ޑޯޓްމަންޑް މޮޅުވި މެޗުގައި މޫކޯކޯ އަށް ރެކޯޑެއް

ޖަރުމަނު ލީގުގައި ބޮރޫޝިއާ ޑޯޓްމަންޑުން ބޮކުމް ބަލިކޮށްފިއެވެ.

ލީގުގައި ހޮނިހިރު ދުވަހުގެ ރޭ ޑޯޓްމަންޑުގެ ދަނޑުގައި ކުޅުނު މެޗު އެ ޓީމުން ކާމިޔާބުކުރީ 0-3 އިންނެވެ. މެޗުގައި ޑޯޓްމަންޑުގެ ތިން ލަނޑު ވެސް ފެނުނީ ދެ ވަނަ ހާފުގައެވެ.

މެޗު ފަށައިގެން އަށް ވަނަ މިނެޓުގައި ޑޯޓްމަންޑަށް ލީޑު ނަގައިދިނީ ޔޫސެފާ މޫކޯކޯއެވެ. އޭގެ ފަހުން މެޗުގެ 12 ވަނަ މިނެޓުގައި ޑޯޓްމަންޑަށް ލިބުނު ޕެނަލްޓީ އެއްގައި ލީޑު ފުޅާކޮށްދިނީ ޖިއޮވާނީ ރޭނާއެވެ. ބޮކުމް އިން މެޗުގައި ލަނޑެއް ޖެހި ނަމަވެސް ވީއޭއާރުން ވަނީ ލަނޑު ބަލައި ނުގަންނަން ނިންމާފައެވެ. ޑޯޓްމަންޑުގެ ތިން ވަނަ ލަނޑު މޫކޯކޯ ޖެހީ މެޗުގެ ފުރަތަމަ ހާފުގެ އިތުރު ވަގުތުގައެވެ.

މެޗުގައި މޫކޯކޯ ޖެހި ދެ ލަނޑާ އެކު އޭނާ ވެގެން ގޮސްފައިވަނީ ޖަރުމަނު ލީގުގައި 10 ލަނޑު ހަމަކުރި އެންމެ ޒުވާން ކުޅުންތެރިޔާއަށެވެ. ކެމަރޫން އަށް އުފަން އުމުރުން 17 އަހަރުގެ މޫކޯކޯ އަންނަނީ މި ސީޒަންގައި ޑޯޓްމަންޑަށް މޮޅު ކުޅުމެއް ކުޅެދެމުންނެވެ. ކެމަރޫން އަށް އުފަން ނަމަވެސް، އޭނާ އަންނަނީ ޖަރުމަނުގެ 21 އަހަރުން ދަށުގެ ޤައުމީ ޓީމަށް ކުޅެމުންނެވެ.

މެޗުން މޮޅުވެ ލިބުނު ތިން ޕޮއިންޓާ އެކު ޑޯޓްމަންޑު އޮތީ ލީގު ތާވަލްގެ ތިން ވަނަ މަގާމުގައެވެ. އެއީ ކުޅުނު 13 މެޗުން 25 ޕޮއިންޓާ އެކުއެވެ. ޑޯޓްމަންޑަށްވުރެ އެއް މެޗު މަދުން ކުޅެގެން ފްރެއިބާގަށް ލިބެނީ 14 ޕޮއިންޓެވެ.