އިރެއްގެ އިސްތިއުމާރީ ބާރުގެ ފަސްގަނޑުގައި ލިބުނު ފަޚުރާއެކު އިންޑިއާގެ ގިރުވާނު ކޮޅަށް!

ސިޔާސީ މަސްރަހު އިންތިހާއަށް ނުތަނަވަސްވެ، ހަލަބޮލިވެފައި ވާ އިނގިރޭސިވިލާތުގެ ބޮޑުވަޒީރު ކަމުގެ މަޤާމަށް، އެ ޤައުމުގެ އިންޑިއާ ދަރިކޮޅަށް ނިސްބަތްވާ ރިޝީ ސުނާކު ޢައްޔަން ކުރެވުމާއެކު، އިންޑިއާއިން ފަޚްރުވެރިކަމާއެކު އުފާ ފާޅު ކުރަން ފަށައިފިއެވެ.

ސުނާކުއަކީ އިނގިރޭސިވިލާތުގެ ބޮޑުވަޒީރު ކަމުގެ މަޤާމަށް އައްޔަން ކުރެއްވުނު، އޭޝިއާ ނަސްލުގެ ފުރަތަމަ ޝަހްސުވެސްމެއެވެ.

އިނގިރޭސިވިލާތުގެ ބޮޑުވަޒީރު ކަމުގެ މަޤާމަށް ސުނާކު ޢައްޔަން ކުރެވުނީ، އެ މަޤާމުގައި ހުންނެވި ލިޒް ޓްރަސް މަޤާމުން އިސްތިއުފާ ދެއްވާފައި ވަނިކޮށް، ކޮންޒަވޭޓިވް ޕާޓީގެ ލީޑަރު ކަމުގެ މަޤާމަށް ވާދަ ކުރުމަށް އޮތް ރޭހުން، ކުރީގެ ބޮޑުވަޒީރު ބޮރިސް ޖޯންސަންއާއި، ވާދަވެރި ޕެނީ މޯޑޯންޓްވެސް ވަކިވެވަޑައިގެންނެވުމުންނެވެ.

ލިޒް ޓްރަސް، ބޮޑުވަޒީރު ކަމުގެ މަޤާމުން އިސްތިޢުފާ ދެއްވީ އެންމެ ދޮޅު މަހެއްހާ ދުވަހަށް ފަހުގައެވެ. އެއީ އޭނާއަށް އޮތް ތާޢީދު އާތްވަތަށްވެ، ވައިގެ ތެރެއަށް އަރައިގެން ދިޔަ ހިސާބުން ކަމުގައިވެސް ސިފަ ކުރެވިދާނެއެވެ.

ހިންދޫ ދީނަށް ނިސްބަތްވާ ސުނާކު ވަނީ، ބޮޑުވަޒީރު ކަމުގައި އޭނާގެ ރަސްމީ ގެކޮޅު ކަމަށް ވާ 11 ޑައުނިންގް ސްޓްރީޓްގައި ހިންދޫ ދީނުގެ ޝިޢާރު ފާޅުކުރުމަށް ދިވާލީ ހަރަކާތް ހިންގާފައެވެ.

އިނގިރޭސިވިލާތުގެ ދާހިލީ މަސްރަހުގެ އިތުރުން މުޅި ދުނިޔެގެ ސަލާމަތަށް ކުރިމަތި ވެފައި ވާ 1 ނަމްބަރު ނުރައްކަލަކީ ޗައިނާ ކަމަށާ، މަގާމު ކަށަވަރު ކުރެއްވިއްޖެ ކަމުގައި ވަނީ ނަމަ، ޗައިނާއާ މެދު ގެންގުޅުއްވާނީ ހަރުކަށި އުސޫލެއް ކަމަށް، އިނގިރޭސިވިލާތުގެ ކުރީގެ ޗާންސެލަރުކަންވެސް ކުރައްވާފައިވާ ސުނާކު ވަނީ މީގެ ކުރިން ވިދާޅުވެފައެވެ. ޗައިނާއާ މެދު ހަރުކަށި އުސޫލެއް ގެންގުޅުއްވާނެ ކަމަށް ސުނާކު ވައުދުވެވަޑައިގެންފައި ވަނީ ޗައިނާއާއި ރަޝިއާގެ ކަންކަމުގައި ސުނާކުއަކީ ބަލިކަށި ބޭފުޅެއް ކަމަށް ވިދާޅުވެ، ލިޒް ޓްރަސް އަމާޒު ކުރެއްވި ބަހުގެ ހަމަލާގެ ރައްދުގައެވެ.

ކަން މިހެން އޮތް އިރު ޗައިނާގެ ދައުލަތުން ހިންގާ ގްލޯބަލް ޓައިމްސްއިން ވަނީ، އިނގިރޭސި ބޮޑުވަޒީރު ކަމަށް ވާދަ ކުރައްވަމުން ގެންދެވި ކެންޑިޑޭޓުންގެ ތެރޭގައި، އިނގިރޭސިވިލާތާއި ޗައިނާގެ ގުޅުން ތަރައްޤީ ކުރުމުގައި ސާފު އަދި އަމަލީ ގޮތުން ހާސިލު ކުރެވޭ ފަދަ ތަސައްވުރެ ގެންގުޅުއްވާ ހަމައެކަނި ބޭފުޅަކީ ސުނާކު ކަމަށް ސިފަ ކޮށްފައެވެ.

ޗައިނާއާ ދެކޮޅަށް ހަރުކަށި ފިކުރެއް ގެންގުޅުއްވާ ސުނާކު ވަނީ، އިނގިރޭސިވިލާތުގެ ޔުނިވާސިޓީތަކުން ޗައިނާގެ ވެރިކަން ކުރާ ކޮމިއުނިސްޓް ޕާޓީ ބޭރު ކުރައްވާނެ ކަމަށްވެސް ވައުދުވެވަޑައިގެންފައެވެ. އެ ކަން މާނަ ކުރައްވާފައި ވަނީ، ދިރާސާތަކަށް ފަންޑު ކުރުމުގެ މާނާގައި ކަމަށް މައުލޫމާތު ލިބެއެވެ. މީގެ އިތުރުން އިނގިރޭސިވިލާތުގެ ޖާސޫސީ އިދާރާއިންވެސް ޗައިނާއާ ދެކޮޅަށް މަސައްކަތް ވަރުގަދަ ކުރާނެ ކަމަށާ، ޗައިނާއާ ކުރިމަތިލުމަށް ނޭޓޯ ފަދަ އަސްކަރީ އިއްތިހާދެއް އެކުލަވާލައްވާނެ ކަމަށްވެސް ސުނާކު ވަނީ ވިދާޅުވެފައެވެ.

ސުނާކު، އިނގިރޭސި ގާނޫނު ހަދާ މަޖިލީހުން އެންމެ ފުރަތަމަ ޖާގައެއް ކަށަވަރު ކުރެއްވީ 2015 ވަނަ އަހަރުއެވެ. ސުނާކުއަކީ މި ފަހުގެ ތާރީޚުގައި، އިނގިރޭސި ބޮޑުވަޒީރު ކަމަށް ޢައްޔަން ކުރެއްވުނު އެންމެ ހަގު މެންބަރެވެ.