ޓެކްސް ބޮޑުކުރުން - ޖީއެސްޓީން 970 މިލިއަން އަދި ޓީޖީއެސްޓީން 2.1 ބިލިއަން ރުފިޔާ އިތުރަށް ލިބޭނެ

ޓެކްސް ބޮޑުކުރުމަށް ހުށަހަޅާފައިވާ އިސްލާހާއެކު ޖީއެސްޓީން އިތުރުވާނީ 970 މިލިއަން ރުފިޔާ އަދި ޓީޖީއެސްޓީން އިތުރުވާނީ 2.1 ބިލިއަން ރުފިޔާ ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މިނިސްޓަރ ވިދާޅުވީ ޖީއެސްޓީ އިތުރުކޮށްގެން 970 މިލިއަން ރުފިޔާ އަދި ޓީޖީއެސްޓީ އިތުރުކޮށްގެން 2.1 ބިލިއަން ރުފިޔާ ލިބިގެންދާނެ ކަމަށެވެ. އަދި އަންދާޒާ ކުރަނީ ޖީއެސްޓީއަށް ގެންނަ ބަދަލާއެކު އިންފްލޭޝަނަރީ ޑައިރެކްޓް 1 އިންސައްތަ ކޮންޓްރިބިއުޓްކުރުމަކީ އެކަށީގެންވާކަމެއް ކަމަށެވެ.

މިނިސްޓަރ ވިދާޅުވީ އެއިރަކު އިގްތިސާދީ ގޮތުން އަޅަންޖެހޭ ކޮންމެ ފިޔަވަޅެއް އަޅަންޖެހޭނެ ކަމަށެވެ. ސަރުކާރުން މިހާތަނަށް އަންނަނީ އެގޮތަށް މަސައްކަތް ކުރަމުން ކަމަށާއި، ކޮވިޑާއެކު ކުރަން ޖެހުނު މަސައްކަތް ވެސް ސަރުކާރުން ކައުންޓަރ ސައިކްލިކަލް ފިސްކަލް ޕޮލިސީގެ ތެރެއިން އެ މަސައްކަތްތައް ކުރި ކަމަށެވެ. އެއިރު ސަރުކާރަށް ޖެހުނީ ހަރަދުތައް އިތުރުކޮށް މާކެޓަށް ޕަމްޕުކުރުމަށްޓަކައި މަސައްކަތްތަކެއް ކުރަން ކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރާއްޖެއަށް ބަލާއިރު، ރާއްޖޭގެ އިގްތިސާދު ވަރަށް ބޮޑަށް ކުރިއަރަމުން އަންނަ ކަމަށެވެ. 2021 ވަނަ އަހަރު ރާއްޖޭގެ އިގްތިސާދު 41.6 އިންސައްތަ ކުރިއަރާފައިވާ އިރު، މިއަހަރު 13 އިންސައްތަ ކުރި އަރާނެ ކަމަށް ލަފާކުރެވޭ ކަމަށެވެ. މީގެ އިތުރުން ހަރަދުތައް ވެސް ބޮޑުވަމުންދާ ކަމަށާއި، ރާއްޖޭގެ ގިނަ ރަށްތަކުގައި ބޭސިކް އިންފްރާސްޓްރަކްޗަރ މަސައްކަތްތަކެއް ކުރިއަށް ގެންދަންޖެހޭ ކަމަށެވެ. އެހެންކަމުން އެތެރެއިން އާމްދަނީ ލިބޭނެ ގޮތްތަކެއް ހޯދަން ޖެހޭ ކަމަށާއި، މި ކަންތައްތަކަކީ ދުނިޔޭގެ ޖަމިއްޔާ ޖަމާއަތްތަކުން ވެސް ސަރުކާރަށް ލަފާދީފައިވާ ކަންތައްތައް ކަމަށެވެ.

މިނިސްޓަރ ވިދާޅުވީ ޖީއެސްޓީ އާއި ޓީޖީއެސްޓީ އިތުރުކުރުމަށްޓަކައި ހުށަހެޅި އެއް ސަބަބަކީ، ލިބޭ އާމްދަނީއިން ހަރަދުތައް ހަމަޖެއްސުމަކީ ފިސްކަލް ޕޮލިސީގެ އެއް އަމާޒުކަމުގައިވާތީއެވެ. އަދި މަޖިލީހަށް ހުށަހަޅާފައިވާ ފިސްކަލް ސްޓްރެޓަޖީގައި ވެސް މިކަން ބަޔާންކޮށްފައިވާ ކަމަށާއި، އޭގެ އިތުރުން ވެސް ސަރުކާރުގެ ހަރަދުތައް ކުޑަކުރުމަށްޓަކައި ބައެއް ސިޔާސަތުތައް ގެނައުމަށް ހާމަކޮށްފައިވާނެ ކަމަށެވެ. މިނިސްޓަރ ވިދާޅުވީ ފިސްކަލް ސްޓްރެޓަޖީ ހާސިލްކުރުމަށް ކޮންމެހެން ވެސް ޖީއެސްޓީއާއި ޓީޖީއެސްޓީ ބޮޑުކުރަންޖެހޭ ކަމަށެވެ.

މިނިސްޓަރ ވިދާޅުވީ ސަރުކާރުގެ ހަރަދުތައް ވެސް ވަރަށް ބޮޑަށް ކުޑަކޮށްގެން ކުރިއަށްދާ ކަމަށެވެ. އަދި ފިސްކަލް ސްޓްރެޓަޖީގައި ހަރަދު ކުޑަކުރަން ކުރާ މަސައްކަތްތައް އަދި ކުޑަކުރަން ކުރިއަށް އަޅަން ބޭނުންވާ ކަންތައްތަކެއް ވެސް މަޖިލީހަށް ހުށަހަޅާފައިވާ ކަރުދާހުގައި އޮންނާނެ ކަމަށެވެ.

މިނިސްޓަރ ވިދާޅުވީ ރާއްޖޭގެ ހާލަތު މިހާރު ކުރިއަރަމުންދަނީ އެއިރު ފިސްކަލް މެޝަރތައް ނެގުމުން ކަމަށެވެ. ރާއްޖޭގެ އިގްތިސާދު 2021 ވަނަ އަހަރު 41.6 އިންސައްތައް ކުރިއަރައި، މިއަހަރު ގާތްގަނޑަކަށް 13 އިންސައްތައް އިގްތިސާދު ކުރިއަރާނެ ކަމަށެވެ.

އަދި ޖީއެސްޓީ ޓީޖީއެސްޓީ ބޮޑުކުރުމުގެ އިތުރުން ހަރަދުތައް ކުޑަކުރުމަށް ވެސް މަސައްކަތްތަކެއް ދަނީ ކުރަމުން ކަމަށް މިނިސްޓަރ ވިދާޅުވިއެވެ. 2020 އަދި 2021 ވަނަ އަހަރަށް ބެލިކަމުގައި ވީނަމަވެސް، އަދި 2022 ވަނަ އަހަރަށް ބެލިކަމުގައި ވީނަމަވެސް، ފިނޭންސުން އަޅާފައި ހުރި ފިޔަވަޅުތަކުން ކުރާނެ ގިނަ ހަރަދުތައް ވާނީ ކުޑަކުރެވިފައި ކަމަށާއި، ޓެކްސް ބޮޑުކުރުމަކީ މިހާރު ކޮންމެހެން ކުރަންޖެހޭ ކަމެއް ކަމަށް މިނިސްޓަރ ވިދާޅުވިއެވެ.