ސިޔާސީ ޕާޓީތަކަށް މެމްބަރުން ވައްދާ ފޯމަށް ގެނެސްފައިވާ ބަދަލާއި އެކު އެކުލަވާލި އާ ފޯމަށް އަމަލު ކުރަން ފަށައިފިއެވެ.
އިލެކްޝަންސް ކޮމިޝަނުން ބުނީ ސިޔާސީ ޕާޓިތަކަށް މެންބަރުން ވައްދާ ފޯމަށް އިލެކްޝަންސް ކޮމިޝަނުން ބަދަލު ގެނެސްފައި ވަނީ ސިޔާސީ ޕާޓީތަކަށް މެންބަރުން ވައްދާ އިރު އޮޅުވާލައިގެން މީހުން ވެއްދުމާއި، އާއްމުންނަށް އެނގުމަކާއި ނުލާ އެ މީހުން އެއް ޕާޓީ އިން އަނެއް ޕާޓީއަށް ބަދަލުކުރުމުގެ މައްސަލަ ހައްލުކުރުމުގެ މަގްސަދުގައި ކަމަށެވެ. އެހެންކަމުން ޕާޓީތަކަށް މެންބަރުން ވައްދާ ފޯމުތަކަށް އެ ކޮމިޝަނުން ވަނީ ބަދަލުގެނެސްފައެވެ.
އެ ކޮމިޝަނުން އެފަދަ ބަދަލެއް ގެނައުމަށް ނިންމާފައިވަނީ ޕާޓީތަކުންނާއި، އާންމުންގެ ފަރާތުންވެސް އޮޅުވާލައިގެން ޕާޓީތަކަށް މީހުން ވައްދާ މައްސަލަ އާއި މެދު ކަންބޮޑުވުން ފާޅުކުރަމުން ދަނިކޮށް ކަން ފާހަގަކޮށްލެވެއެވެ. ޚާއްސަކޮށް އިންތިޚާބުތަކާއި ދިމާކޮށް ނުވަތަ ކެމްޕެއިން ހަރަކާތްތަކާއި ދިމާކޮށް މިފަދަ މައްސަލަތައް ފެންމަތިވާ މިންވަރު އިތުރުވެއެވެ.
ބަދަލު ގެނެސްފައިވާ ފޯމުތަކަކީ އަލަށް އުފެއްދުމަށް އެދި ހުށަހަޅާ ޕާޓީގެ މެމްބަރުކަމަށް ވުމަށް އެދޭ ފޯމާއި، މެމްބަރުކަމަށް ވުމަށް އެދޭ ފޯމުގެ އިތުރުން ސިޔާސީ ޕާޓީތަކުގެ ދަފްތަރަށް ޝަކުވާ ހުށަހަޅާ ފޯމެވެ. އޭގެ ތެރެއިން އަލަށް އެކުލަވާލި ފޯމުތަކަށް ގެނައި އެންމެ ބޮޑު އެއް ބަދަލަކީ ހެކިންގެ ފިންގާ ޕްރިންޓް ޖަހަން ޖެހުން ކަމަށް ވާއިރު މީގެ ކުރިން ފޯމުގައި ފިންގަރ ޕްރިންޓު ޖަހާކަށް ނުޖެއެވެ. އަދި ފޯމުގައި ޕާޓީއަށް ވަންނަ މީހާގެ ފޮޓޯއާއި، ސޮއިކުރާ މީހާގެ މަންމަގެ މައުލޫމާތުވެސް ހިމަނަންޖެހޭ ގޮތަށް މިހާރު ވަނީ ހަމަޖައްސާފައެވެ.
މި ބަދަލުތައް ގެނައީ ޕާޓީތަކާއި މަޝްވަރާ ކުރުމަށް ފަހުގައެވެ. މި ބަދަލާއި އެކު މިމަހުގެ 15 ވަނަދުވަހުގެ ކުރިން ސޮއިކޮށް ޕާޓީތަކަށް ހުށަހަޅާފައިވާ ފޯމުތައް ފިޔަވައި އެހެން ފޯމުތައް ހުށަހަޅަންޖެހޭނީ އާ ފޯމުގައެވެ. އަދި ކުރީގެ ފޯމުތަކުގައި ފުރާފައިވާ ފޯމުތައް މިމަހުގެ 30ގެ ކުރިން ކޮމިޝަނަށް ހުށަހަޅަން ޖެހޭނެއެވެ.
