35 އިންސައްތައިން މަތިން އަޣުލަބިއްޔަތު ލިބޭ މީހަކަށް ރައީސްކަމަށް އާދެވޭ ގޮތަށް ގާނޫނު އަސާސީއަށް އިސްލާހު ހުށަހަޅަނީ
ދައުލަތުގެ އެންމެ އިސްފަރާތަކީ ރައީސުލްޖުމްހޫރިއްޔާ
އެމްޑީޕީ ޕްރައިމެރީގެ ވޯޓުލުން --- ފޮޓޯ : ޔޫސުފް ސޮފްއާން
ރައީސުލްޖުމްހޫރިއްޔާގެ މަގާމަށް ކުރިމަތިލައްވާ ފަރާތްތަކުގެ ތެރެއިން، މަގާމަށް އިންތިހާބު ކުރެވޭނީ 35 އިންސައްތައަށްވުރެ މަތިން އަޣުލަބިއްޔަތު ލިބޭ މީހަކަށްކަން ބަޔާންކޮށް ގާނޫނު އަސާސީއަށް އިސްލާހު ހުށަހަޅަން ނިންމައިފިއެވެ.
މިގޮތަށް އިސްލާހު ހުށަހަޅާފައިވަނި ވެރިކަމުގެ ނިޒާމު ބަރުލަމާނީ ނިޒާމަކަށް ބަދަލުކުރުމަށް ގާނޫނު އަސާސީއަށް ހުށަހަޅާފައިވާ އިސްލާހުގެ ޑްރާފްޓްގައެވެ. މި އިސްލާހުތައް ހުށަހަޅަނީ އެމްޑީޕީގެ ކޮންގްރެސްއަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދެވެ.
މި އިސްލާހުގައި ބުނެފައިވަނި ރައީސުލްޖުމްހޫރިއްޔާ އިންތިހާބު ކުރާނީ ރާއްޔިތުންގެ އާންމު ވޯޓަކުން ކަމަށާއި، އެ މަގާމަށް ކުރިމަތިލާ މީހުންގެ ތެރެއިން ރައީސުލްޖުމްހޫރިއްޔާ ކަމުގެ މަގާމަށް އިންތިހާބުވާނީ އެންމެ ގިނަ ވޯޓު ލިބޭ އަދި ދިން މީހުންގެ 35 އިންސައްތައަށްވުރެ މަތީ އަގުލަބިއްޔަތެއް ހޯދާ މީހެއް ކަމަށެވެ.
މި ބައި އިތުރަށް ތަފްސީލުކޮށްދެއްވަމުން ބުނެފައިވަނީ ބައެއް ގައުމުތަކުގައި ބަރުލަމާނީ ނިޒާމުގައި ރައީސުލްޖުމްހޫރިއްޔާ އަކީ ރައްޔިތުންގެ މަޖިލީހުން އައްޔަންކުރާ މީހެއްގެ ގޮތުގައި ކަނޑައަޅާފައި އޮންނަ ސަބަބަކީ، އެ ގައުމުތަކުގައި ރައީސުލްޖުމްހޫރިއްޔާއަކީ ދައުލަތުގެ އެންމެ އިސްވެރިޔާގެ ހައިސިއްޔަތުން ކަމައެކަނި ރަމްޒީ ބާރުތަކެއް ލިބިފައިވާ މީހަކަށް ވާތީ ކަމަށެވެ.
އަދި ރާއްޖެއަށް ތައާރަފްކުރި ނިޒާމުގައި ދައުލަތް ހިންގުމުގެ އިސް މަގާމުތަކަށް މީހުން އައްޔަންކުރުމަށް މަޖިލީހަށް ނަން ފޮނުވުމުގެ ބާރާއި، މަޖިލިސް އުވާލުން ފަދަ ބާރުތައް ރައީސުލްޖުމްހޫރިއްޔާއަށް ލިބިގެންވާ ގޮތަަށް ހުށަހަޅާތީ، ރައީސުލްޖުމްހޫރިއްޔާ ކަމަށް އިންތިހާބުކުރަންވާނީ ރައްޔިތުންގެ އަގުލަބިއްޔަތު އޮންނަ މީހެއްކަމަށް ފެންނަ ކަމަށެވެ.
