ރާއްޖޭގެ ފުރަތަމަ ބާ އިމްތިހާނު ބާއްވައިފި

ދިވެހިރާއްޖޭގެ ފުރަތަމަ ބާ އިމްތިހާނު ދިވެހިރާއްޖޭގެ ބާ ކައުންސިލުން ހޮނިހިރު ދުވަހު ބާއްވައިފިއެވެ.

ދެ ސެޝަނަކަށް ބަހާލައިގެން މާލެ އަދި އައްޑޫ ސިޓީގައި ކުރިއަށް ގެންދިޔަ ބާ އިމްތިހާނުގައި 176 ފަރާތަކުން ބައިވެރިވެފައިވެއެވެ. މިއީ ރަޖިސްޓަރީ ކުރި ކެންޑިޑޭޓުންގެ 98.3 އިންސައްތަ ކަމަށް ބާ ކައުންސިލުން ބުނެފައިވެއެވެ.

މީލާދީ ކޮންމެ އަހަރަކު އެއް ފަހަރު ބޭއްވުމަށް ކަނޑައަޅާފައިވާ ބާ އިމްތިހާނުގެ މަޤްސަދަކީ ދިވެހިރާއްޖޭގެ ޤާނޫނީ ދާއިރާއަށް ނުކުންނަން ބޭނުންވާ ފަރާތްތަކުގައި ހުންނަންޖެހޭ އަސާސީ މިންގަނޑު ކަނޑައަޅައި، ފެންވަރު ވަޒަންކުރުމެވެ. މި އިމްތިހާނު މެދުވެރިކޮށް މި ދާއިރާއަށް އަލަށް ނުކުންނަ ފަރާތްތަކަށް ޤާނޫނީ މަފްހޫމުތައް އެނގޭ މިންވަރާއި، ޤާނޫނީ މައްސަލަ ދެނެގަތުމުގެ ޤާބިލިޔަތުކަން ހުރި މިންވަރާއި، ޤާނޫނީ ޚިދުމަތް ދިނުމަށް ތައްޔާރުވެފައިވާ މިންވަރު ދެނެގަނެވޭނެއެވެ. އެހެންކަމުން، ބާ އިމްތިހާނަކީ ރާއްޖޭގައި ޤާނޫނީ ވަކީލެއްގެ ގޮތުގައި މަސައްކަތްކުރުމަށް ހުއްދަ ދޫކުރުމަށް ބޭނުންކުރާ މިނިމަމް ބެންޗް މާކެވެ.

2022 ވަނަ އަހަރުގެ ބާ އިމްތިހާނުގައި ހިމަނާފައިވާ މާއްދާތަކަކީ ކޮންސްޓިޓިއުޝަނަލް އެންޑް އެޑްމިނިސްޓްރޭޓިވް ލޯ، ޓޯރޓް ލޯ، ލޭންޑް ލޯ އެންޑް ޕްރެކްޓިސް، ކޮންޓްރެކްޓް ލޯ އެންޑް ޕްރެކްޓިސް، ކްރިމިނަލް ލޯ އެންޑް ޕްރޮސީޖަރ، އަދި މޯލްޑިވްސް ލީގަލް ސިސްޓަމްއެވެ.  

ބާ އިމްތިހާނުން ފާސްވުމަކީ ޤާނޫނީ ފަންނުގެ ޤާނޫނުގެ ދަށުން ރާއްޖޭގައި ޤާނޫނީ ވަކީލެއްގެ ގޮތުގައި މަސައްކަތްކުރުމަށް ހުއްދަ ދޫކުރުވޭ ދެ ޝަރުތުގެ ތެރެއިން އެއް ޝަރުތެވެ. ޤާނޫނީ ފަންނުގެ ދަށުން ލާޒިމުކުރާ ދެވަނަ ޝަރުތަކީ ލައިސަންސިން ތަމްރީނު ޕްރޮގްރާމެއް ފުރިހަމަ ކުރުމެވެ.