އަހަރަކު އެއްފަހަރު ބައި އިލެކްޝަން ބޭއްވުމަކީވެސް ހައްލެއް ނޫން: އިލެކްޝަންސް ކޮމިޝަން
ލޯކަލް ކައުންސިލްތަކުގެ އިންތިޚާބުގެ ގާނޫނަށް ވަނީ އިސްލާހު ހުށަހަޅާފައި
ލޯކަލް ކައުންސިލް އިންތިހާބު 2020
އަހަރަކު އެއް ފަހަރު ބައި އިލެކްޝަން ބޭއްވުމަކީވެސް ހައްލަކަށް ނުވެދާނެ ކަމަށް އިލެކްޝަންސް ކޮމިޝަނުން ބުނެފިއެވެ.
ލޯކަލް ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ ބައި-އިލެކްޝަން އަހަރަކު އެއްފަހަރު ބާއްވަން ލޯކަލް ކައުންސިލްތަކުގެ އިންތިޚާބުގެ ގާނޫނަށް ވަނީ އިސްލާހު ހުށަހަޅާފައެވެ.
މިކަމާއި ގުޅޭގޮތުން ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން އިލެކްޝަންސް ކޮމިޝަންގެ ޑިރެކްޓަރު އިބްރާހިމް ހާފިޒް ވިދާޅުވީ މިގޮތަށް ގާނޫނު އިސްލާހުކުރުމުން މި މަސައްކަތަށް އުފުލަންޖެހޭ ބުރަ ތަންކޮޅެއް ކުޑަވިޔަސް ފަހަރުގައި މިއީ ހައްލަކަށް ނުވެދާނެ ކަމަށެވެ.
އޭނާ ވިދާޅުވީ ރައްޔިތުން ހޮވާ މަގާމުތަކެއްގައި ތިއްބަވާ ބޭފުޅުންތަކެއް މަގާމުން އިސްތިއުފާދެއްވާނަމަ އޭގެ އަސްލު ސަބަބަކީ ކޮބައިތޯ ދެނެގަތުމަށް މަސައްކަތްކުރަންޖެހޭކަމަށް ގަބޫލުފުޅުކުރައްވާކަމަށް ހާފިޒް ވިދާޅުވިއެވެ. މިހާތަނަށް ބެލި ބެލުމުން ބައެއް ރަށްރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ދައުރު ކުޑަކަން ފާހަގަކުރެވުނު ކަމަށް ހާފިޒް ވިދާޅުވިއެވެ.
ލޯކަލް ކައުންސިލްތަކުގެ އިންތިޚާބުގެ ގާނޫނަށް އިސްލާހު ގެނައުމަށް ހުށަހެޅުއްވީ ވެލިދޫ ދާއިރާގެ މެންބަރު މުހައްމަދު އަބްދުﷲ ޝަފީގުއެވެ.
ބިލު ހުށަހަޅާ ސަބަބެއްގެ ގޮތުގައި ބުނެފައިވަނީ ލޯކަލް ކައުންސިލްތަކުގެ އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ހުސްވާ ގޮނޑިއަށް މެންބަރުން އިންތިހާބުކުރުމަށް ބާއްވަންޖެހޭ ބައި-އިލެކްޝަން ބޭއްވުމަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި މިހާރު ކަނޑައަޅާފައިވާ 60 ދުވަހުގެ ބަދަލުގައި، އެ ބައި-އިލެކްޝަންތައް ދެން ބާއްވާނީ، އެއިން ކައުންސިލެއްގެ ނުވަތަ ކޮމިޓީއެއްގެ ގޮނޑި ހުސްވިކަން އަނގާތާ ގިނަވެގެން 365 ދުވަހުގެ ތެރޭގައި ކަމުގައި ކަނޑައެޅުމަށްޓަކައި، ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވޭ އިސްލާހުތަކާ ގުޅިގެން، ލޯކަލް ކައުންސިލްތަކުގެ އިންތިހާބުގެ ގާނޫނަށް ގެންނަން ޖެހޭ އިސްލާހުތައް ގެނައުމެވެ.
