ގެދޮރުވެރިކަމަށް ޑިމާންޑް ބޮޑު، ވިޔަފާރި މޮޑެލްއަށް ކުރިމަގު އެބައޮތް - މިނިސްޓަރ
ސަރުކާރުގެ ފަރާތުން ބޯހިޔާވަހިކަން ފޯރުކޮށްދޭނެކަމަށް އާންމުން އުންމީދުކުރޭ
މިނިސްޓަރ އަސްލަމް
ރާއްޖޭގައި ގެދޮރުވެރިކަމަށް އޮތް ޑިމާންޑް ބޮޑުކަމަށާއި ވިޔަފާރި މޮޑެލްއަށް ކުރިމަގު އެބައޮތް ކަމަށް, މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
އިންޓަރނޭޝަނަލް ފެޑެރޭޝަން އޮފް އޭޝިއަން އެންޑް ވެސްޓަރން ޕެސިފިކް ކޮންރެކްޓަރސް އެސޯސިއޭޝަންސް (އިފޮޕްކާ)ގެ 45 ވަނަ ކޮންވެންޝަންގައި ވާހަކަދައްކަވަމުން މިނިސްޓަރ ވަނީ، ގެދޮރުވެރިކަން ފޯރުކޮށްދިނުމުގައި ދިމާވެފައިވާ ގޮންޖެހުންތަކަށް އަލިއަޅުވާލައްވާފައެވެ. އެގޮތުން ރައްޔިތުން އަބަދުވެސް ސަރުކާރުގެ ފަރާތުން ބޯހިޔާވަހިކަން ފޯރުކޮށްދޭނެކަމަށް އުންމީދުކުރާ ކަމަށާއި، ކުދި އާމްދަނީން ފެށިގެން ބޮޑެތި އާމްދަނީ ލިބޭ މީހުންވެސް ގަބޫލުކުރަނީ އެގޮތަށްކަމަށް މިނިސްޓަރ ވިދާޅުވިއެވެ. ފެށުނީއްސުރެ ކަން ހިނގަމުން އައި ގޮތަކީ އެއީ ކަމަށާއި، ސަރުކާރުގެ ދައުރަކީ އެންމެންނަށް ބޯހިޔާވަހިކަން ލިބޭކަން ކަށަވަރުކޮށްދިނުންކަން މިނިސްޓަރ ފާހަގަކުރެއްވިއެވެ. އެގޮތުން ގާއިމްކުރާ ސޯޝަލް ހައުސިންގގެ މަސައްކަތް ފުރިހަަމައަށް ކުރުމުގައި ދިމާވާ އެންމެ ބޮޑު ގޮންޖެހުމަކީ ސޯޝަލް ހައުސިންގއަށް ފައިސާ ދައްކަންޖެހޭ ފަރާތްތަކުން އެ ފައިސާ ނުދެއްކުންކަމަށް މިނިސްޓަރ ވިދާޅުވިއެވެ. އަދި ސޯޝަލް ހައުސިންގއަށް ފައިސާ ނުދައްކައިގެން ފިޔަވަޅު އެޅުމަކީ އެއްވެސް ސަރުކާރަކަށް ކުރަން ފަސޭހަކަމަކަށް ނުވާނެކަމަށް މިނިސްޓަރ ވިދާޅުވިއެވެ.
މިނިސްޓަރ އަސްލަމް ވިދާޅުވީ، ސޯޝަލް ހައުސިންގެ އިތުރުން ރިއަލް އެސްޓޭޓަށް ޖާގަ ލިބޭ ގޮތަށް ބޯހިޔާވަހިކަމުގެ ފުރުސަތު ލިބެން ޖެހޭ ކަމަށާއި، އެ މަސައްކަތް ކުރަމުންދާ ކަމަށެވެ. އެއީ އުނދަގޫ މަސައްކަތެއްކަން ގަބޫލުފުޅުކުރައްވާކަމަށާއި، ގޮންޖެހުންތަކާއެކުވެސް އެ މަސައްކަތްކުރައްވަން ތައްޔާރަށް ހުންނެވިކަމަށް މިނިސްޓަރ ވިދާޅުވިއެވެ. އަދި އެ މަރުހަލާ ފުރިހަމަ ކުރުމަށް ލޯނު ލިބޭ ނިޒާމް ހަރުދަނާކަން ޔަގީންކޮށް، ގާނޫނީގޮތުން ފުރިހަމަކުރަންޖެހޭ ކަންކަންވެސް ކުރައްވާނެ ކަަމަށް މިނިސްޓަރ ވިދާޅުވިއެވެ.