އިސްލާހުގެ ތެރޭގައި ދައުލަތުގެ އެންމެ އިސް ފަރާތަކީ ރައީސުލްޖުމްހޫރިއްޔާ ކަމާއި، ދައުލަތުގެ އެންމެ އިސްފަރާތުގެ ހައިސިއްޔަތުން ރައީސުލްޖުމްހޫރިއްޔާއަށް ބާރުތަކެއް ލިބިގެންވާ ކަމަށް ގާނޫނު އަސާސީގައި ބަޔާންކުރަން ވަނީ ހުށަހަޅާފައެވެ.
ރައީސުލްޖުމްހޫރިއްޔާއަށް ލިބިގެންވާ ބާރުތަކުގެ ތެރޭގައި، ރައީސުލްޖުމްހޫރިއްޔާ އަކީ ސިފައިންގެ އެންމެ މަތީ ވެރިޔާ ކަމާއި، ހަނގުރާމަ ނުވަތަ ސުލްހަ އިއުލާންކުރުމާއި، ކުއްލި ނުރައްކަލުގެ ހާލަތު އިއުލާންކުރުން ހިމެނެއެވެ. މީގެ އިތުރުން ބޭރު ގައުމުތަކަށާއި، ރައްޔިތުންގެ މަޖިލީހުގެ މަޝްވަރާގެ މަތިން ބައިނަލްއަގުވާމި ޖަމިއްޔާތަކަށް ސަފީރުން އައްޔަން ކުރުން އަދި އަނބުރާ ގެނައުން ހިމެނެއެވެ.
މީގެ އިތުރުން ބޭރު ގައުމުތަކުންނާއި އެނޫންވެސް ފަރާތްތަކުން ކަނޑައަޅާ ސަފީރުންގެ ފަތްކޮޅު ބަލައިގަތުމާއި އަނބުރާ ގެންދިއުމުގެ ލިޔުން ބަލައިގަތުމާއި، ގާނޫނު އަސާސީން އުފައްދާ މުސްތަގިއްލު ކޮމިޝަންތަކާއި މަގާމުތަކަށް މީހުން އައްޔަންކުރުމަށްޓަކައި ރައްޔިތުންގެ މަޖިލީހަށް ފޮނުވުމާއި، އައްޔަންކުރުން ހިމެނެއެވެ. އަދި އެކިއެކި ތަހުގީގުތައް ކުރުމަށް ނުވަތަ ލަފާ ދިނުމަށް އުފައްދާ ވަގުތީ ކޮމިޝަންތައް އުފެއްދުމާއި، ގައުމީ މުހިންމު މައްސަލަތަކުގައި ރައްޔިތުންނަށް ފެންނަ ނުފެންނަ ނުވަތަ ހިޔާލު ހޯދުމުގެ ވޯޓު ނެގުން ރައީސުލްޖުމްހޫރިއްޔާގެ ބާރުގެ ތެރޭގައި ހިމެނެއެވެ.
އިތުރަށް ބުނެފައިވަނީ ގައުމީ ބަންދު ދުވަސްތަކާއި ސަރުކާރު ބަންދު ދުވަސްތައް ކަނޑައެޅުމާއި، އިނާމާއި، ލަގަބު، ޝަރަފު، ނިޝާނާއި މެޑަލް ދިނުމާއި، ޖިނާއީ ކުށްތަކުގައި ހުކުމްކޮށްފައިވާ ފަރާތްތަކަށް މައާފް ދިނުމާއި އަދަބު ލުއިކޮށްދިނުން ވެސް ހިމެނެއެވެ.
މީގެ އިތުރުން ރައްޔިތުންގެ މަޖިލީހުގެ ހިނގަމުންދާ ދައުރުގެ ކޮންމެ އަހަރަކަށް ރައްޔިތުންގެ މަޖިލިސް ހުޅުވުމާއި، އަހަރުގެ ހުރިހާ ދައުރެއް ނިމުނުކަން އިއުލާން ކުރުން ހިމެނެއެވެ. ގާނޫނު އަސާސީގައި ކަނޑައަޅައި ބަޔާންކުރާ ހާލަތްތަކުގައި ރައްޔިތުންގެ މަޖިލިސް އުވާލުންވެސް ރައީސުލްޖުމްހޫރިއްޔާގެ ބާރުތަކުގެ ތެރޭގައި ހިމެނެއެވެ.
