ނ މަނަދޫގައި 40 ހައުސިންގ ޔުނިޓު އެޅުމަށް ބަޔަކާ ޙަވާލުކޮށްފި

ނ މަނަދޫގައި 40 ހައުސިންގ ޔުނިޓު އެޅުމަށް ބަޔަކާ ޙަވާލުކޮށްފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި އާދިއްތަ ދުވަހު ބޭއްވި ރަސްމިއްޔާތެއްގައި މި މަޝްރޫއު ޙަވާލުކޮށްފައިވަނީ ދޮންބޭޒް ޕްރައިވެޓް ލިމިޓެޑާއެވެ.

މި މަޝްރޫއުގައި މިނިސްޓްރީގެ ފަރާތުން ސޮއި ކުރެއްވީ ހައުސިންގ ޑިޕާޓްމަންޓުގެ ޑިރެކްޓަރ ޖެނެރަލް އަހުމަދު ވިޝާން ނަސީމެވެ. ދޮންބޭޒް ޕްރައިވެޓް ލިމިޓެޑްގެ ފަރާތުން ސޮއި ކުރެއްވީ ކުންފުނީގެ ހެޑް އޮފް އޮޕަރޭޝަންސް އަލީ ޙަމްދޫނެވެ.

މި މަޝްރޫއަށް ޚަރަދު ކޮށްފައިވަނީ ސަރުކާރުގެ 2022 ވަނަ އަހަރުގެ ޕީއެސްއައިޕީ ބަޖެޓުންނެވެ.

މިނިސްޓްރީން މައުލޫމާތު ދޭ ގޮތުގައި މި މަސައްކަތުގެ އަގަކީ 40،315،837.96 (ސާޅިސް މިލިއަން، ތިންލައްކަ ފަނަރަހާސް އައްސަތޭކަ ތިރީސް ހަތް ރުފިޔާ ނުވަދިހަ ހަ ލާރި) އެވެ. މަސައްކަތް ނިންމުމަށް ދީފައިވާ މުއްދަތަކީ 270 ދުވަހެވެ.

މި މަޝްރޫއުގައި ހިމެނެނީ 40 ހައުސިންގ ޔުނިޓެވެ. މިނިސްޓްރީން ބުނާ ގޮތުގައި ކޮންމެ ހައުސިންގ ޔުނިޓެއްގައި 700 އަކަފޫޓު ހުންނާނެއެވެ.

އޭގެ އިތުރުން، ޔުނިޓެއްގައި ހިމެނެނީ 3 ކޮޓަރި، 3 ފާޚާނާ، ސިޓިންގ ރޫމް، ބަދިގެ، ކާގެ، ލޯންޑަރީ، އަދި ސްޓޯރ ރޫމެވެ. އަދި ހައުސިންގ ޔުނިޓުތަކުގައި ދިރިއުޅޭ ފަރާތްތަކަށް ހިތްފަސޭހަ މާހައުލެއް ޤާއިމު ކުރުމަށް ޔުނިޓު ވަށައިގެން އަލި ކުރެވޭނެކަމަށްވެސް މިނިސްޓްރީން ބުނެއެވެ. ހަމައެއާއެކު، ޕާރކްއަކާއި ވެހިކަލް ޕާރކް ކުރާނެ ޖާގައެއްވެސް ޤާއިމު ކުރެވޭނެކަމަށް މިނިސްޓްރީން ބުނެއެވެ.

މި ސަރުކާރުން ގެންދަނީ އަތޮޅު ތެރޭގެ ބޯހިޔާވަހިކަމާއި ގުޅޭ ގިނަ މަޝްރޫއުތަކެއް ހިންގަމުންނެވެ. އެގޮތުން ރައްޔިތުންނަށް ދިމާވެފައިވާ ގެދޮރުގެ ދަތިކަމަށް ހައްލު ހޯދައިދީ، އަތްފޯރާފަށުގައި ގެދޮރުވެރިކަން ފޯރުކޮށް ދިނުމަކީ ސަރުކާރުގެ އެންމެ އިސް އެއް އަމާޒު ކަމަށް ވަނީ ބަޔާންކޮށްފައެވެ. އަތޮޅުތެރޭގެ ގެދޮރުވެރިކަމަށް ކުރިއަށްއޮތް ތިން އަހަރަށް 1.5 ބިލިއަނެއްހާ ރުފިޔާ ހިމަނާފައިވާނެ ކަމަށް ސަރުކާރުން ވަނީ ހާމަކޮށްފައެވެ.