އަޅުގަނޑު ދެކޭގޮތުގައި ރާއްޖެއަށް އަދިވެސް ރަނގަޅުވާނީ ގިނަ ޕާޓީ އެކުލެވޭ ސަރުކާރެއް
ރައީސް ސާލިހު އާއި ރައީސް ނަޝީދު
ސިޔާސީ ކަންކަމުގައި ޒާތީ މަސްލަހަތަށްވުރެ ގައުމީ މަސްލަހަތު އިސްކުރަންޖެހޭނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
ރާއްޖެޓީވީއަށް ދެއްވި އެކްސްކްލޫސިވް އިންޓަރވިއުގައި އެމްޑީޕީގެ ރައީސް، ރައީސް މުހައްމަދު ނަޝީދު، ރައީސް ސާލިހާ އެކީގައި މަސައްކަތް ކުރެއްވުމާއި ގުޅޭގޮތުން ކުރެވުނު ސުވާލުގެ ޖަވާބުގައި ހަނުހުންނެވީތީ އެކަމުގައި ރައީސް ސޯލިހު ދެކެވަޑައިގަންނަވަނީ ކިހިނެއްތޯ ކުރެވުނު ސުވާލުގެ ޖަވާބުގައި ރައީސް ވިދާޅުވީ އެމަނިކުފާނާ އެއްކޮށް، މަސައްކަތް ކުރަން ދަތިވާކަމަށް ނޫނީ ނުކުރެވޭނެކަން ރައީސް ނަޝީދު ދެފަހަރަކު އާންމުކޮށް ހާމަކުރައްވާފައިވާ ކަމަށެވެ.
ރައީސް ވިދާޅުވީ އެއީ ރައީސް ނަޝީދުގެ ނިންމެވުމެއް ކަމަށެވެ. އަދި އެމަނިކުފާނު 2023 ވަނަ އަހަރުގެ ރިޔާސީ އިންތިހާބުގައި ކުރިއަށް ވަޑައިގަންނަވަން ނިންމަވާފައިކަން ނޫސްވެރިންގެ ބައްދަލުވުމެއްގައި ހާމަކުރައްވާފައިވާނެ ކަމަށާއި، އެކަމުގައި ވާހަކަދައްކާ ކުރިއަށް ވަޑައިގަންނަވާނެ ކަމަށެވެ.
2023 ވަނަ އަހަރު ރިޔާސީ ރޭހަށް ނުކުރަންނަވާނީ ކޯލިޝަނަކާއެކީގައިތޯ ސުވާލު ކުރެއްވުމުން ރައީސް ވިދާޅުވީ ކޯލިޝަނަކާއެކީގައި 2023ގެ ރިޔާސީ އިންތިހާބަށް ދިއުމުގެ ވިސްނުން ގެންގުޅުއްވާ ކަމަށެވެ. އަދި ކޯލިޝަނާ ހިސާބަށް ދިއުމާ ހަމައަށް އެމަނިކުފާނަށް މަސައްކަތް ފެށޭނީ ޕާޓީ ތެރެއިން ކެންޑިޑޭންސީ އެމަނިކުފާނަށް ކަށަވަރުވުމުން ކަމަށެވެ.
ރައީސް ވިދާޅުވީ ރިޔާސީ އިންތިހާބު އޮތީ މާ ދުރަކު ނޫން ކަމަށެވެ. އެކަން ފެނިވަޑައިގަންނަވަނީ ސިޔާސީ ލީޑަރުންގެ ހަރަކާތްތައް އިތުރުވެއްޖެ ކަމަށާއި، އެއީ އެއްގޮތަކުން ރަނގަޅުކަމެއް ކަމަށެވެ. އެބޭފުޅުންނަށް ފެންނަ ރާއްޖޭގައި ހުރި މައްސަލަތައް ހާމަކުރުން އެއީ ރަނގަޅުގޮތެއް ކަމަށާއި، އެހެންނަމަވެސް އަޅުގަނޑުމެން އެންމެންވެސް ދެކެންޖެހޭނީ އަޅުގަނޑުމެންގެ އަމިއްލަ މަސްލަހަތަށްވުރެ ގައުމުގެ މަސްލަހަތު އިސްކޮށްގެން ކުރިއަށް ގެންދިއުން ކަމަށް ރައީސް ވިދާޅުވިއެވެ. ކުރިއަށް އޮތް ހަލަބޮލި ދުވަސްތަކުގެ ތެރޭގައި ހުރިހާ ބޭފުޅުން އެ ވިސްނުމުގައި ކުރިއަށް ދިއުމަކީ އެމަނިކުފާނުގެ އެދިވަޑައިގަތުން ކަމަށާއި، އެމަނިކުފާނާއެކީގައި މަސައްކަތް ކުރެވޭނީ ކޮން ޕާޓީތަކަކާއެކީގައިތޯ، ކޮންބަޔަކާއެކީގައިތޯ މިކަން ކުރެވެންއޮތީ އަދި އެގޮތުގައި ކުރިއަށް ވަޑައިގަންނަވާނެކަމަށް ރައީސް ވިދާޅުވިއެވެ.
