ކުރިއަށް އޮތް ތަނުގައި ބައިނަލްއަޤްވާމީ ފެންވަރަށް ފަތުރުވެރިކަމުގެ ތަމްރީނުދޭ މަރުކަޒެއް ގާއިމްކުރެވިގެންދާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން މިނިސްޓަރު ވިދާޅުވީ ބައިނަލްއަޤުވާމީ ފެންވަރަށް ފަތުރުވެރިކަމުގެ ތަމްރީނުދޭ މަރުކަޒެއް ގާއިމްކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ވިޝަންއެއް ކަމަށެވެ. އިރާދަކުރެއްވިއްޔާ އެކަންތައް ފުރިހަމަ ވެގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު މައުސޫމް ވިދާޅުވީ ރާއްޖެއަކީ ފަތުރުވެރިކަމުގެ އެއްވަނަ މަންޒިލަށް ވާއިރު މިއީ ފަތުރުވެރިކަން ކިޔަވަން ރާއްޖެއަށް އަންނަންވީ ޒަމާން ކަމަށެވެ. މި އިންޑަސްޓްރީގައި ރާއްޖެއާ ވާދަކުރެވޭ ވަރުގެ ފެސިލިޓީތައް އެހެން ޤައުމުތަކުގައެއް ނެތް ކަމަށާއި، ރާއްޖޭގައި މި އޮންނަ މެހެމާންދާރީއަކީ ފާހަގަކޮށްލެވޭ ޚާއްސަ ކަމެއް ކަމަށް މިނިސްޓަރު ވިދާޅުވިއެވެ.
މެހެމާންދާރީއަކީ ދިވެހިންގެ ޠަބީއީ ސިފަ. އެކަމާ ވާދަކުރެވޭނެ އެހެން ބައެއް ނޫޅޭނެޑރ. އަބްދުﷲ މައުސޫމް
މިނިސްޓަރު އިތުރަށް ވިދާޅުވީ ފަތުރުވެރިކަމުގެ ވަޒީފާތަކަށް ބޭނުންވާވަރަށް ދިވެހިންގެ އާބާދީ މަދު ކަމަށެވެ. އެހެންވީމަ ބިދޭސީން ގެންނަންޖެހޭ ކަމަށާއި، އެހެންނަމަވެސް މިކަން ވާން އޮތީ ދިވެހިންގެ ވިސްނުން ބަދަލުކޮށްގެން ކަމަށެވެ. އެމީހުންނަށް އިހުތިރާމް ކުރަންޖެހޭ ކަމަށާއި، އެމީހުންނަކީ ދިވެހިންގެ ވަޒީފާ އަތުލަން އަންނަ ބައެއްގެ ގޮތުގައި ދެކުން އެއީ ރަނގަޅު ގޮތެއް ނޫން ކަމަށް މިނިސްޓަރު ވިދާޅުވިއެވެ.
އެމީހުން އެ އަންނަނީ ތިމަންނާ ބައިވެރިނުވާ ވަޒީފާތައް ހޯދަން. ތިމަންނާ ބައިވެރިވާ ވަޒީފާ ތިމަންނާއަށް އޮންނާނެ. އެހެން ވަޒީފާތަކަށް ބޭރު މީހުން ގެނެސްގެން އިންޑަސްޓްރީ ބާރު ސްޕީޑުގައި ހިންގާލީމަ ރަނގަޅުވާނެޑރ. އަބްދުﷲ މައުސޫމް
ފަތުރުވެރިކަމުގެ ދާއިރާއަށް ދިވެހިން ލިބުން މަދުކަން ފާހަގަކުރެވޭ ކަމަށް މީގެ ކުރިންވެސް މިނިސްޓަރު ވިދާޅުވެފައިވެއެވެ. މިނިސްޓަރު ވިދާޅުވީ، ސްކޫލް ނިންމާ ދަރިވަރުންގެ އާބާދީ 6000ށްވެސް ނާރާކަމަށާއި، ނަމަވެސް ފަތުރުވެރިކަން ފުޅާވަމުން އަންނަ ހަލުވިމިނަށް ބަލައި، އަހަރަކު 10،000 މުވައްޒަފުން ފަތުރުވެރިކަމުގެ ދާއިރާއަށް ބޭނުންވާނެ ކަމަށެވެ. އަދި ސްކޫލް ނިންމާ އާބާދީގެ ތެރެއިން ވެސް ފަތުރުވެރިކަމުގެ ދާއިރާގެ ވަޒީފާތައް ޚިޔާރުކުރާނީ މަދު އިންސައްތައެއް ކަމަށާއި، އެހެންކަމަށްވާނަމަ ދާއިރާ ހިންގުމަށް ބިދޭސީންގެ އަދަދު އިތުރު ކުރުމަށް ވިންސަންޖެހޭކަމަށެވެ.
ދިވެހިން ނުލިބޭނަމަ ބިދޭސީންގެ އަދަދު އިތުރުކުރުމަށް ވިސްނަން ޖެހޭކަމަށް ވިދާޅުވިނަމަވެސް، އެގޮތަށް އަމަލުކުރާނީ ދިވެހިންނަށް ހުރި ފުރުސަތުތައް ހަނިނުވާގޮތަށް ކަމަށްވެސް މިނިސްޓަރު މައުސޫމް ވިދާޅުވިއެވެ. އެގޮތުން، މަތީ މަގާމުތަކާއި ދިވެހިން ގިނައިން ޝައުގުވެރިކަން ހުންނަ މަޤާމުތައް ދިވެހިންނަށް ޚާއްސަކުރަންޖެހޭ ކަމަށާއި، ދިވެހިންނަކީ ދާއިރާގައި ހުނަރު ހުރި ބައެއްކަން ވެސް މިނިސްޓަރު ފާހަގަކުރެއްވިއެވެ.
