ކ. މާލެ
|
18 އޮކްޓޯބަރ 2022 | އަންގާރަ 16:13
މުޅި މަޖިލީހުގެ ކޮމިޓީ
މުޅި މަޖިލީހުގެ ކޮމިޓީ
ރައްޔިތުންގެ މަޖިލިސް
ޓެކްސް ބޮޑުކުރުމުގެ މައްސަލަ
ކޯރަމް ހަމަނުވެގެން، ޓެކްސް ބޮޑުކުރާ ބިލުގެ މަސައްކަތް ކުރިއަށްނުގެންދެވި، ކޮމިޓީ އެހެން ދުވަހަކަށް ތާވަލުކުރަން ނިންމަވައިފި
 
ޖީއެސްޓީ 8 އިންސައްތަ އަދި ޓީޖީއެސްޓީ 16 އިންސައްތައަށް ބޮޑުކުރުމަށް ހުށަހަޅުއްވާފައިވޭ
 
ބިލުގައި ކަންބޮޑުވާ ކަންކަން އެބަހުރިކަން މެންބަރުން ފާހަގަކުރެއްވި

ކޯރަމް ހަމަނުވެގެން, ޓެކްސް ބޮޑުކުރާ ބިލުގެ މަސައްކަތް ކުރިއަށްނުގެންދެވި، ކޮމިޓީ އެހެން ދުވަހަކަށް ތާވަލުކުރަން ނިންމަވައިފިއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި، މުޅި މަޖިލީހުގެ ކޮމިޓީއެއް އޮންނާނެކަން ހޯމަ ދުވަހުގެ ޖަލްސާގައި ރިޔާސަތުން އިއުލާންކުރައްވައި، ކޮމިޓީތަކުގެ މުގައްރިރުންނަށްވެސް އެކަން އަންގަވާފައިވެއެވެ. ނަމަވެސް 10:00ގައި ބޭއްވުމަށް ނިންމި ކޮމިޓީ ފަށަން ބޭނުންވާ އަދަދު ހަމަނުވެގެން ރިއާސަތުން އިތުރު ވަގުތަށް މަޑުކުރެއްވިއެވެ.

މުޅި މަޖިލީހުގެ ކޮމިޓީގައި ކުރިއަށް ގެންދިޔައީ ސަރުކާރުގެ ފަރާތުން، އިހަވަންދޫ ދާއިރާގެ މެންބަރު މުހައްމަދު ޝިފާއު ހުށަހަޅުއްވާފައިވާ، ގާނޫނު ނަންބަރު 10/2011 (މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނު)އަށް އިސްލާހު ގެނައުމުގެ ބިލުގެ މަސައްކަތެވެ.

މި ބިލާގުޅިގެން ބައެއް މެންބަރުން ވަނީ ކަންބޮޑުވުން ފާޅުކުރައްވާފައެވެ. އެގޮތުން މިހާރު ނަގަން ހުށަހަޅާފައިވާ ރޭޓާއެކު، މުދަލާއި ޚިދުމަތުގެ އަގު ބޮޑުވުމުގެ ސަބަބުން ކާބޯތަކެތީގެ އަގު ބޮޑުވެގެން ދިއުމާއި، ރާއްޖެއަށް އަންނަ ފަތުރުވެރިން މަދުވެދާނެކަން ބައެއް މެންބަރުން ކަންބޮޑުވުން ފާހަގަކުރައްވާފައިވެއެވެ.

މީގެ އިތުރުން ބައެއް މެންބަރުން ވިދާޅުވީ، ބިލާއެކު ދައުލަތަށް 2 ބިލިއަން ރުފިޔާ ހޯދުމަށް މަސައްކަތްކުރަމުން ދާއިރު، މި ބިލުގައި ޓެކްސް ބޮޑުކުރަން ހުށަހަޅާފައިވާ މުއްދަތަކީ މާ އަވަސް މުއްދަތެއް ކަމަށާއި، އެކަމުގެ ސަބަބުން ނުރަނގަޅު ނަތީޖާތަކެއް ނުކުމެދާނެ ކަމަށެވެ.

މަޖިލީހުގެ މުޅި ކޮމިޓީގެ ބައްދަލުވުން ކުރިއަށް ދަނިކޮށް ކޯރަމް ގެއްލިގެން އަނެއްކާވެސް ރިއާސަތުން އެކަން އިއުލާންކުރެއްވިއެވެ. އަދި ވަގުތުކޮޅަކަށް ބެއްލެވުމަށްފަހު، ކޯރަމް ހަމަނުވުމުން އެހެން ދުވަހަކަށް ކޮމިޓީ ބާއްވާނެކަން އިއުލާންކުރައްވައި ކޮމިޓީގެ މަަސައްކަތް ނިންމަވާލެއްވިއެވެ. ކޮމިޓީގެ ކޯރަމަކީ 29 މެންބަރުންނެވެ.

ޓެކްސް ބޮޑުކުރުމަށް ނިންމާފައިވަނީ އަންނަ އަހަރުގެ ޖެނުއަރީ 1 ވަނަ ދުވަހުން ފެށިގެންނެވެ. ގުޑްސް އަދި ސަރވިސް ޓެކްސް (ޖީއެސްޓީ) 8 އިންސައްތައަށް ބޮޑުކޮށް، ޓުއަރިޒަމް ގުޑްސް އެންޑް ސަރވިސް ޓެކްސް (ޖީއެސްޓީ) 16 އިންސައްތައަށް ބޮޑުކުރަން ނިންމާފައިވާކަން ފިނޭންސް މިނިސްޓަރު އިބްރާހީމް އަމީރު ވަނީ މީގެކުރިން ހާމަކުރައްވާފައެވެ. އަމީރު ވިދާޅުވީ، މެދު ރާސްތާގެ ފިސްކަލް ހާލަތު ދެމެހެއްޓިނިވި މިންގަނޑެއްގައި ބެހެއްޓުމަށް ފިސްކަލް އެންކަރތައް ކަނޑައެޅިފައިވާ ކަމަށެވެ. ދުނިޔޭގެ ބަދަލުވެފައިވާ އިގުތިސާދީ އަދި މާލީ ހާލަތާއެކު، މި ފިސްކަލް އެންކަރތައް ދެމެހެއްޓުމަށް ފިޔަވަޅުތައް އަޅަންޖެހޭ ކަމަށާއި، އެގޮތުން އާމްދަނީއާއި ޚަރަދުގެ ފިޔަވަޅުތަކެއް އެޅުމަށް ނިންމާފައިވާކަމަށެވެ.

އާމްދަނީގެ ފިޔަވަޅުތަކުގެ ތެރޭގައި ޓީޖީއެސްޓީ ރޭޓު 16 އިންސައްތައަށް، އަދި ޖީއެސްޓީ ރޭޓު 8 އިންސައްތައަށް ބޮޑުކުރުމަށް ނިންމާފައިވެއެވެ.

އެންމެ ފަހުން އަޕްޑޭޓް ކުރީ: 2 މަސް ކުރިން
ރިވިއު ކުރީ: އައިޝަތު ރިޔާޒް
0%
0%
0%
0%
0%
0%
ކޮމެންޓް