ފަތުރުވެރިކަން ކުރިއަރަމުން އަންނަ ކޮންމެ ދުވަހަކީ އުފާވެރި ދުވަހެއް: އުއްޗު

ފަތުރުވެރިކަން ކުރިއަރަމުން އަންނަ ކޮންމެ ދުވަހަކީވެސް އުފާވެރި ދުވަހެއް ކަމަށް، ޗަމްޕާ މުހައްމަދު މޫސާ (އުއްޗު) ވިދާޅުވެއްޖެއެވެ.

އުއްޗު މިފަދައިން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުމާ ގުޅިގެން ރާއްޖެ ޓީވީން ގެނެސްދިން ރަން 50 ކަވަރޭޖުގައި ބައިވެރިވެވަޑައިގެން ވާހަކަދައްކަވަމުންނެވެ.

Advertisement

އުއްޗު ވިދާޅުވީ، ރާއްޖޭގެ ފަތުރުވެރިކަން މިހާރު މިއޮތް ހިސާބަށް އައިސްފައިވަނީ ގިނަ ގޮންޖެހުންތަކަކާއެކުގައި ކަމަށެވެ. ފަތުރުވެރިން ގެނައުމަށް ކުރި މަސައްކަތުން މިހާ ހިސާބަށް އާދެވިފައިވާއިރު، ފަތުރުވެރިކަމަށް ކުރިއެރުން އަންނަ ކޮންމެ ދުވަހަކީ އުފާވެރި ދުވަހެއް ކަމަށާއި، އެއީ އައު ދުވަހެއް ކަމަށް އުއްޗު ވިދާޅުވިއެވެ.

އުއްޗު މިފަދައިން ވިދާޅުވެފައިވާއިރު މިހާރު ރާއްޖެއިން ވަނީ ފަތުރުވެރިކަމުގެ ރޮނގުން ގިނަ ކުރިއެރުންތަކަކާއި، ކާމިޔާބީތަކެއް ހޯދާފައެވެ. މިގޮތުން ދުނިޔޭގެ މަގުބޫލު މަންޒިލްތަކުގެ ތެރޭގައި ރާއްޖެ ވަނީ ހޮވާލެވިފައެވެ. އަދި ވޯރލްޑް ލީޑިންގ ޑެސްޓިނޭޝަންގެ އެވޯޑު ޖެހިޖެހިގެން 2 އަހަރު ރާއްޖެއިން ވަނީ ކާމިޔާބުކޮށްފައެވެ.

އުއްޗު އިތުރަށް ވިދާޅުވީ، ފަތުރުވެރިކަން ކުރިއަރައިދިއުމަށް ވަކި މިންވަރެއް ކަނޑައަޅާފައިނުވާކަމަށެވެ. އަދި ކުރިން މި މަސައްކަތުގައި ހަރަކާތްތެރިވި ފަރާތްތަކުން ފަހުން މި އަންނަ ޖީލާއެކު މަސައްކަތްކުރަމުންދާނެ ކަމަށް އޭނާ ވިދާޅުވިއެވެ.

ދުވަހަކަށްވުރެ ދުވަހެއް ރާއްޖޭގައި ރިސޯޓުތައް އިތުރުވަމުންދާތީ މިކަމާ ގުޅިގެން ކުރެވުނު ސުވާލަށް ޖަވާބުދެއްވަމުން އުއްޗު ވިދާޅުވީ، ރިސޯޓުތައް އުފެދިގެން އަންނަ މިންވަރުގައި ކޮންމެވެސް ވަރެއްގެ ކޮންޓްރޯލެއް އޮންނަންވާނެކަމަށް ގަބޫލުފުޅުކުރައްވާކަމަށެވެ.

ރާއްޖޭގައި މިވަގުތު 164 ރިސޯޓު ހިންގަމުންދާއިރު، މި ރިސޯޓުތަކުގައި 40،053 އެނދު އެބަހުއްޓެވެ. އަދި، 848 ގެސްޓްހައުސްގައި 13،874 އެނދު އެބަހުއްޓެވެ. އަދި ދެ ހޯމްސްޓޭ ހިންގަމުންދާއިރު، އެއީ 10 އެނދުގެ ޖާގައެކެވެ. މީގެ އިތުރުން 155 ސަފާރީގައި 2،908 އެނދު، އަދި 13 ހޮޓަލުގައި 1،616 އެނދު އެބަހުއްޓެވެ.