ޔާމީން މަރާލުމުގައި ބައިވެރިވިކަމަށް ތުހުމަތުކުރާ ތިން މީހެއްގެ ބަންދަށް 15 ދުވަސް އިތުރުކޮށްފި
މި 3 މީހުންނަކީ ހަމަލާ ދިނުމުގައި އަމަލީ ގޮތުން ބައިވެރިވި މީހުން
ފުލުހުން އާންމުކޯށްފައިވާ ފޮޓޯތައް
ބްލޮގަރ ޔާމީން ރަޝީދު ލާއިންސާނީ ގޮތަކަށް އަނިޔާކޮށް ތޫނު އެއްޗަކުން ހަމަލާދީ މަރާލުމުގައި އަމަލީ ގޮތުން ބައިވެރިވި ކަމަށް ތުހުމަތު ކުރެވޭ ތިން މީހުންގެ ބަންދުގެ މުއްދަތު 15 ދުވަހަށް އިތުރުކޮށްފި އެވެ.
ފުލުހުން ބުނީ އެ ތިން މީހުންގެ ބަންދުގެ މުއްދަތު އިތުރުކުރީ ބުރާސްފަތި ދުވަހު ކަމަށެވެ. ނަމަވެސް އެމީހުންގެ ބަންދުގެ މުއްދަތު އިތުރުކޮށްފަ މިވަނީ ކިތައް ވަނަ ފަހަރުކަމެއް ފުލުހުން ހާމައެއް ނުކުރެވެއެވެ.
މި މަހުގެ 18 ވަނަ ދުވަހުގެރޭ ފުލުހުން ނެރެފައިވާ ބަޔާނެއްގައި އެތިން މީހުންގެ ފޮޓޯއާއި މައުލޫމާތު ވަނީ އާއްމުކޮށްފަ އެވ. މި މައްސަލައިގައި ހައްޔަރުކޮށްފައިވާ 7 މީހުންގެ ތެރެއިން، އިސްމާއިލް ރަޝީދު (25 އަހަރު، ކ. މާލެ / މ. ޠާއިފް) އާއި، އިސްމާއިލް ހައިޝަމް ރަޝީދު (21 އަހަރު، ކ. މާލެ / ހ. އަންނާރުމާގެ)، ގެ އިތުރުން، އަޙުމަދު ޒިހާން އިސްމާއިލް (22 އަހަރު، ކ. މާލެ / މ. އިރާސްމިކުގެ) ގެ ފޮޓޯ އާއްމުކޮށް ފުލުހުން ބުނީ އެ ތިން މީހުން ޔާމީން މަރާލުމުގައި އަމަލީ ގޮތުން ބައިވެރިވެފައިވާ ކަމަށް ތުހުމަތު ކުރެވޭ މީހުން ކަމަށެވެ.
ފުލުހުން ބުނީ މި ތިން މީހުންގެ ތެރެއިން ދެ މީހުންނަކީ ކުށުގެ ރިކޯޑް އޮތް މީހުން ކަމަށާ، އެގޮތުން، އިސްމާއިލް ހައިޝަމް ރަޝީދަކީ ހަތިޔާރު ބޭނުންކޮށްގެން ފޭރުމުގެ ރިކޯޑް އޮންނަ މީހެއް ކަމަށާ، ފޭރުމުގެ މައްސަލައެއްގައި އޭނާ ޙުކުމްވެސް ތަންފީޒުކޮށްފައިވާ ކަމަށެވެ. އަދި އިސްމާއިލް ރަޝީދަކީ، ގްރޫޕް ހަދައިގެން، ހަތިޔާރު ބޭނުންކޮށްގެން މާރާމާރީ ހިންގުމުގެ ރިކޯޑް އޮތް މީހެއް ކަމަށެވެ.
އެގޮތުން ކުރެވުނު މަސައްކަތުގައި މާލޭގެ އެކި ތަންތަނުން ނެގުނު ސީސީޓީވީ ފުޓޭޖާއި، މާލޭގައި ހަރުކޮށްފައިވާ ފުލުހުންގެ ސީސީޓީވީ ހުރިހާ ކެމެރާތަކުގެ ފުޓޭޖްތައް ހިމެނޭގޮތަށް، ޖުމްލަ 1850 ގަޑިއިރަށްވުރެ ގިނަ ވަގުތުގެ ސީސީޓީވީ ފުޓޭޖް އެނަލައިޒްކޮށް، ބަލާފައިވާކަން ފުލުހުން ވަނީ ހާމަކޮށްފައެވެ. އަދި ހަމައެއާއިއެކު 20 އަހަރާއި 40 އަހަރާއި ދެމެދުގެ 40،000 އަށްވުރެ ގިނަ މީހުންގެ ފޮޓޯތައް ބަލައި އެނަލައިޒް ކޮށްފައިވާކަންވެސް ފުލުހުން ވަނީ ފާހަގަކޮށްފައެވެ.
މީގެ އިތުރުން ތަހުގީގުގައި ކަމާއިގުޅޭ މާހިރުންގެ ލަފާ ހޯދައި، ސަރުކާރުގެ އެކި އިދާރާތަކުގެ އެހީތެރިކަމާއިއެކު އެފަރާތްތަކުގެ ޑޭޓާބޭސްތަކުގައިވާ މަޢުލޫމާތު މި މައްސަލައިގެ ތަހުގީގަށް ހޯދިފައިވާ ކަމަށްވެސް ފުލުހުން ވަނީ ބުނެފައެވެ.
ފުލުހުން ބުނީ މި މައްސަލައާއި ގުޅިގެން، މިކަމުގައި އިސްކޮށް ތިބި މީހުން ދެނެގަނެވި، މިކަމުގެ ތަހުގީގު މިހާރު ކުރަމުންދާ ކަމަށެވެ.
