ރައީސްގެ ދެކަނބަލުން އީދު ސަލާމް ކުރެއްވުން އޮންނާނެ:ރައީސް އޮފީސް
އީދު ސަލާންކުރުން އޮންނާނީ ދަރުބާރުގޭގައި
މިދިޔަ އަހަރު ރައީސްގެ ދެކަނބަލުން ބޭއްވި ފިތުރު އީދު ސަލާމްކުރެއްވުމަށް ދިޔަ އާއިލާއެއްގެ ބަޔަކު ރައީސް ޔާމީނާއެކު ސެލްފީއެއް ނަގަނީ
ރައީސް އަބްދުﷲ ޔާމީންގެ ދެކަނބަލުން ފިތުރު އީދު ސަލާންކުރެއްވުން އޮންނާނެ ކަމަށް ރައީސް އޮފީހުން ބުނެފި އެވެ.
ރައީސް އޮފީހުން ބުނި ގޮތުގައި ރައީސްގެ ދެކަނބަލުންގެ އީދު ސަލާމް ކުރެއްވުން އޮންނާނީ ހެނދުނު 9:00 އިން 10:00 އަށް ދަރުބާރުގޭގައި ކަމަށެވެ.
"މި އީދު ސަލާމްކުރެއްވުމުގައި ބައިވެރިވެވަޑައިގެން ދެއްވުމަށް ދިވެހި އެންމެހާ ލޮބުވެތި ރައްޔިތުންނާއި އެކިއެކި ޖަމިއްޔާ ޖަމާއަތްތަކާއި ބޭރުގެ އިއްޒަތްތެރިންނާއި މަންދޫބުންނަށް ރައީސުލްޖުމްހޫރިއްޔާގެ ދެކަނބަލުންގެ ފަރާތްޕުޅުން ދައުވަތު އަރުވަމެވެ،" ރައީސް އޮފީހުގެ ވެބްސައިޓްގައި ބުނެފައިވެ އެވެ.
މި އީދު ސަލާމްކުރެއްވުމުގައި އާއިލާތަކާ އެކު ވީހާ ވެސް ގިނަ ޢަދަދެއްގެ ކުޑަކުދިން ބައިވެރިކުރެއްވުމަކީ އެންމެ ރަނގަޅުކަމެއް ކަމަށާއި، ވީހާ ވެސް ގިނަ ޢަދަދެއްގެ ކުޑަކުދިންނާއި ޒުވާނުން މި ޢީދު ސަލާން ކޮށްލެއްވުމުގައި ބައިވެރިވުމަށް ރައީސުލްޖުމްހޫރިއްޔާގެ ދެކަނބަލުންގެ ފަރާތްޕުޅުން އެދިވަޑައިގަންނަވާ ކަމަށް ވެސް ރައީސް އޮފީހުން ބުނެފައި ވެއެވެ.
ކަލަންޑަރުގައިވާ ގޮތުން ފިތުރު އީދު ދުވަހަކީ އާދީއްތަ ދުވަހެވެ.
