ފާސްޓް ފުޑް ވިޔަފާރީގައި ނަން ފާހަގަކޮށްލެވޭ ޑޮމިނޯސް ޕިއްޒާއިން އިޓަލީގައި ހިންގަމުންއައި އެންމެ ފަހު ވިޔަފާރިވެސް ބަންދުކޮށްފިއެވެ. ޕިއްޒާގެ ވިޔަފާރި ފުރަތަމަ ފެށިގެން އައީ އިޓަލީން ކަމަށް ވާއިރު، މަޝްހޫރު ޑޮމިނޯސް ޕިއްޒާ އިޓަލީން ލިބުން ހުއްޓިގެން މިދިޔައީ، "ޑޮމިނޯސް"ގެ ފްރެންޗައިސް ގަނެފައިވާ ކުންފުނި "އީ ޕިއްޒާ ސްޕާ" ބަނރޫޓުވެފައިވާކަން އިއުލާނުކުރުމުންނެވެ.

"އީ ޕިއްޒާ ސްޕާ" ފުރަތަމަ މިކަން އިއުލާނުކޮށްފައިވަނީ މިއަހަރުގެ އެޕްރިލް މަހުއެވެ. ނަމަވެސް ކްރެޑިޓަރުންގެ މަދަދާއެކު، އިތުރު 90 ދުވަހުގެ ހިމާޔަތް ދެވުނެވެ. ނަމަވެސް އެމުއްދަތު ވަނީ ޖުލައިމަހުގެ ނިޔަލަށް ހަމަވެފައެވެ.

2015 ވަނަ އަހަރު އިޓަލީގައި ޑޮމިނޯސް ޕިއްޒާގެ ވިޔަފާރި ފެށުމަށްފަހު ކަސްޓަމަރުންގެ މަގްބޫލްކަން ހޯދުމަށް "އީ ޕިއްޒާ ސްޕާ"އިން ވަރަށް މަސައްކަތްކުރިއެވެ. ފައިދާ ލިބުނު އަހަރުތަކަކަށްފަހު، ކޮވިޑް 19އާ ގުޅިގެން އެފަރާތަށްވެސް ދަތިތައް ކުރިމަތިވިއެވެ. އައުޓްލަޓްތައް ބަންދުކޮށްފައި ބަހައްޓަން ޖެހުމާއި، އަދި ފަހުން ޑެލިވަރީއަށްވެސް އެޅުނު ހުރަސްތަކުގެ ސަބަބުންނެވެ. ވާދަވެރި ކުންފުނިތަކުން ޑެލިވަރީގެ މަސައްކަތް އައު ހަރުފަތަކަށް ޖެއްސުންވެސް ވީ ޑޮމިނޯސް ވިޔަފާރިއަށް އެޅުނު ހުރަހަކަށެވެ. ކޮވިޑް ކޮންޓްރޯލްކުރުމަށް އަޅަންފެށި ފިޔަވަޅުތަކުގެ ސަބަބުން ވިޔަފާރި ކުރިޔަށްނުގެންދެވި، 2020 ވަނަ އަހަރުގެ ޖުލައި މަހުން ފެށިގެން ވަނީ ޑޮމިނޯސް ޕިއްޒާ ޑެލިވަރީކުރުންވެސް ހުއްޓާލަންޖެހިފައެވެ. 2020 އަހަރާ ހަމައަށް ޑޮމިނޯސްގެ 23 އައުޓްލަޓް އިޓަލީގައި އައީ ހިންގަމުންނެވެ.

ޑޮމިނޯސްގެ 1200 އައުޓްލަޓް ޔޫކޭ އަދި އަޔަރލަންޑްގައި ހިންގައެވެ. މިއީ ޔޫރަޕްގައި ޑޮމިނޯސްގެ އެންމެ ފުޅާ މާކެޓެވެ.

ޑޮމިނޯސް ޕިއްޒާއަކީ މުޅި ދުނިޔޭގައިވެސް އެންމެ ފުޅާކޮށް ހިންގާ ޕިއްޒާގެ ވިޔަފާރިއަށްވާއިރު، އެފަރާތުން 90 ގައުމެއްގައި 18،300 އައުޓްލަޓް ހިންގައެވެ.