މިއަހަރު އުމްރާގެ އަޅުކަން އަދާކުރަންދާ ފަރާތްތަކުން ކޮވިޑް-19ގެ ޕީސީއާރު ޓެސްޓް ހަދަން ނުޖެހޭނެ ކަމަށް ސައުދީ އަރަބިއްޔާގެ ހައްޖު އެންޑް އުމްރާ މިނިސްޓްރީން ބުނެފިއެވެ.
އެ މިނިސްޓްރީއާ ހަވާލާދީ ސައުދީ ގެޒެޓުގައި ބުނެފައިވަނީ ޕީސީއާރު ޓެސްޓު ވެސް އަދި ރެޕިޑް އެންޓިޖެން ޓެސްޓް ވެސް އުމްރާއަށްދާ ފަރާތްތަކުން ހަދަން ނުޖެހޭނެ ކަމަށެވެ. ނަމަވެސް ކޮވިޑު ޖެހިއްޖެ ހާލަތެއްގައި ބޭސްފަރުވާއަށް އިންޝުއަރެންސް އަދިވެސް މަޖުބޫރު ކަމަށް ހައްޖު އެންޑް އުމްރާ މިނިސްޓްރީން ވަނީ ބުނެފައެވެ.
އުމްރާގެ އަޅުކަން އަދާ ކުރުމަށް ސައުދީއަށްދާ ފަރާތްތަކަށް އެ ޤައުމުގައި އެންމެ ގިނަވެގެން ހޭދަ ކުރެވޭނެ ކަމަށް ކަނޑައަޅާފައިވަނީ 90 ދުވަހެވެ. މި މުއްދަތުގައި އެ ފަރާތްތަކަށް މައްކާ އާއި މަދިނާ އަދި ސައުދީގެ އެހެނިހެން ސިޓީތަކުގައި އެއްވެސް ހުރަހެއް ނެތި އުޅެވޭނެ ކަމަށް ވެސް އެ މިނިސްޓްރީން ވަނީ ބުނެފައެވެ.
މިއަހަރު އުމްރާއަށްދާ ފަރާތްތަކަށް ހާއްސަކޮށްގެން ޕޯޓަލެއްވެސް ސައުދީން ވަނީ ތައާރަފުކޮށްފައެވެ. މި ޕޯޓަލް މެދުވެރިކޮށް އުމްރާ ވިސާއަށް އެދެވޭނެ ކަމަށާއި އުމްރާއަށް ދާ ފަރާތްތަކުން އަމަލު ކުރަންވާ ގޮތުގެ މައުލޫމާތު ވެސް ލިބޭނެއެވެ.
މިފަހަރުގެ އުމްރާގައި ވެކްސިން ނުޖަހާ ފަރާތްތަކަށް ބައިވެރިވުމުގެ ފުރުސަތު އެބައޮތް ކަމަށް ސައުދީ ގެޒެޓުން ވަނީ ރިޕޯޓްކޮށްފައެވެ. މި ފުރުސަތު ލިބޭނީ ވެކްސިން ނުޖަހާ މީހުންގެ ތެރެއިން ކޮވިޑު ޖެހިފައި ނުވާ މީހުންނާއި ބަލި ޖެހިފައިވާ މީހަކާ ބައްދަލުވެފައި ނުވާ މީހުންނަށް ކަމަށް އެ ނޫހުގައި ވަނީ ރިޕޯޓްކޮށްފައެވެ.
