މުދައްރިސުންނަށް ލައިސެންސް ދީ، ކިޔަވާދޭ ތަންތަން ރެޖިސްޓަރ ކުރުން ލާޒިމްކުރަނީ!
ދިރާސީ އާ އަހަރު ފެށީ 92000 އަށް ވުރެ ގިނަ ދަރިވަރުންނާއެކު
ތައުލީމީ ވަޒީރު ޑރ.އައިޝަތު އަލީ ދެއްވި ހިތާބުގެ ތެރެއިން
މުދައްރިސުންނަށް ލައިސަންސް ދިނުމަށް ވާން ޖެހޭ ހުރިހާ ތައްޔާރީތަކެއްވެ ނިމިފައިވާ ކަމަށް ތައުލީމީ ވަޒީރު ޑރ.އައިޝަތު އަލީ ވިދާޅުވެއްޖެއެވެ.
ދިރާސީ އާ އަހަރާއި ގުޅިގެން ދެއްވި ހިތާބުގައި ވާހަކަދައްކަވަމުން ޑރ.އައިޝަތު ވިދާޅުވީ މުދައްރިސުންނަށް ލައިސަންސެއް ދޫކުރުމާ ގުޅޭ ހުރިހާ ލިޔެކިޔުންތައް މިހާރު ނިމިފައިވާ ކަމަށާއި، މުދައްރިސުންނަށް ލައިސެންސް ދޫކުރުމުގެ އަމަލީ މަސައްކަތް މި އަހަރުގެ ތެރޭގައި ފަށާނެ ކަަމަށެވެ. ތައުލީމީ އާ ގާނޫނަށް އަމަލުކުރަން ފެށިތާ އަހަރެއް ހާ ދުވަސް ވެފައި ވާއިރު، އެ ގާނޫނާ ގުޅިގެން ހަދަންޖެހޭ ހުރިހާ ގަވާއިދެއް މިހާރު ހަދާ ނިމިފައިވާ ކަމަށް ވެސް މިނިސްޓަރ ފާހަގަކުރެއްވިއެވެ. ތައުލީމުގެ ފެންވަރު ރަނގަޅުކުރުމަށްޓަކާ އެ ޤާނޫނުގެ ދަށުން އަޅާ ފިޔަވަޅުތަކުގެ ތެރޭގައި މުދައްރިސުންނަށް ލައިސަންސް ދިނުމުގެ އިތުރުން، ކިޔަވާދޭ ތަންތަން ރެޖިސްޓްރީކުރުން ލާޒިމް ކުރުމަށް ވެސް ވަނީ ހަމަޖެހިފައެވެ.
އާދިއްތަ ދުވަހުގެ ހިތާބުގައި މިނިސްޓަރ ވިދާޅުވީ އާ ގަވާއިދުގެ ދަށުން އަޅާ ފިޔަވަޅުތަކަކަކީ ތައުލީމުގެ ފެންވަރު މަތިކުރުމަށް އަޅާ ފިޔަވަޅުތަކެއް ކަމަށެވެ.
މިހާރު އޮންނަ ގަވާއިދުގެ ދަށުން ވަކި ވަކި މުދައްރިސުންނަށް ލައިސެންސް ދޫކުރާކަށް ނުޖެހެއެެވެ. މިހާރު މުދައްރިސުން ރެޖިސްޓަރ ކުރަނީ ތައުލީމީ ވުޒާރާގައެވެ. ބުރާސްފަތި ދުވަހު ދެއްވި ހިތާބުގައި މިނިސްޓަރ ވަނީ ދަރިވަރުންނާއި ބައްދަލުވާ އެންމެންނަކީ ވެސް ދަރިވަރުންގެ ރައްކާތެރިކަމަށް ވަރަށް ބޮޑު ސަމާލުކަމެއްދޭ ބަޔަކަށް ވާން ޖެހޭ ކަމަށެވެ. އެގޮތުން ސްކޫލާއި ސްކޫލުން ބޭރު މާހައުލުގައި ދަރިވަރުންނާއި ބައްދަލުވަނީ ކޮން ބަޔަކާތޯ ބަލާ ދަރިވަރުންގެ ރައްކާތެރިކަން ކަށަަވަރުކުރަން ޖެހޭ ކަމަށް ވެސް މިނިސްޓަރ ވިދާޅުވިއެވެ.
ދަރިވަރުންނަށް ނިސްބަތްކުރައްވާ ވާހަކަދައްކަވަމުން މިނިސްޓަރ ވަނީ ދަރިވަރުންނަކީ އުނގެނޭ، ދިރިއުޅުމުގެ ހުނަރުތައް ދަސްކުރާބަޔަކަށް ވުން މުހިންމުކަމަށް ވިދާޅުވެފައެވެ. އަދި މުޖުތަމައު އަށް ފައިދާ ހުރި ބަޔަކަށް ވުމަށް މިނިސްޓަރ ވަނީ ނަސޭހަތްތެރިވެވަޑައިގަންނަވާފައެވެ.
މި ފަަހަރު ދިރާސީ އާ އަހަރުގެ ކިޔެވުން ފަށާފައި ވަނީ 92000 އަށް ވުރެ ގިނަ ދަރިވަރުންނާއި އެކުގައެވެ.
