ބޮޑުތަކުރުފާނު މަގުން ސްޓެލްކޯއާ ދިމާއިން ބިމުގެ އަޑިން ފަޅައިގެން ގޮސްފައި އޮތް ހޮޅީގެ މައްސަލަ ހައްލުކުރުމުގެ މަސައްކަތް ފަށާފައިވާ ކަމަށް ސްޓެލްކޯއިން ބުނެފިއެވެ.
މާލޭގެ ބޮޑުތަކުރުފާނު މަގުގައި ތާރުގަނޑުގެ އަޑީގައި އަޅާފައިވާ ފެން ހޮޅިއަކީ ސްޓެލްކޯއަށް ބޭނުންވާ ލޮނު ފެން ނެގުމަށް އަޅާފައިވާ ހޮޅިއެކެވެ.
ރާއްޖެއެމްވީއަށް މައުލޫމާތުދެއްވަމުން ސްޓެލްކޯގެ މީޑިއާ އޮފިޝަލް ވިދާޅުވީ މަސައްކަތް ކުރަންޖެހޭނީ ތާރުގަނޑު ނަގައިގެން ކަމަށާއި ތާރުގަނޑު ތަޅާލުމުގެ މަސައްކަތް މިހާރު ފަށާފައިވާ ކަމަށެވެ. އަދި ތާރުކަނޑާ މެޝިން ލިބޭނީ ބުރާސްފަތި ދުވަހު ކަމަށާއި އެ މެޝިން ލިބުމުން، އެ މަސައްކަތް ވެސް ފަށާނެ ކަމަށް ވިދާޅުވިއެވެ. މި މައްސަލަ ހައްލުކުރުމަށްޓަކަށް ސިޓީ ކައުންސިލުން ދީފައިވަނީ 3 ދުވަހުގެ މުއްދަތެއް ކަމަށެވެ.
ބޮޑުތަކުރުފާނު މަގުން ސްޓެލްކޯގެ ގޭޓް ނަންބަރު 2 އަކާއި ދިމާއިން މަގުގެ ތާރުމަގުގެ މެދުން ފެން އަރަމުންދާކަން އެ ކުންފުންޏަށް ފާހަގަކުރެވުމުން ފެން އަރަމުންދާ ސަބަބު ދިރާސާކޮށް ހޯދައި ބެލިކަމަށް ސްޓެލްކޯ އިން ވަނީ މީގެކުރިން ބުނެފައެވެ.
ސްޓެލްކޯގެ އިންޖީނުތައް ފިނިކުރުމަށް ބޭނުންކުރާ އައުޓްފޯލް ހޮޅިއަކަށް ގެއްލުމެއް ލިބުމުގެ ސަބަބުން ލީކުވާ ފެނެކެވެ. ސްޓެލްކޯއިން ވަނީ މި މައްސަލަ ވީއެންމެ އަވަހަކަށް ހައްލު ނުކުރެވިއްޖެ ނަމަ، މަގު ބޭނުންކުރާ ފަރާތްތަކަށް އެކަމުގެ ދަތި އުނދަގޫތައް ކުރިމަތިވުމުގެ އިތުރުން، މާލެއަށް ކަރަންޓު ދިނުމަށް ބޭނުން ކުރަމުންދާ ބޮޑު ޖަނަރޭޓަރުތަކެއް ނިއްވާލަން ޖެހިދާނެ ކަމަށް ވެސް ބުނެފައެވެ.
