މައްސަލަ ނިމެންދެން ދިރާގު ޓީވީގެ ލައިސަންސް ދަމަހައްޓަން ސިވިލް ކޯޓުން އަމުރުކޮށްފި
ދިރާގު ޓީވީގެ ލައިސަންސް އައު ނުކުރަން ބްރޯޑްކޮމުން ވަނީ ނިންމާފައި
ދިރާގު
ބްރޯޑްކާސްޓިން ކޮމިޝަނާ ދެކޮޅަށް ދިރާގުން ހުށަހަޅާފައިވާ މައްސަލަ ނިމެންދެން ދިރާގު ޓީވީގެ ލައިސަންސް ދަމަހައްޓަން ސިވިލް ކޯޓުން ވަގުތީ އަމުރެއް ނެރެފިއެވެ.
ދިރާގުން ބްރޯޑްކާސްޓިން ކޮމިޝަނާ ދެކޮޅަށް މައްސަލަ ހުށަހަޅާފައިވަނީ ބޭރުގެ ހިއްސާއެއް އޮންނަ ކުންފުނިތަކަށް ރީބްރޯޑްކާސްޓިން ލައިސަންސް ނުލިބޭ ގޮތަށް ބްރޯޑްކާސްޓިން ކޮމިޝަނުން ހެދި ގަވާއިދެއްގެ ދަށުން، ދިރާގު ޓީވީގެ ލައިސަންސް އައު ނުކުރަން އެ ކޮމިޝަނުން ނިންމުމާ ގުޅިގެންނެވެ. އެގޮތުން އަންނަ އަހަރުގެ ޖެނުއަރީ މަހަށް ލައިސަންސް ހަމަވާތީ މައްސަލަަ ނިމެންދެން ލައިސަންސް ދަމަހައްޓަން ދިރާގުން ވަނީ ވަގުތީ އަމުރަކަށް އެދިފައެވެ. މި މައްސަލައިގައި ވަގުތީ އަމުރެއް ކޯޓުން ނެރުނީ ބުރާސްފަތި ދުވަހުއެވެ.
ސިވިލް ކޯޓުން ނެރުނު އަމުރުގައި ބުނެފައިވަނީ ރީ-ބްރޯޑްކާސްޓިން ޚިދުމަތް ދިނުމަށް ދިރާގުން ބޮޑު އިންވެސްޓްމަންޓެއްކޮށް، އެތައް އަހަރެއްގެ މަސައްކަތުން ކަސްޓަމަރުން ހޯދާފައިވާތީ އެކަމުގައި ތިން ވަނަ ފަރާތްތަކެއްގެ ހައްގު އެކުލެވޭ ކަމަށެވެ. އަދި ލައިސަންސް އައު ނުކުރަން ބްރޯޑްކާސްޓިން ކޮމިޝަނުން ނިންމާފައި އޮތީ ދިރާގުން ހެދި ގޯހެއްގެ ސަބަބުން ކަން މިވަގުތަށް ބެލިބެލުމުން ފެންނަން ނެތް ކަމަށް ވެސް އެ ނިންމުމުގައި ވަނީ ފާހަގަކޮށްފައެވެ.
މީގެ އިތުރުން ދިރާގު ޓީވީގެ ރީ-ބްރޯޑްކާސްޓިން ލައިސަންސްގެ މުއްދަތު ހަމަވާން ކައިރިވެފައިވާއިރު، އެ ކުންފުނިން އެދުނު ގޮތަށް ވަގުތީ އަމުރެއް ނެރެނުދީފި ނަމަ މާލީ ގޮތުން އަލުން އިއާދަނުކުރެވޭ ވަރުގެ ބޮޑު ގެއްލުމަކާ ކުރިމަތިލާން ޖެހޭނެ ކަމަށް ސިވިލް ކޯޓުގެ އަމުރުގައިވެއެވެ. އަދި ދިރާގުން އެދިފައިވާ ގޮތަށް ރީ-ބްރޯޑްކާސްޓުކުރުމުގެ ލައިސަންސް ދަމަހައްޓަން ވަގުތީ އަމުރެއް ނެރުނަސް ބްރޯޑްކޮމްއަށް ލިބޭނެ ގެއްލުމެއް ނެތްކަމަށް ސިވިލް ކޯޓުން ވަނީ ފާހަގަކޮށްފައެވެ.
މި މައްސަލަ ބެއްލެވީ ގާޒީ ހާފިޒާ އަބްދުއްސައްތާރުއެވެ.
