ބަރުލަމާނީ ނިޒާމަށް ރައީސް ސާލިހު ތާއީދެއް ނުކުރައްވާ، ގަރާރު އަނބުރާ ގެންދިއުމަށް އެދިވަޑައިގަންނަވައިފި

ރާއްޖެއަށް ބަރުލަމާނީ ނިޒާމް ގެންނަން ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ތާއިދު ނުކުރައްވާ ކަމަށް އެމަނިކުފާނު ވިދާޅުވެއްޖެއެވެ.

ބަރުލަމާނީ ނިޒާމާއި ގުޅޭގޮތުން ސިޔާސީ އެކި ލީޑަރުން ވާހަކަފުޅު ދައްކަވަމުން ގެންދަވާ މި ދަނޑިވަޅުގައި، "ރާއްޖެ ޓީވީ" އަށް ދެއްވި އެކްސްކްލޫސިވް ފޯން އިންޓަރވިއުގައި، އެމްޑީޕީގެ އެންމެ އިސް ލިޑަރު، ރައީސް ސާލިހު ވިދާޅުވީ ބަރުލަމާނީ ނިޒާމަށް އެމަނިކުފާނު ތާއީދު ނުކުރައްވާ ކަމަށެވެ.

Advertisement

ރައީސް ވިދާލުވީ އެމަނިކުފާނަށް ޕާސަނަލީ ގަބޫލުކުރެއްވެނީ މިހާރު މި އޮތްގޮތް (ރިޔާސީ ނިޒާމް)، އެއީ ރައްޔިތުންގެ ސީދާ ވޯޓަކުން، ރައްޔިތުންގެ ފުރިހަމަ އަގުބަލިއްޔަތަކުން ހޮވޭ ރައީސަކާއެކު އެކުލެވޭ ސަރުކާރަކަށް ހިންގުމުގެ ބާރު އޮތުން ކަމަށެވެ. ދެވަނަ ކަމަކަށް ރައްޔިތުން އިންތިހާބުކުރާ މަންދޫބުންގެ މައްޗަށް އެކުލެވޭ ރައްޔިތުންގެ މަޖިލީހަކުން ގާނޫނު ހެދުމުގެ ބާރު އޮތުން ކަމަށެވެ. އަދި މިނިވަންކަމާއެކީގައި ޝަރީއަތްކުރެވޭ ގޮތަށް ޖުޑިޝަރީ އޮތުމާއި، ތިންބާރު ވަކިކުރެވިފައި އޮތް މިފަދަ ނިޒާމެއް އެއީ އެމަނިކުފާނު ގަބޫލުކުރައްވާ ނިޒާމް ކަމަށެވެ.

ނިޒާމު ބަދަލުކުރުމާއި ގުޅޭ ގޮތުން ކޮންގްރެސްއަށް ހުށަހެޅިފައިވާ ގަރާރާއި ގުޅޭގޮތުން ރައީސް ސޯލިހު ވިދާޅުވީ ގަރާރުގައި އެންމެ ބޮޑުކަމަކަށް ފާހަގަކުރެވިފައި މިއޮތީ ސަރުކާރެއް އެކުލަވާލާ އިރުގައި ކޯލިޝަނެއް ހެދީމާ، ވައުދުތައް ފުއްދުމުގައި ދަތިތަތަކާއި އުނދަގޫތައް ކުރިމަތިވާ ވާހަކަ ކަމަށެވެ. އަދި ސަރުކާރު ހަރާބުވެގެންދާ ވާހަކަ ކަމަށެވެ. އެހެންކަމުގައިވާނަމަ މި ގަރާރުގައި ގެންނަ ބަދަލުގައި ރަނގަޅު ގޮތެއް އަދި ހައްލެއް ހޯދައިދެވެންޖެހޭނެ ކަމަށް ރައީސް ވިދާޅުވިއެވެ.

ރައީސް ވިދާޅުވީ މިހާރު މި އޮތް ނިޒާމްގެ ތެރޭގައި ހުރީ ކޮން މައްސަލަތަކެއްތޯ، ކޮންކަމެއްތޯ ނުކުރެވިގެން މިއުޅެނީ ކިޔައިދެއްވަންޖެހޭ ކަމަށެވެ. ހަމައެއާއެކު މިހާރު މި ގެންނަން އުޅޭ ބަދަލުގެ ތެރޭގައި ފައިދާއެއް އޮތިއްޔާ، ފައިދާ ކިޔައިދެއްވަން ޖެހޭ ކަމަށެވެ. އެއަށްފަހު ނޫނިއްޔާ މިފަދަ ގަރާރެއް ފާސްކޮށްގެން ރައްޔިތުންނާ ހަމައަށް ދާކަށެއް އެމަނިކުފާނަށް ފެނިވަޑައިނުގަންނަވާ ކަމަށް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ ވެރިކަމުގައި 4 އަހަރު ފުރިހަމަ މިވަނީ ކޯލިޝަނަކާއެކީގައި ކަމަށެވެ. އެމަނިކުފާނު ވެވަޑައިގެންނެވި ވައުދުތައް ފުއްދުމުގައި އިރާދަކުރެއްވިއްޔާ ކުރިއަށްގެންދެވޭ ކަމަށެވެ. އެހެންކަމުން ނިޒާމުގައި އޮތް މައްސަލައެއްކަމަށް އެމަނިކުފާނަށް މުޅިއަކުން ފެނިވަޑައިނުގަންނަވާ ކަމަށެވެ.

ރައީސް ވިދާޅުވީ މި ގަރާރު ގެންނަން ފެނިވަޑައިނުގަންނަވާ ކަމަށެވެ. އަދި ކޮންގްރެސްގެ ތެރެއިން މި ފާސްވެގެންދާތަން ވެސް ފެނިވަޑައިނުގަންނަވާ ކަމަށެވެ. ޕާޓީގެ ތެރެއިން ފާސްކުރިޔަސް އަދި މަޖިލީހަށް ދާންޖެހޭ ކަމަށާއި، މަޖިލީހުން ގާނޫނުއަސާސީއަށް ބަދަލެއް ގެންނަންޔާ އެ ފާސްކުރައްވާނެ ކަމަށެވެ. އަދި އެއަށްފަހު ރިފަރަންޑަމްއަކަށް ދާންޖެހޭނެ ކަމަށާއި، ގާނޫނުގެ ތެރެއިން ކުރަންޖެހޭ ކަމެއް އެމަނިކުފާނު ކުރައްވާނެ ކަމަށެވެ. އެހެންނަމަވެސް މިއީ މިވަގުތު ކުރިއަށްގެންދަންޖެހޭ ކަމެއް ކަމަށް އެމަނިކުފާނަށް ގަބޫލެއް ނުކުރެވޭ ކަމަށް ވިދާޅުވިއެވެ.