ހޯނޑެއްދޫގައި ފުލުހުން ހިންގާ އޮޕަރޭޝަން އަދިވެސް ކުރިއަށް، ގިނަ އަަދަދެއްގެ މަސްތުވާތަކެތި ފެނިފައިވޭ
މަސްތުވާތަކެތި
ގދ. ހޯނޑެއްދޫގައި ފުލުހުން ކުރިއަށްގެންދާ އޮޕަރޭޝަން އަދިވެސް ކުރިއަށްދާކަަމަށް ފުލުހުން ބުނެފިއެވެ.
ދާދިފަހުން ހޯނޑެއްދޫއިން ގިނަ އަަދަދަދެއްގެ މަސްތުވާތަކެތި ވަނީ ހޯދާފައެވެ. އެގޮތުން ނިމިދިޔަ އޮކްޓޯބަރ މަހުގެ 28 ވަނަ ދުވަހު ފުލުހުން ވަނީ އެރަށުގެ ވަލުތެރޭގައި ވަޅުލައި ފޮރުވާފައިހުރި ގިނައަދަދެއްގެ މަސްތުވާތަކެތި ހޯދާފައިވާކަން ހާމަކޮށްފައެވެ. ފުލުހުން ބުނިގޮތުގައި އެ ތަކެތި ހޯދާފައި ވަނީ ފުލުހުންގެ ޑްރަގް އެންފޯސްމަންޓާއި އިންޓެލިޖެންސް އަދި ސައުތު ޕޮލިސްގެ ފުލުހުން ގުޅިގެން ކުރިއަށްގެންދާ ޚާއްސަ އޮޕަރޭޝަނެއްގައެވެ. މަސްތުވާތަކެތި ހޯދާފައިވަނީ ގދ. ހޯނޑެއްދޫ ވަލުތެރޭގައި ވަޅުލާފައި ހުއްޓާކަމަށް ފުލުހުން ބުނެއެވެ.
މި އޮޕަރޭޝަނުގައި ގިނަ އަދަދެއްގެ މަސްތުވާތަކެތި ހޯދާފައިވާއިރު، މި އޮޕަރޭޝަނަކީ ރާއްޖެއަށް މަސްތުވާތަކެތި އެތެރެކޮށް އެތަކެތި ވިއްކައި ވިޔަފާރިކުރާކަމަށް އިންޓެލިޖެންސަށް ލިބުނު މައުލޫމާތަކާ ގުޅިގެން ކުރިއަށްގެންދާ އޮޕަރޭޝަނެއްކަމަށް ފުލުުހުން ވަނީ ބުނެފައެވެ. މި މައްސަލަ ޑްރަގް އެންފޯސްމަންޓުން ގެންދަނީ ތަހުގީގުކުރަމުންކަމަށާއި މި އޮޕަރޭޝަނުގައި، ކޯޓު އަމުރުގެ ދަށުން އިތުރު ތަންތަން ބަލައިފާސްކުރުމުގެ މަސައްކަތް ކުރަމުންދާކަން ފުލުހުން ވަނީ އޭރު ހާމަކޮށްފައެވެ.
މިކަމާގުޅޭގޮތުން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ، ފުލުހުން ހޯދި މަސްތުވާތަކެއްޗަކީ، މަސްތުވާތަކެތީގެ މައްސަލައާއި ގުޅިގެން ހައްޔަރުކުރި މީހަކު ގދ. ހޯނޑެއްދޫ ވަލުތެރޭގައި ވަޅުލައި ފޮރުވާފައިހުރި ގިނައަދަދެއްގެ މަސްތުވާތަކެއްޗެވެ. އޭގެ ފަހުން ގދ. ހޯނޑެއްދޫއާއި އެ ރަށާ ކައިރި ފަޅުރަށަކުން އިތުރު 69 ކިލޯގެ މަސްތުވާތަކެތި ފުލުހުން ހޯދާފައިވާކަން، ނޮވެމްބަރު މަހުގެ 2 ވަނަ ދުވަހު ފުލުހުން ވަނީ ހާމަކޮށްފައެވެ. އޮކްޓޯބަރު މަހުގެ 27 ވަނަ ދުވަހު ހޯނޑެއްދޫއިން ހޯދި 13 ކިލޯގެ މަސްތުވާތަކެއްޗާއެކު އެ ރަށުން އަތުލައިގަތް މަސްތުވާތަކެތީގެ އަދަދު 82 ކިލޯއަށް އަރާފައިވާ ކަމަށްވެސް ފުލުހުން ވަނީ ބުނެފައެވެ.
އެކަމާގުޅިގެން "ރާއްޖެ އެމްވީ"ން ކުރި ސުވާލަކަށް ޖަވާބުދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ، ފުލުހުން އެ ސަރަހައްދުގައި ހިންގާ އޮޕަރޭޝަން އަދިވެސް ކުރިއަށްދާ ކަަމަށެވެ. މަސްތުވާތަކެތީގެ ބޮޑު ނެޓްވޯރކަކާއި ނުވަތަ މަސްތުވާތަކެތީގެ ވިޔަފާރިކުރާ ބޮޑަކާ މިކަމާ ގުޅުންހުރިތޯ ދެންނެވުމުން އޭނާ ވިދާޅުވީ، އެ މައުލޫމާތު އަދި ހާމަކުރެވެން ނެތް ކަމަށެވެ. އަދި މި އޮޕަރޭޝަން ކުރިއަށްދިޔަ މުއްދަތާ ގުޅޭގޮތުން ދެންނެވުމުން އޭނާ ވިދާޅުވީ، އޮޕަރޭޝަން ކުރިއަށްގެންދާތާ ދުވަސްކޮޅެއް ވެފައިވާކަަމަށާއި އެ އޮޕަރޭޝަނަކީ އިންޓެލިޖެންސަށް ލިބުނު މައުލޫމާތަކާ ގުޅިގެން ކުރިއަށްގެންދާ އޮޕަރޭޝަނަކަށް ވުމާއެކު އެ އޮޕަރޭޝަނަށް ހޭދަވި ސީދާ މުއްދަތު މި ވަގުތު ބުނެދޭން ނޭނގޭކަމަށެވެ. އަދި މި އޮޕަރޭޝަން ދިގުލައިގެން ދާނެ މުއްދަތު ނޭނގުނުނަމަވެސް، އޮޕަރޭޝަން ކުރިއަށްދާކަން އޭނާ ވަނީ ކަށަަވަރުކޮށްދެއްވާފައެވެ.
ފުލުހުން ދަނީ ރާއްޖޭގެ އެހެން ހިސާބުތަކުގައިވެސް މަސްތުވާތަކެއްޗާ ދެކޮޅަށް އޮޕަރޭޝަންތަކެއް ހިންގަމުންނެވެ. މަސްތުވާތަކެއްޗާ ދެކޮޅަށް ފުލުހުން ކުރަމުންގެންދާ މަސައްކަތްތަކުގެ ތެރެއިން، ދެ ރަށެއްގައި ހިންގި މަސްތުވާތަކެތީގެ އޮޕަރޭޝަންތަކެއްގައި ތިން މީހުން ހައްޔަރުކޮށްފައި ވަނީވެސް ނިމިދިޔަ އޮކްޓޯބަރ މަހުގެ ތެރޭގައެވެ. އެގޮތުން ފުލުހުން ވަނީ އައްޑޫއާއި އއ. އުކުޅަހުގައި ޚާއްސަ އޮޕަރޭޝަނެއް ހިންގާފައެވެ.
