ޖުމްހޫރީ ޕާޓީ(ޖޭޕީ)ގެ ލީޑަރ އަދި އދ. މާމިގިލީ ދާއިރާ ރައްޔިތުންގެ މަޖިލިސް މެމްބަރ ގާސިމް އިބްރާހީމް، ފ. އަތޮޅު ނިލަންދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީގެ މެމްބަރުންނާ ބައްދަލުކުރައްވައިފިއެވެ.
މިބައްދަލުކުރެއްވުމުގައި ނިލަންދޫ ކައުންސިލް ރައީސް އަލީ އަހުމަދުއާއި ޑަބްލިއުޑީސީގެ ރައީސް ނަސީބާ އަލީ ބައިވެރިވެވަޑައިގެންނެވިއެވެ. ބައްދަލުވުމުގައި ގާސިމް ވަނީ ފ. ނިލަންދޫގެ އަންހެނުން ތަރައްގީއަށް ކުރެވެމުންދާ މަސައްކަތާއި ރަށުގައި ހިނގަމުންދާ އެކިއެކި ތަރައްގީގެ މަސައްކަތްތައް އޮޅުންފިލުއްވާފައެވެ. އަދި ގާސިމް ވަނީ ރަށުގެ ތަރައްގީގެ ބައެއް މަސައްކަތްތަަކަށް އެހީތެރިވެދެއްވަން ނިންމަވާފައެވެ.
މިގޮތުން ރަށުގެ މޫދަށް އެރޭ ސަރަހައްދު ތަރައްގީކުރުމަށް އެހީތެރިވެދެއްވުމާއި ވޮލީކޯޓެއް ތަރައްގީކޮށްދެއްވުމާއި އަދި މިނޫންވެސް މިފަދަބައެއް މަސައްކަތްތައް ހިމެނެއެވެ. ގާސިމް އަބަދުވެސް ފ. ނިލަންދޫގެ ތަރައްގީގެ އެކިއެކި މަސައްކަތްތަކުގައި ވެދެއްވާ އެހީތެރިކަމާއި ބަހައްޓަވާ ގާތްކަން، އަދި ވަކިން ޚާއްސަކޮށް ރަށުގެ އަންހެނުންގެ ތަރައްގީއަށް ވެދެއްވާ އެހީތެރިކަމަށްޓަކައި ކައުންސިލް ރައީސް އަލީ އަހުމަދުއާއި ޑަބްލިއުޑީސީގެ ރައީސް ނަސީބާ ވަނީ ޝުކުރު އަދާކުރައްވާފައެވެ. އަދި، މިކަމުގެ ރަމްޒެއްގެ ގޮތުން ވަނީ ހަނދާނީ ފިލައެއް ގާސިމްއަށް އަރުވާފައެވެ.
ޖުމްހޫރީޕާޓީގެ ކައުންސިލް މެމްބަރު، މިނިސްޓަރ އޮފް ޓްރާންސްޕޯރޓް އައިޝަތު ނަހުލާ އިސްވެހުންނަވައި ޖޭޕީގެ ބައެއް އިސްފަރާތްތަކާއެކު ވަނީ ހުސްވި އަހަރު ފަހުކޮޅު ފ. ނިލަންދޫއަށް ވަޑައިގެން، ޖޭޕީއަށް މެމްބަރުން އިތުރުކުރުމުގެ ހަރަކާތެއްވެސް ހިންގާފައެވެ. އެ ދަތުރުފުޅުގައި ކައުންސިލް މެމްބަރު ނަހުލާއާއި ޖޭޕީގެ ޓީމުންވަނީ ރަށު ކައުންސިލާއި ޑަބްލިއުޑީސީއާއި އަދި ރަށުގެ ބައެއް އިސްފަރާތްތަކާ ބައްދަލުކުރައްވާފައެވެ.
