ބްރެއިން އެންޑް ސްޕައިން ކޮންފަރެންސް ނިންމާލައިފި
23 ސެޕްޓެމްބަރު 2022 | ހުކުރު 02:21މިއަހަރުގެ ކޮންފަރެންސްގައި ވެސް ވާރކްޝޮޕްތަކާއި ލައިވް ސާޖަރީ އަދި ޕެނަލް ޑިސްކަޝަންތައް ބާއްވާފައިވޭ
ބްރެއިން އެންޑް ސްޕައިން ކޮންފަރެންސް ނިންމާލުން
އޭޑީކޭ އިން އިންތިޒާމް ކޮށްގެން ބޭއްވި "މޯލްޑިވްސް ބްރެއިން އެންޑް ސްޕައިން ކޮންފަރެންސް" ގެ ހަތަރު ވަނަ ކޮންފަރެންސް ނިންމާލައިފިއެވެ.
އޭޑީކޭގެ ނިއުރޯސާޖަރީ ޓީމުން އިންތިޒާމް ކުރާ މި ކޮންފަރެންސްގައި ދުނިޔޭގެ އެކި ގައުމުތަކުގެ ޑޮކްޓަރުންނާއި، ތަޖުރިބާކާރުންނާއި، ޕްރޮފެސަރުން ބައިވެރިވެވަޑައިގެންނެވިއެވެ. އަދި، އެމްއެންޔޫގެ މެޑިސިން ސްކޫލުގެ ދަރިވަރުންނާއި ރާއްޖޭގެ ސިއްހީ ދާއިރާގައި ހަރަކާތްތެރިވާ ޑޮކްޓަރުން ވެސް ބައިވެރިވިވެވަޑައިގެންނެވިއެވެ.
މިއަހަރުގެ ކޮންފަރެންސްގައި ވެސް ވާރކްޝޮޕްތަކާއި ލައިވް ސާޖަރީ އަދި ޕެނަލް ޑިސްކަޝަންތައް ބާއްވާފައިވެއެވެ. އެމެރިކާގެ ފިލަޑެލްފިއާގައި މަސައްކަތްކުރައްވާ ނިއުރޯ ސާޖަރީގެ ޕްރޮފެސަރެއް ކަމަށްވާ ޕްރޮފެސަރު ޕާސްކަލް ޖަބޫރު އަދި ޑރ. ކެނެތު ންވޯސޫ އާއި ޑރ. އަރްވިންދު ނަންދާއާ އެކު ވަނީ އޭޑީކޭގެ ކެތު ލެބު އަދި ހިތުގެ ފަރުވާ ދިނުމަށް ހާއްސަ ބައިގައި ވާރކްޝޮޕްތަކެއް ކުރިއަށް ގެންގޮސްފައެވެ.
ސާޖަރީތަކާއި ސައިންޓިފިކް ދިރާސާތަކުގެ މައްޗަށް ހަދާފައިވާ ދިރާސާތަކާ ގުޅޭ ގޮތުން ގިނަ ސެޝަންތަކެއް ކްރޮސްރޯޑްސްގެ އިވެންޓު ހޯލުގައި ބޭއްވި ކޮންފަރެންސްގައި ކުރިއަށް ގެންގޮސްފައިވެއެވެ. މިއީ ރާއްޖޭގައި ބާއްވާ އެންމެ ބޮޑު ސައިންޓްފިކް ކޮންފަރެންސްކަން ފާހަގަ އޭޑީކޭއިން ވަނީ މީގެ ކުރިން ފާހަގަކޮށްފައެވެ. އަދި އެއީ ލިބުނު ވަރަށް ބޮޑު ކުރިއެރުމެއް ކަމަށް ވެސް ވަނީ ބުނެފައެވެ.
މޯލްޑިވްސް ބްރެއިން އެންޑް ސްޕައިން ކޮންފަރެންސްގެ ފަސްވަނަ ކޮންފަރެންސް ބޭއްވުމަށް ހަމަޖެހިފައިވަނީ 2023 ވަނަ އަހަރު އޮކްޓޯބަރު މަހުގެ 23ން 26ށެވެ.
2018 ވަނަ އަހަރުން ފެށިގެން ބާއްވަމުން އަންނަ އެ ކޮންފަރެންސްގެ މައިގަނޑު މަގްސަދަކީ، ސިކުނޑިއާ މައިބަދައިގެ އެކި ފަރުވާތަކާއި މައިބަދައިގެ އޮޕަރޭޝަންތަކާއި ބެހޭ ގޮތުން ދުނިޔޭގެ ފެންވަރުގައި ކުރެވޭ ދިރާސާތަކުގެ އިތުރުން ޒަމާނީ ގޮތުން ސާޖަރީސްއާ ބެހޭ މައުލޫމާތު ހިއްސާ ކުރުމެވެ.
