ވޯލްޑްކަޕާއެކު ޤަތަރުން ވޯލްޑްރެކޯޑަކަށް

ކުރިއަށް އޮތް ފޯރިގަދަ، ފީފާ ވޯލްޑްކަޕް ފުޓުބޯޅަ މުބާރާތާ ދިމާކޮށް، މުބާރާތް ހޮސްޓްކުރާ ޤަތަރުން، ދުނިޔޭގެ އެންމެ ބޮޑު ފުޓުބޯޅަ ބޫޓު ކަމަށް އެ ޤައުމުން ޤަބޫލުކުރާ ބޫޓު، އާންމުކޮށް ދައްކާލައިފިއެވެ.

ވޯލްޑްކަޕް ހޮސްޓް ކުރުމުގެ ޝަރަފު ހޯދި ފުރަތަމަ ޢަރަބި ޤައުމުގެ މަޤާމުގައި އޮތް ޤަތަރުން ދައްކާލި މި ފުޓުބޯޅަ ބޫޓަށް، ގިނިސް ވޯލްޑް ރެކޯޑް ފޮތުން ޖާގަ ލިބޭނެ ކަމަށް، އެ ޤައުމުން ޢުއްމީދު ކުރެއެވެ.

ޤަތަރުން ދައްކާލި ފުޓުބޯޅަ ބޫޓުގެ އުސް މިނުގައި ގާތްގަނޑަކަށް 7 ފޫޓު ހުރިއިރު، އެ ބޫޓަކީ 17 ފޫޓު ނުވަތަ ގާތްގަނޑަކަށް 5 މީޓަރު ދިގު ބޫޓެއް ކަމަށް މައުލޫމާތު ލިބެއެވެ.

ދުނިޔޭގެ ތައްޓަށް ކުޅޭ ވޯލްޑްކަޕް ފުޓުބޯޅަ މުބާރާތް ފެށުމަށް ހަފުތާއަކަށްވުރެވެސް ވަގުތު ކުޑަތަން ވެފައި ވަނިކޮށް، ދުނިޔޭގެ ރެކޯޑަކަށް އަމާޒުކޮށްގެން ޤަތަރުން ދައްކާލި ބޮޑު ފުޓުބޯޅަ ބޫޓު ބަލާލުމަށް، ގިނަ ޢަދަދެއްގެ ބަޔަކު ޖަމާވިއެވެ. އޭގެ ތެރޭގައި، ވޯލްޑްކަޕްގެ މެޗުތައް ހަމަ ލޮލުން ބަލާލުމަށް، ދުނިޔޭގެ އެކި ކަންކޮޅުތަކުން ޤަތަރަށް ޒިޔާރަތް ކޮށްފައި ވާ ފުޓުބޯޅަ ފޭނުން ހިމެނެއެވެ.

އެންމެ ބޮޑު ފުޓުބޯޅަ ދައްކާލުމަށް ޤަތަރުން ކުރިއަށް ގެންދިޔަ ހާއްސަ އިވެންޓްގައި، ބަލާ މީހުން ހައިރާން ކުރުވާ ވަރުގެ ބޮޑެތި ދިދަތައް ބޭނުން ކޮށްފައި ވާ އިރު، އެ ސަރަޙައްދުގެ ފަޒާ ފަޅުފިލުވަމުން ދިޔައީ ޤަތަރުގެ ޘަޤާފީ މިއުޒިކުން ކަން ފާހަގަ ކުރަން ޖެހެއެވެ.

ނޮވެމްބަރު 20 ވަނަ ދުވަހު، ޤަތަރާއި އިކުއެޑޯ ކުޅޭ ކިކް-އޯފް މެޗަށް ގިނަ ބަޔަކު އިންތިޒާރު ކުރަމުން ދާ އިރު، ބޮޑު ބޫޓު ދައްކާލުމަށް ކުރިއަށް ގެންދިޔަ ހާއްސަ އިވެންޓަށްވެސް ގިނަ ބައެއްގެ ތަޢުރީފާއި ސަމާލުކަން ވަނީ ލިބިފައެވެ.

ދުނިޔޭގެ އެކި ކަންކޮޅުތަކުން އެތައް ބައެއްގެ އިންތިޒާރުތަކާ ގުޅިފައިވާ ފީފާ ވޯލްޑްކަޕްގެ ފޯރި، ޤަތަރުގައި އެންމެ ގަދައަށް ނަގަމުންދާ އެއް ސަރަޙައްދަކީ ސޫޤު ވާޤިފް ސަރަޙައްދު ކަމާ މެދަކު ޝައްކެއް ނެތެވެ. ކާރޫބާރު ބޮޑުވި ނަމަވެސް، މީހުން ތިބީ އުފަލުންނެވެ.

ދުވަހަކަށް ވުރެ ދުވަހެއް، ވޯލްޑްކަޕްގެ މޫޑު ގަދަވަމުން ދާއިރު، ސޫޤު ވާޤިފް ސަރަޙައްދުގެ ފޯރިވެސް ދަނީ ގަވަމުންނެވެ.