އިނގިރޭސި ޕްރިމިއާ ލީގުގެ އެސްޓަން ވިލާގެ ކޯޗުކަމަށް އުނާއި އެމެރީ ހަމަޖައްސައިފިއެވެ.

އެ މަގާމަށް އޭނާ ހަމަޖެއްސިއިރު އޭނާ ހުރީ ސްޕެއިންގެ ވިލަރެއާލްގެ ކޯޗުކަމުގައެވެ. އެމެރީ ވަނީ މި ސީޒަނަށްފަހު ވިލަރެއާލް ދޫކޮށްލަން ނިންމާފައެވެ. ނަމަވެސް އެސްޓަން ވިލާ އިން ވަނީ ހަ މިލިއަން ޔޫރޯ ދެއްކުމަށްފަހު އެމެރީ އެ ކުލަބަށް ގެނެސްފައެވެ. އެސްޓަން ވިލާގެ ކޯޗުކަން ހުސްވީ ދާދި ފަހުން އެ މަގާމުގައި ހުރި ސްޓީވެން ޖެރާޑް ވަކިކުރުމުންނެވެ.

ސްޕެއިންއަށް އުފަން އުމުރުން 50 އަހަރުގެ އެމެރީ އޭނާގެ ކޯޗިން ކެރިއަރު ފެށީ 2004 ވަނަ އަހަރުއެވެ. އޭގެ ފަހުން އޭނާ ވަނީ އެ ކުލަބުތަކަށް އިރުޝާދު ދީފައެވެ. އޭނާ ވަނީ ސްޕެނިޝް ލީގުގެ ވިލަރެއާލް އަދި ސެވިއްޔާ އަށް އިރުޝާދު ދީފައެވެ. އަދި ފްރާންސް ލީގުގެ ގަދަ ބާރު ޕެރިސް ސެއިންޓް ޖާމަން (ޕީއެސްޖީ) އަށް ވަނީ ދެ އަހަރު އިރުޝާދު ދީފައެވެ. ޕީއެސްޖީ ދޫކޮށްލުމަށްފަހު ދެން އޭނާ ވަނީ އާސެނަލާ ހަވާލުވެ އެ ޓީމަށް އެއް އަހަރު އިރުޝާދު ދީފައެވެ.

އެމެރީ ވަނީ އޭނާގެ ކެރިއަރުގައި 11 ތަށި ކާމިޔާބުކޮށްފައެވެ. އޭގެ ތެރޭގައި ސެވިއްޔާއާއެކު ޔުއެފާ ޔޫރޮޕާ ލީގު ޖެހިޖެހިގެން ތިން އަހަރު ހޯދުމާއި، ޕީއެސްޖީއާއެކު ފްރާންސް ލީގު، ފްރާންސް ކަޕް ދެ ފަހަރު، ކަޕް ލީގު ދެ ފަހަރު، ޓްރޮފީ ޑީ ޗެމްޕިއަންސް ދެ ފަހަރު ހޯދުމާއި، ވިލަރެއާލާއެކު ޔޫރޮޕާ ލީގު ކާމިޔާބުކުރުން ހިމެނެއެވެ.