޑައަޅާފައިވާ އަމަލެއްކަމުގައި ސާބިތުވެއްޖެނަމަ، ވަކީލުކަމުގެ ހުއްދަ ބާތިލްކުރެވޭނެކަމަށެވެ.
ދެވަނަ ފަހަރަށް ވަކީލުކަން ކުރުމުގެ ފުރުސަތެއް މިފަދަ ކުށެއް ސާބިތުވެއްޖެނަމަ އެވަކީލަކަށް ނުލިބޭނެކަމަށްވެސް އެ އިސްލާހުގައިވެއެވެ.
ނަމަވެސް ކުދިކުދި މައްސަލައާ ހެދި ވަކީލުކަމުން ވަކިކޮށް ވަކީލުކަން ކުރުމުގެ ހުއްދަ ބާތިލްކޮށްފައިވާނަމަ، އެ މަގާމުން ވަކިކުރި ތާރީޚުން ފެށިގެން ފަސް އަހަރު ދުވަސް ފާއިތުވުމަށްފަހު، ގާނޫނީ ވަކީލުކަން ކުރުމުގެ ހުއްދައަށް އަލުން ހުށަހެޅިދާނެކަމަށް ވެސް އެ އިސްލާހުގައިވެއެވެ.
