ލައިބީރިއާއާ ވާދަކުރާ ރަހުމަތްތެރިކަމުގެ ފުޓްބޯޅަ މެޗުގައި މިސްރުގެ ތަރި މުހައްމަދު ސަލާހް ނުކުޅޭނެކަމަށް ޓީމުގެ ކޯޗު ވިކްޓޯރިއާ ބުނެފިއެވެ.
މިއަންނަ ހަފްތާއަށް ތާވަލުކުރެވިފައިވާ މި މެޗުގައި ކުޅުމުގެ ބަދަލުގައި ސަލާހް އެނބުރި ލިވަޕޫލް ޓީމުގެ ފަރިތަކުރުންތަކުގައި ބައިވެރިވާނެކަމަށް ކޯޗު ވިކްޓޯރިއާ ވަނީ ބުނެފައެވެ. ސަލާހް ވަނީ މިސްރުން އެންމެ ފަހުން، މިދިޔަ ހުކުރު ދުވަހު ކުޅުނު ރަހުމަތްތެރިކަމުގެ މެޗުގައި ދެލަނޑު ޖަހާފައެވެ.
ސަލާހްގެ އިތުރުން، އަލެކްސަންޑްރިއާ، މުސްތަފާ މުހައްމަދު އަދި އަހްމަދު ފަތޫހްވެސް މި މެޗަށް މިސްރުގެ ޓީމުގައި ހިމަނާފައެއް ނުވެއެވެ. ލައިބީރިއާއާއި މިސްރު ބައްދަލުކުރާ ރަހުމަތްތެރިކަމުގެ މެޗު އޮންނާނީ އަންގާރަ ދުވަހުއެވެ.
މިއަހަރުގެ ފަހުކޮޅު ގަތަރުގައި އޮންނަ ފީފާ ވޯލްޑް ކަޕަށް މިސްރު ކޮލިފައިއެއްނުވެއެވެ. މިސްރު ވަނީ ޕްލޭ އޮފްގެ ފަހު މެޗުގައި އެފްރިކާގެ ޗެމްޕިއަން ސެނެގާލް އަތުން ބަލިވެފައެވެ. އެހެންކަމުން މިފަހަރުގެ ވޯލްޑް ކަޕްގައި ކުޅުމުގެ ފުރުސަތު ސަލާހްއަށް ވަނީ ގެއްލިފައެވެ. މިއާއެކު ސަލާހްގެ އަމާޒު ހުރީ އިނގިރޭސި ޕްރިމިއަރ ލީގުގައި ތަފާތު ދެއްކުމަށެވެ.
