މިއަހަރުގެ ހައްޖުގެ އަޅުކަމުގައި ބައިވެރިވުމަށް ދިޔަ ހައްޖާޖީންގެ ފުރަތަމަ ގްރޫޕް ރާއްޖެ އަތުވެއްޖެއެވެ.

ރާއްޖެއިން ހައްޖަށް ދިޔަ ފަރާތްތައް ރާއްޖެ އަންނަން ފަށާވަނީ ބުދަ ދުވަހުއެވެ. ބުދަ ދުވަހުގެ ހެނދުނު 10:00ހާއިރު 157 މީހުންނާއެކު ފުރަތަމަ ގްރޫޕް ރާއްޖެއަށް އައިސްފައިވާކަމަށް އިސްލާމިކް މިނިސްޓްރީން ބުނެއެވެ.

ހައްޖަށް ދިޔަ 157 މީހެއްގެ އިތުރުން، މިއަހަރު ރާއްޖެއިން އަމީރުލް ހައްޖުގެގޮތުގައި ވަޑައިގެންނެވި، އިސްލާމިކް މިނިސްޓަރ ޑރ. އަހުމަދު ޒާހިރު އަލީ ވެސް ވަނީ ހައްޖުގެ އަޅުކަން ނިންމަވާލެއްވުމަށްފަހު ބުދަ ދުވަހު ރާއްޖެއަށް ވަޑައިގެންފައެވެ.

މިއަހަރުގެ ހައްޖުގެ އަޅުކަމުގައި ރާއްޖެއިން 543 މީހުން ވަނީ ބައިވެރިވެފައެވެ. ހައްޖުވެރިން ރާއްޖެ އަންނަން ތާވަލުކޮށްފައިވަނީ 3 ފްލައިޓެއްގައެވެ. ފުރަތަމަ ފްލައިޓް މިހާރު ރާއްޖެއަށް އައިސްފައިވާއިރު، ދެވަނަ ފްލައިޓު އަންނަ ހޮނިހިރު ދުވަހު، އަދި ތިންވަނަ ފްލައިޓް އަންނަ ހަފްތާގެ ބުދަ ދުވަހު ރާއްޖެއަށް އަންނާނެކަމަށް އިސްލާމިކް މިނިސްޓްރީން ބުންޏެވެ.

އެ މިނިސްޓްރީން ބުނެފައިވާ ގޮތުގައި ހޮނިހިރު ދުުވަހުގެ ފްލައިޓުގައި 175 މީހުން، އަދި އަންނަ ބުދަ ދުވަހުގެ ފްލައިޓުން 117 މީހުން ރާއްޖެއަށް އަންނާނެއެވެ.

ހައްޖުވެރިންނަށް ޚިދުމަތްދިނުމަށްޓަކައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ހައްޖުވެރިންނަށް ޚާއްސަ ސަރަހައްދެއް ހަމަޖައްސާފައިވާއިރު، އެކަމަށްޓަކައި އެ ކުންފުނީގެ އިތުރު މުވައްޒަފުންވެސް އެ ސަރަހައްދުގައި ހަރަކާތްތެރިވާނެއެވެ.

މިފަހަރު ހައްޖާޖީން ބަލައި އެއަރޕޯޓަށް ދާ މީހުންނަށް ޚާއްސަކޮށް ވެހިކަލްތަކެއް ވަނީ ހިލޭ ދަތުރުކުރެވޭ ގޮތަށް ހަމަޖައްސާފައެވެ. މިގޮތުން ކޮންމެ 15 މިނެޓަކުން ބަސްދަތުރުތައް ބޭއްވުމަށް ވަނީ ހަމަޖެހިފައެވެ. ނަމަވެސް ބަސްތަކުގައި ގިނަ އަދަދެއްގެ ލަގެޖް އުފުލާނެ ޖާގަ ނެތުމުން، ހައްޖުވެރިންގެ ލަގެޖް ގެންދިޔުމުގެ އިންތިޒާމު ހަމަޖައްސަންޖެހޭނީ އެ މީހަކު އަމިއްލައަށެވެ.

ހައްޖުވެރިންނަށް ޚާއްސަކޮށްގެން ބަސްދަތުރުތައް ބާއްވާއިރު، ބަސް ދަތުރު އޮންނަ ވަގުތުތަކުގައި މޯލްޑިވްސް ޕޮލިސް ސަރވިސްއިން އެ ސަރަހައްދުތަކުގައި ޓްރެފިކް ބަލަހައްޓާނެއެވެ. އަދި ހައްޖުވެރިން ޓެކްސީތަކާ ހަމައަށް ގެންގޮސްދިނުމުގައި މޯލްޑިވްސް ނޭޝަނަލް ޑިފެންސް ފޯސްއިން އެހީތެރިކަން ފޯރުކޮށްދޭނެއެވެ.

މީގެ އިތުރުން ކުއްލި ހާލަތެއް ދިމާވެއްޖެނަމަ އެހީތެރިކަން ފޯރުކޮށްދިނުމަށްޓަކައި ރެޑްކްރެސެންޓްގެ އެމްބިއުލާންސްވެސް އެއަރޕޯޓުގައި އޮންނާނެކަމަށްވެސް އިސްލާމިކް މިނިސްޓްރީން ވަނީ ބުނެފައެވެ.

ރާއްޖެއިން ދިޔަ ހުރިހާ ހައްޖުވެރިންވެސް ވަނީ ހައްޖުގެ މަތިވެރިއަޅުކަން އަދާކޮށް ނިމި ފުރުމަށް ތައްޔާރުވެފައެވެ. އަދި ހުރިހާ ހައްޖުވެރިންގެ ހާލުވެސް ރަނގަޅުކަމަށް ރާއްޖޭގެ ހައްޖުމިޝަނުން މައުލޫމާތުދެއެވެ.