2021 އަހަރުގައި ރާއްޖެ އައި ޖުމްލަ ފަތުރުވެރިންގެ އަދަދަށްވުރެ މިއަހަރުގެ މިހާތަނަށް އައި ފަތުރުވެރިންގެ އަދަދު އިތުރުވެއްޖެއެވެ.

ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ 2021 އަހަރު ރާއްޖެ ޖުމްލަ އައިސްފައިވަނީ 1،321،937 (އެއްމިލިއަން ތިންލައްކަ އެކާވީސް ހާސް ނުވަސްތޭކަ ތިރީސް ހަތް) ފަތުުރުވެރިން ކަމަށެވެ. އަދި މިއަހަރުގެ އޮކްޓޯބަރު މަހުގެ 27 ވަނަ ދުވަހު، ރާއްޖެ އައި ފަތުރުވެރިންގެ އަދަދު މިދިޔަ އަހަރު އައި ޖުމްލަ ފަތުރުވެރިންގެ އަދަދަށްވުރެ އިތުރުވެފައިވާއިރު މިިކަމުގައި ބައިވެރިވި ހުރިހާ އެންމެންނަށް މިނިސްޓަރ ވަނީ ޝުކުރު އަދާކުރައްވާފައެވެ.

އޭގެ ތެރޭގައި ޓޫރިޒަމް އިންޑަސްޓްރީގެ އިންވެސްޓަރުންނާއި މުވައްޒަފުންގެ އިތުރުން އެހެނިހެން ސްޓޭކް ހޯލްޑަރުންނަށް ވެސް މިނިސްޓަރ ވަނީ ޝުކުރު އަދާކުރައްވާފައެވެ.

މިއަހަރުގެ މިހާތަނަށް އެވްރެޖުކޮށް ދުވާލަކު 4،400 އަށްވުރެ ގިނަ ފަތުރުވެރިން ރާއްޖެ އަށް ޒިޔާރަތް ކުރާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.

ކޮވިޑުގެ ކުރިން ރާއްޖެ އަށް އެންމެ ގިނައިން ފަތުރުވެރިން ޒިޔާރަތް ކުރަމުން އައީ ޗައިނާއިންނެވެ. ނަމަވެސް އެ ޤައުމުގެ ބޯޑަރު ބަންދުކޮށް، ދަތުރުފަތުރު ކުރުމުގެ ފިޔަވަޅުތައް ވަރުގަދަކުރުމުން އެ ޤައުމުން ފަތުރުވެރިން އައުން އޮތީ އެއްކޮށް މަޑުޖެހިފައެވެ. މީގެ ސަބަބުން 2020 ވަނަ އަހަރު ރާއްޖޭގެ ފަތުރުވެރިކަމަށް އަސަރު ކުރި ނަމަވެސް މިހާރު ފަތުރުވެރިކަމުގެ ދާއިރާ ވަނީ ވަރަށް ބޮޑަށް ރަނގަޅުވެފައެވެ.

ޓޫރިޒަމް މިނިސްޓްރީގެ އަމާޒަކީ މިއަހަރު 1.6 މިލިއަން ފަތުރުވެރިން ރާއްޖެ ގެނައުމެވެ. އެ އަމާޒަށް ވާސިލްވުމަށް މިއަހަރުގެ ބާކީ އޮތް ދެ މަސް ދުވަހުގެ ތެރޭގައި 282،427 އެއްހާ ފަތުރުވެރިން ރާއްޖެ އަށް ޒިޔާރަތް ކުރަން ޖެހޭނެއެވެ. އެއީ އެވްރެޖުކޮށް ދުވާލަކު 4،300 އެއްހާ ފަތުރުވެރިންނެވެ.

ކުރިއަށް އޮތީ ފަތުރުވެރިކަމުގެ ޕީކް ސީޒަނަށްވާއިރު ރާއްޖެއަށް އަންނަ ފަތުރުވެރިންގެ އަދަދު މިހާރަށްވުރެ އިތުރުވާނެ ކަމަށް ވަނީ ލަފާކޮށްފައެވެ. ޕީކް ސީޒަނާ ދިމާކޮށް އެކި ޤައުމުތަކުގައި ރާއްޖެއަށް އޮތް ޑިމާންޑު އިތުރުވެ، އެއާލައިންތަކުން އަންނަނީ ރާއްޖެއަށް ކުރާ ދަތުރުތަކުގައި ބޭނުން ކުރާ މަތިންދާ ބޯޓުތަކުގެ ސައިޒް ބޮޑުކޮށް ދަތުރުތައް ވެސް އިތުރު ކުރަމުންނެވެ.