ވެންޓިލޭޓަރު މައްސަލަ: ދައުވާ ނުކުރާތީ، އަމީންއާއި އިތުރު ބައެއްގެ މައްސަލަ ފައިލްކޮށްފި
20 އޯގަސްޓު 2022 | ހޮނިހިރު 07:44ތަހުގީގު ފުރިހަަމަކުރުމަށް ޕީޖީން އޭސީސީއަށް މައްސަލަ ފޮނުވި
ކުރީގެ ހެލްތު މިނިސްޓަރ އަބްދުﷲ އަމީން
ކޮވިޑް-19އާ ގުޅިގެން ވެންޓިލޭޓަރުތައް ހޯދުމުގައި ކޮރަޕްޝަންގެ އަމަލުތައް ހިންގާފައިވާ މައްސަލައިގައި ކުރީގެ ހެލްތު މިނިސްޓަރ އަބްދުﷲ އަމީން ހިމެނޭހެން އިތުރު ބައެއްގެ މައްސަލަ އެންޓި ކޮރަޕްޝަން ކޮމިޝަން (އޭސީސީ)ން ފައިލްކޮށްފިއެވެ.
ވެންޓިލޭޓަރުތައް ހޯދުމުގައި ކޮރަޕްޝަންގެ އަމަލުތައް ހިންގާފައިވާ މައްސަލައިގައި 11 ފަރާތެއްގެ މައްޗަށް ދައުވާކޮށްދިނުމަށް އެދި އޭސީސީން ޕްރޮސިކިއުޓަރ ޖެނެރަލްގެ އޮފީހަށް ފޮނުވީ 14 އޮކްޓޫބަރު 2020ގައެވެ. އެހެންނަމަވެސް ތަހުގީގު ފުރިހަަމަކުރުމަށް ޕީޖީން އަނެއްކާވެސް މައްސަލަ އޭސީސީއަށް ފޮނުވީއެވެ.
ތަހުގީގު އިތުރަށް ފުރިހަމަކުރުމަށް ޕީޖީ އޮފީހުން އަންގާފައިވާ ކަންކަމާ ގުޅިގެން ބަލަންޖެހޭ ކަންކަން ބެލުމަށްފަހު އަލުން ޕީޖީ އޮފީހަށް ފޮނުވާފައިވަނީ 31 އޮކްޓޫބަރު 2021ގައެވެ. އޭރު އޭސީސީން ބުނެފައިވަނީ 14 އޮކްޓޫބަރު 2020ގައި މައްސަލައިގައި ދައުވާކޮށްދިނުމަށް އެދި ޕީޖީ އޮފީހަށް ފޮނުވާފައިވާ 11 ފަރާތުގެ މައްޗަށް ދައުވާކޮށްދިނުމަށް އެދި ހުށަހަޅާފައިވާ ހުށަހެޅުމާމެދު ކޮމިޝަނުން އޭރު ނިންމާފައިވާ ނިންމުމަށް ބަދަލު ގެނެސްފައި ނުވާނެކަމަށެވެ.
އޭސީސީން ވަނީ މި މައްސަލައިގައި ދައުވާކޮށްދިނުމަށް އެދި ހުށަހަޅާފައިވާ 11 ފަރާތަށް އިތުރު ދައުވާތަކެއް ކޮށްދިނުމަށް އެދިފައެވެ. އެގޮތުން މައްސަލާގައި ތުހުމަތުކުރެވޭ ފަރާތްތަކުގެ މައްޗަށް ގާނޫނު ނަންބަރު: 02/2000 (ކޮރަޕްޝަން ހުއްޓުވުމާއި މަނާ ކުރުމުގެ ގާނޫނު)ގެ 13 ވަނަ މާއްދާގެ ދަށުން، ރައްޔިތުންނަށް ނުވަތަ ދައުލަތަށް ފައިދާއެއް ލިބެންއޮތް ކަމެއްގައި އެނޫންގޮތަކަށް އަމަލުކުރުމުގެ ކުށުގެ ދައުވާކުރުމަށް ވަނީ އެދިފައެވެ.
އެހެންނަމަވެސް ޕީޖީން ވަނީ މި މައްސަލަ އަނބުރާ ފޮނުވާލާފައެވެ.
ރާއްޖެއެމްވީއާ ވާހަކަފުޅުދައްކަވަމުން އޭސީސީގެ މީޑިއާ އޮފިޝަލް ވިދާޅުވީ، ޕީޖީން އެ މައްސަލަ ދައުވާ ނުކޮށް އަނބުރާ ފޮނުވާލާފައިވާތީ އެ މައްސަލަ މިހާރު ފައިލްކޮށްފައިވާކަމަށެވެ. މި މައްސަލައިގެ ތަހުގީގު ކުރިއަށް ގެންގޮސްފައިވަނީ، ކޮމިޝަނާއި ދިވެހި ފުލުހުންގެ ޚިދުމަތާއެކު ޖޮއިންޓް އިންވެސްޓިގޭޝަނެއްގެ ތެރެއިންނެވެ.
ވެންޓިލޭޓަރުތައް ހޯދުމުގައި ހެލްތު މިނިސްޓްރީން ބޮޑެތި އޮޅުވާލުންތަކެއް ހިނގާފައިވާ ކަމަށް ފާހަގަވީ، ކޮވިޑާ ގުޅިގެން ކޮށްފައިވާ ޚަރަދުތައް ރައްޔިތުންގެ މަޖިލީހުގެ އެންގުމަށް، އޮޑިޓަރ ޖެނެރަލްގެ އޮފީހުން ހެދި އޮޑިޓަށް ފަހުއެވެ. ނަމަވެސް ޕީޖީ އޮފީހުން މައްސަލަ އަނބުރާ ފޮނުވާލީ މި މައްސަލައިގައި ތުހުމަތުކުރެވޭ ފަރާތްތަކުގެ މައްޗަށް ޖިނާއީ ދައުވާއެއް ސާބިތުކުރެވޭ މިންވަރަށް ހެކި ހުށައަޅާފައި ނުވާކަމަށް ބަޔާންކޮށެވެ.
