ވޯލްޑްކަޕާއެކު ޢަރަބި ޘަޤާފީ ފަތުރުވެރިކަން މެކުހަށް!

ދުނިޔޭގެ އެންމެ ގިނަ ބަޔަކު އެ ކުޅިވަރު މުބާރާތަކަށް އިންތިޒާރު ކުރަމުންދާ ވޯލްޑްކަޕް ފުޓުބޯޅަ މުބާރާތް ފެށެން ވަގުތު ކުޑަތަން ވަމުން ދާއިރު، މި ފަހަރުގެ މުބާރާތް ބާއްވާ ޤަތުރުގެ މަސްރަހުގައި މުބާރާތުގެ ޖޯޝާ ފޯރީގެ އަޑުފަށްގަނޑު ދަނީ ހައްތަހާ ގަދަވަމުންނެވެ.

ސޫޤް ވަޤިފް ބާޒާރުގެ އެންމެ ބައިބޯ ސަރަޙައްދުގައި ހުރި އޭނާގެ ރެސްޓޯރަންޓްގެ ކުރިމަތީގައި މަޑުކޮށްލައިގެން އިން މަރްޔަމް އަލް މަންސޫރުގެ މޫނުމަތިން ފެންނަމުން ދިޔައީ އުފާވެރި ކަމެވެ. މަރްޔަމް ބުނާ ގޮތުގައި އެ ރެސްޓޯރަންޓްގައި އޭނާ ތައްޔާރު ކުރަމުންދާ ޘަޤާފީ ކޭންތަކަކީ މިއަދު އެ ޤައުމުގެ އާންމުންގެ އިތުރުން، ޤަތަރަށް ޒިޔާރަތް ކުރަމުންދާ މެހެމާނުންގެ މެދުގައިވެސް އެންމެ މަޤުބޫލު ކޭމަށް ވަނީ ވެފައެވެ.

ކުރިއަށް އޮތީ ދުނިޔޭގެ އެކި ހިސާބުތަކުން، ފުޓުބޯޅައަށް ލޯބިކުރާ އެތައް ބަޔަކު ޤަތަރަށް ޒިޔާރަތް ކުރާނެ ދުވަސްވަރަކަށް ވާއިރު، މަރްޔަމް ވަނީ ބޭރު ޤައުމުތަކުން ޤަތަރަށް އެތެރެވާ ވީހާވެސް ގިނަ ބަޔަކު، އޭނާގެ ރެސްޓޯރަންޓުގެ ތަޖުރިބާކޮށްލުމަށް ގޮވާލާފައެވެ.

ޤަތަރުގެ ވެރިރަށް ދޯހާގެ ޤަރުނަކަށްވުރެ ގިނަ ދުވަސްވީ ވިޔަފާރި ބާޒާރެއްގައި ތަރައްޤީ ކޮށްފައި ވާ ސޫޤް ވަޤިފް ބާޒާރުގައި މަރްޔަމް ފަދަ އެތައް ބަޔަކު މިއަދު ދަނީ ޚިދުމަތް ދެމުންނެވެ. ވާދީ މުޝައިރިބް ކޯރުގެ އައްސޭރީގައި ތަރައްޤީ ކޮށްފައިވާ އެ ބާޒާރަކީ މިއަދު ގިނަ ބައެއްގެ ސަމާލުކަންވެސް ހުއްޓިފައި ވާ ބާޒާރެކެވެ.

ވޯލްޑްކަޕްގެ ފޯރިއާއެކު ގަދަވަނީ ހަމައެކަނި ކުޅިވަރުގެ ފޯރިއެއް ނޫނެވެ. ޘަޤާފީ ތަރިކައާއި ދޭދޭ ގުޅުންތަކުގެ ބަދަހިކަންވެސް ޖަހަނީ މެކުހަށެވެ.

ޤަތަރުގެ ޢާންމުން ބުނާ ގޮތުގައި، ސޫޤް ވަޤިފް ބާޒާރު ތަޖުރިބާ ކުރުމަކީ އެ ޤައުމަށް ޒިޔާރަތް ކުރާ ފަރާތްތަކުން ކޮންމެހެންވެސް ކުރަން ޖެހޭ ކަމެކެވެ. އެއީ ޤަތަރުގެ ތާރީޚާއި ތަރިކައިގެ، އެފަދަ ދެވަނައެއް ނެތް ތަޖުރިބާއެއް ލިބިދޭނެ މަންޒިލެއްގެ ގޮތުގައި ސިފަ ކުރެއެވެ.

ސޫޤް ވަޤިފް ބާޒާރަށް ޤަވައިދުން ޒިޔާރަތް ކުރާ މީހުންވެސް މަދެއް ނޫނެވެ. އެމީހުން އާންމުކޮށް ގަނެ އުޅެނީ އެކި ބާވަތްތަކުގެ ފަތްޕިލާވެއްޔާ، ހަވާދުގެ ބާވަތްތަކާ، ގަހަނައާއި، ސާލު ކުނާތަކުގެ އިތުރުން، އަތްތެރި މަސައްކަތުގެ އުފެއްދުންތަކާއި ޤަދީމީ ސެންޓު ފަދަ ތަކެއްޗެވެ.

އޭގެ އިތުރުން ތަފާތު އެކި އާއިލާތަކުގެ ބާޒުތަކާއެކު ވަޤުތު ހޭދަ ކުރުމާއި، ޤަތަރުގެ މަޖިލީސްތަކުގައި ޒަމާނުއްސުރެ ކުޅެމުން އަންނަ ދަލް ދަމާ ކުޅެލުމުގެ ފުރުޞަތުވެސް، ސޫޤް ވަޤިފް ބާޒާރަށް ޒިޔާރަތް ކުރާ ފަރާތްތަކަށް ލިބެއެވެ.

ޤަތަރަށް ޒިޔާރަތް ކުރުމުގެ ޙަޤީޤީ މަޤްޞަދަކީ ވޯލްޑްކަޕްގެ މެޗުތައް ހަމަލޮލުން ބަލާލުން ކަމުގައި ވީ ނަމަވެސް، މި ދުވަސްވަރު ޤަތަރަށް ޒިޔާރަތް ކުރުމަކީ ޢަރަބި ދުނިޔޭގެ މުއްސަނދި ޘަޤާފަތާއި ތަރިކަ، އެއް މަންޒިލަކުން ބަލާލާ، އެއް ދޮނުގައި ދެބުޅި ޖަހާލަން ލިބޭ ރަނުގެ ފުރުޞަތެއް ކަމާ މެދު ދެބަސްވެވޭކަށްނެތެވެ.