މަޖީދިއްޔާ ސްކޫލުގެ 95 އަހަރުގެ ދިގު ތާރީޚުގައި އެ ސްކޫލަށް އެކިގޮތްގޮތުން ޚިދުމަތް ކުރެއްވި ފަރާތްތަކުގެ އަގުވަޒަންކޮށްފިއެވެ.
މަޖީދިއްޔާ ސްކޫލްގެ 95 ވަނަ އަހަރީ ދުވަހާއި ގުޅިގެން ބޭއްވި ޚާއްސަ ރަސްމިއްޔާތުގައި ވަނީ އެ ސްކޫލަށް 25 އަހަރަށްވުރެ ގިނަ މުއްދަތަކަށް ޚިދުމަތް ކުރެއްވި ބޭފުޅުންނަށް ޚިދުމަތުގެ ޝަރަފު އަރުވާފައެވެ. މިގޮތުން 6 ބޭފުޅަކަށް ވަނީ މި ޝަރަފު އަރުވާފައެވެ.
އެ ފަރާތްތަކުގެ ޚިދުމަތުގެ އަގުވަޒަންކުރުމުގެ ގޮތުން ޚިދުމަތުގެ ޝަރަފުގެ ފިލާ ދެއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙެވެ.
މަޖީދީއްޔާ ސްކޫލަށް އެކިގޮތްގޮތުން 25 އަހަރަށްވުރެ ދިގު މުއްދަތަކަށް ޚިދުމަތްކުރެއްވުމުގެ ޝަރަފު އަރުވާފައިވަނީ އަލްއުސްތާޛް މުޙައްމަދު ވަޙީދު ނަޖީބްއާއި، އިސްމާޢީލް ޢަލީއާއި، އަލްއުސްތާޛާ މަރިޔަމް ޤާސިމްއާއި، އައްޝައިޚް ޢަބްދުﷲ ނަސީމް މުޙައްމަދުއާއި، މުޙައްމަދު ޢަބްދުﷲ ސަޢީދުގެ އިތުރުން ޝިރުމީނާ ޢަބްދުﷲއަށެވެ.
ރަސްމިއްޔާތުގައިވަނީ ސްކޫލަށް 20 އަހަރަށްވުރެ ދިގުމުއްދަތަކަށް ޚިދުމަތްކުރެއްވި ބޭފުޅުންނަށްވެސް ޚިދުމަތުގެ ޝަރަފު ދެއްވާފައިވެއެވެ. މިގޮތުން 14 ބޭފުޅަކަށް މިޝަރަފުވަނީ ދެއްވާފައިވެއެވެ. މިބޭފުޅުންނަށް ޚިދުމަތުގެ ޝަރަފު ދެއްވީ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދެވެ. އަދި އެ ސްކޫލަށް މިވޭތުވެދިޔަ މުއްދަތުގައި އެކި ގޮތްގޮތުން ޚިދުމަތްކޮށްދެއްވި ކުންފުނިތަކަށްވެސްވަނީ ހަނދާނީ ފިލާ ދެއްވާފައެވެ. މިގޮތުން 14 ކުންފުންޏަކަށްވަނީ މި ހަނދާނީ ފިލާ ވަނީ ދެއްވާފައެވެ.
މީގެ އިތުރުން މަޖީދިއްޔާ ސްކޫލަށް އެކިގޮތްގޮތުން އެހީތެރިވެދިން 10 ފަރާތަށް އެޑިއުކޭޝަން މިނިސްޓަރ ޑރ. ޢައިޝަތު ޢަލީ ވަނީ ހަނދާނީ ފިލާ ދެއްވާފައެވެ.
ރަސްމިއްޔާތުގައިވަނީ ކޮފީ ބުކް އަދި ދާރުލްޢުލޫމްގެ މޮޑެލް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެދުމަށް އަރުވާފައެވެ. އަދި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދަށާއި ރައީސުލްޖުމްހޫރިއްޔާގެ ނައިބު ފައިސަލް ނަސީމްއަށާއި މިނިސްޓަރ އޮފް އެޑިއުކޭޝަން ޑރ.ޢައިޝަތު ޢަލީއަށް އެސްކޫލްގެ ދަރިވަރުން ތައްޔާރުކޮށްފައިވާ ކުރެހުންތަކެއްވަނީ ވެދުމަށް އަރުވާފައެވެ.
