ޗާގޮސް އައިލެންޑްސް ނުވަތަ ފޯޅަވަހީގެ މައްސަލާގައި ސުލްހަވެރި ހައްލަކަށް އެދިވަޑައިގެން، އިންޓަރނޭޝަނަލް ޓްރައިބިއުނަލް ފޮރ ދަ ސީ (އިޓްލޮސް)ގައި އެޓަރނީ ޖެނެރަލް އިބްރާހީމް ރިފްއަތު ވާހަކަފުޅުދައްކަވައިފިއެވެ.
މޮރިޝަޝްގެ ފަރާތުން، ދިވެހިރާއްޖެއާ ޗާގޮސްއާ ދެމެދު އޮތް ކަނޑުގެ ސަރަހައްދުގެ ތެރެއިން ފުށުއަރާ ސަރަހައްދާ ގުޅޭގޮތުން އިންޓަރނޭޝަނަލް ޓްރައިބިއުނަލް ފޮރ ދަ ސީ (އިޓްލޮސް)އަށް، ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީ މުއާހަދާގެ ދަށުން 2019 ވަނަ އަހަރު މައްސަލަ ހުށަހަޅާފައިވެއެވެ.
އެ މައްސަލާގައި ޓްރައިބިއުނަލުން މީގެކުރިން ނިންމާވަނީ، ޗާގޮސްގެ މައްޗަށް ސިޔާދަތީ ބާރުތައް އޮތްކަމަށް އިނގިރޭސިވިލާތުން ބުނަމުން ގެންދިޔަނަމަވެސް، ކަނޑުގެ ސަރަހައްދުގެ ބައުންޑަރީ ކަނޑައެޅުމުގެ އިޚްތިސާސް އެ ޓްރައިބިއުނަލަށް ލިބިގެންވާކަމަށެވެ. އެހެންކަމުން މައުޟޫއީގޮތުން އެ މައްސަލަ އިޓްލޮސްގައި ކުރިއަށް ގެންދެވޭނެކަމަށް ވަނީ ކަނޑައަޅާފައެވެ.
ޓްރައިބިއުނަލްގެ ނިންމުމާގުޅިގެން 25 މޭ 2021ގައި މޮރިޝަސްގެ ފަރާތުން ހުށަހެޅި ހުށަހެޅުމަށް ރާއްޖެއިން ވަނީ 25 ނޮވެމްބަރު 2021ގައި ޖަވާބު ހުށަހަޅާފައެވެ. މިހާރު ކުރިއަށްދަނީ މައްސަލާގައި އަނގަބަހުން ޖަވާބު ދިނުމުގެ އަޑުއެހުންތަކެވެ.
މި މައްސަލާގައި ރާއްޖޭގެ ފަރާތުން ޖަވާބު ހުށަހަޅާފައިވަނީ ކަމާގުޅޭ ސަރުކާރުގެ އިދާރާތަކުން މައުލޫމާތު ހޯދައި، ވަޒީރުންގެ މަޖިލީހުގައި މަޝްވަރާކުރެވިގެންނެވެ. އަދި ދައުލަތުގެ އެންމެ މަތީ މަސްލަހަތު ހިމާޔަތްކުރުމަށް އިސްކަންދީގެންނެވެ.
މި މައްސަލައަކީ ރާއްޖެފަދަ މަސްވެރިކަމަށް ބަރޯސަވާ ގައުމަކަށް މުހިންމު މައްސަލައަކަށްވާއިރު، މި މައްސަލައިގައި ބައިނަލްއަގުވާމީ ހަމަތަކުގެ މަތިން، ޓްރައިބިއުނަލްގައި ރާއްޖޭގެ މަސްލަހަތުތައް ދިފާއުކޮށް ރާއްޖެ ތަމްސީލްކުރުމަށްޓަކައި މި ދާއިރާއިން ފާހަގަކޮށްލެވޭ ތައުލީމާއި ތަޖުރިބާހުރި ބައިނަލްއަގުވާމީ ވަކީލުންނާއި ހައިޑްރޯގްރަފީ އަދި ޖިއޮލޮޖީ ދާއިރާގެ މީހުންގެ ޓީމެއް ވަނީ އެކުލަވާލާފައެވެ.
މި މައްސަލާގައި މައުޟޫއީ ގޮތުން ބަލައި، މުއާހަދާގައި ބަޔާންކޮށްފައިވާ އުސޫލުތަކާ އެއްގޮތަށް، ފުށުއަރާ ކަނޑުގެ ސަރަހައްދުތަކުގެ ބައުންޑްރީ ޓްރައިބިއުނަލްއިން ކަނޑައަޅާނެއެވެ.
ޗާގޮސްގެ ސިޔާދަތާގުޅޭ މައްސަލައަކީ މީގެ އެތައް އަހަރުތަކެއް ކުރިން އިނގިރޭސިވިލާތާއި މޮރިޝަސްއާ ދެމެދު އުފެދިފައިވާ، އެހެންނަމަވެސް ހައްލު ނުކުރެވި އޮތް މައްސަލައެކެވެ.
