ސެވިއްޔާއިން އެސްޕަންޔޯލް ބަލިކޮށްފި

ސްޕެނިޝް ލީގުގައި އެސްޕަންޔޯލާ ދެކޮޅަށް ކުޅުނު މެޗު ސެވިއްޔާއިން ކާމިޔާބުކޮށްފިއެވެ.

އެސްޕަންޔޯލްގެ ދަނޑުގައި ކުޅުނު ފުޓުބޯޅަ މެޗު ސެވިއްޔާއިން ކާމިޔާބުކުރީ 3-2 އިންނެވެ. މެޗު ފަށައިގެން ފުރަތަމަ މިނެޓުގައި ސެވިއްޔާއިން ވަނީ ލަނޑު ޖަހައި ލީޑު ނަގާފައެވެ. އެ ލަނޑު އެ ޓީމަށް ޖަހައިދިނީ އެރިކް ލެމެލާއެވެ. އޭގެ ފަހުން މެޗުގެ 26 ވަނަ މިނެޓުގައި ޖޮސެފް ކަރްމޯނާ ވަނީ ސެވިއްޔާގެ ދެވަނަ ލަނޑު ޖަހައިފައެވެ. ސެވިއްޔާގެ ތިންވަނަ ލަނޑު ވެސް ޖެހީ ކަރްމޯނާއެވެ. މި ލަނޑު އޭނާ ޖެހީ 45 ވަނަ މިނެޓުގައެވެ.

ފުރަތަމަ ހާފު ނިމުމުގެ ކުރިން އެސްޕަންޔޯލް އިން ވަނީ ލަނޑެއް ޖަހާފައެވެ. ލިބުނު ޕެނަލްޓީއެއްގައި އެ ޓީމަށް ލަނޑު ޖަހައިދިނީ ޖޮސެލޫއެވެ. އިތުރު ލަނޑު ޖެހުމަށް ކުރި މަސައްކަތުގެ ތެރެއިން އެސްޕަންޔޯލްގެ މާޓިން ބްރެތުވެއިތު ވަނީ 62 ވަނަ މިނެޓުގައި ލަނޑެއް ޖަހައި އެސްޕަންޔޯލަށް ފަރަގު ކުޑަކޮށްދީފައެވެ. އެލަނޑުގެ ފަހުން އެސްޕަންޔޯލްއިން އިތުރު ލަނޑު ޖެހުމަށް މަސައްކަތް ކުރި ނަމަވެސް ކާމިޔާބުވާ ގޮތެއް ނުވިއެވެ.

މި ސީޒަންގެ ސްޕެނިޝް ލީގުގައި ސެވިއްޔާ އާއި އެސްޕަންޔޯލް ވެސް އޮތީ އުނދަގޫ ހާލަތެއްގައެވެ. ކުޅުނު ފަސް މެޗުން ދެ ޓީމަށް ވެސް ލިބެނީ ހަތަރު ޕޮއިންޓެވެ. ފައިދާ ގޯލުގެ ތަފާތުން އެސްޕަންޔޯލް 15 ވަނަ މަގާމުގައި އޮތް އިރު، ސެވިއްޔާ އޮތީ 16 ވަނަ މަގާމުގައެވެ.