ޕަބްލިކް ފައިނޭންސް ރަނގަޅުކުރުމަށް ފިޔަވަޅު އަޅަންޖެހޭ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ޓެކްސް ބޮޑުކުރުމަށް ހުށަހަޅާފައިވާ ބިލާއި ގުޅޭގޮތުން ބުދަ ދުވަހުގެ ރައްޔިތުންގެ މަޖިލީހުގެ މުޅި މަޖިލީހުގެ ޖަލްސާގައި ވާހަކަ ދައްކަވަމުން މިނިސްޓަރ އަމީރު ވިދާޅުވީ ޓެކްސް ބޮޑުކުރަމަކީ ކޮންމެ ގައުމެއްގައި ވެސް ކޮންޓްރޮވާޝަލް (ނުވަތަ އެކަމާ ދެކޮޅަށް އަބަދުވެސް ބަޔަކު ތެދުވާ) ކަމެއް ކަމަށެވެ. އަދި ޓެކްސް އިތުރުކުރުމަކީ ރައްޔިތުން އަދި ވިޔަފާރި ކޮމިއުނިޓީ އިން އެދިގެން ކުރެވޭ ކަމަކަށް ނުވާނެ ކަމަށެވެ. މިނިސްޓަރ ވިދާޅުވީ ކޮވިޑްގެ ތެރޭގައި ދައުލަތުގެ ޕަބްލިކް ފައިނޭންސަށް ވަރަށް ބޮޑު ހިޓެއް ސަރުކާރުން ނެގި ކަމަށެވެ. ގެސްޓްހައުސްގެ ބޭފުޅުންނާއި، މަޓީގެ ބޭފުޅުންނާއި ފަތުރުވެރިކަމުގެ ދާއިރާ ތަމްސީލްކުރާ ހުރިހާ ފަރާތްތަކާއި، ޓެކްސް ބޮޑުކުރުމުގެ މައްސަލައިގައި ބައްދަލުކޮށް މަޝްވަރާ ކުރެއްވި ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ އެ ބައްދަލުވުމުގައި ޓެކްސް ބޮޑުކުރަނީ ކިހިނެއް ވެގެންތޯ ސާފުކޮށް ކިޔައިދެއްވި ކަމަށެވެ. މިނިސްޓަރ ވިދާޅުވީ ކޮވިޑާއި އެއްކޮށް ގާތްގަނޑަކަށް ޕޮޓެންޝިއަލް އާމްދަނީ އާއި އަދި 2020 އަދި 2021 ގައި ގައުމީ އުފެއްދުންތެރިކަމުން ގެއްލުނު އާމްދަނީ އާއި ޕަބްލިކް ފައިނޭންސަށް ސަރުކާރަށް ލިބެންހުރި އާމްދަނީގެ ވަރަށް ބޮޑުތަނުން މަދުވި ކަމަށެވެ. ގާތްގަނޑަކަށް ޖީޑީޕީގެ 98 ބިލިއަން ރުފިޔާ ގެއްލިފައި ހުންނާނެ ކަމަށާއި، ޕަބްލިކް ފައިނޭންސަށް 36 ބިލިއަން ރުފިޔާ ގެއްލިފައި ހުންނާނެ ކަމަށެވެ.

އެއާއެކު ވެސް ޒިންމާދާރު ސަރުކާރެއްގެ ގޮތުގައި ކައުންޓަރ ސައިކްލިކަލް ޕޮލިސީއެއްގެ ދަށުން އެޅި ފިޔަވަޅުތަކުގެ ސަބަބުން ވިޔަފާރިތައް ރަނގަޅުވަމުން އަންނަކަމަށް މިނިސްޓަރ ވިދާޅުވިއެވެ. އިގްތިސާދު ކުރިއެރުމަށް ފުރުސަތު ލިބުނު ކަމަށެވެ. 2020 ގައި އިގްތިސާދު، 33.5 އިންސައްތަ ދަށަށް ދިޔަ ކަމަށާއި، 2021 ގައި އިގްތިސާދު ސީދާ ވެ ޝޭޕްޑްވި ކަމަށެވެ. އަދި 41.6 އިންސައްތަ ކުރި އެރި އިރު 2022 ވަނަ އަހަރު 13 އިންސައްތަ ކުރި އަރާނެ ކަމަށެވެ.

މިނިސްޓަރ ވިދާޅުވީ ޖީއެސްޓީ އާއި ޓީޖީއެސްޓީ ބޮޑުކުރަން ހުށަހަޅަނީ، ކުރިން ބޭއްވި ބައްދަލުވުމުގައި ބައިވެރިވި ގިނަ ބޭފުޅުން ގަބޫލުކުރެއްވުމުން ކަމަށާއި، އެ ބައްދަލުވުމުގައި ބައެއް ބޭފުޅުން 6 މަސް އަދި އަނެއް ބޭފުޅުން 1 އަހަރު ވެސް ރަނގަޅުކަމަށް ވިދާޅުވަމުން ގެންދެވި ކަމަށެވެ.

އެއިރު ވާހަކަ ދެއްކީ މިއަހަރުގެ ޖޫންގައި އެކަންކުރަން ކަމަށާއި، މަޖިލީހަށް ބިލް ފޮނުވީ ވެސް އޮގަސްޓް މަހުގައި ކަމަށެވެ. މިހާރު ނޮވެމްބަރު މަހާ ހަމައަށް އާދެވިއްޖެ ކަމަށާއި، އެކަމަށް ބޭނުންވާ ވަގުތުވެސް ދެވިއްޖެ ކަމަށް މިނިސްޓަރ ވިދާޅުވިއެވެ. އަދި މީގެ އެންމެ ރަނގަޅު ގޮތަކީ ވީހާވެސް އަވަހަކަށް އެކަން ކުރެއްވުން ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރާއްޖޭގެ ކޮންޓްރޯލްގައި އޮތް އެއްޗެއް ބޭނުންކޮށްގެން އެތެރޭގެ ހުރިއެއްޗެއް ބޭނުންކޮށްގެން މަސައްކަތް ކުރަންޖެހޭ ކަމަށެވެ.