ތަޢުލީމީ ހުނަރުވެރި ޖީލެއް ބިނާކުރުމަކީ މިވަގުތު ސަރުކާރުން އެންމެ އިސްކަންދޭ އެއް ކަންތައް: ރައީސް
20 ޖުލައި 2022 | ބުދަ 02:09ރައީސް ވިދާޅުވީ ސިޔާސަތަށް ގެނެވުނު ބަދަލާ އެއްގޮތަށް ކުރެވޭ މަސައްކަތާއި ހޭދައިގެ ނަތީޖާ ފެންނަނީ އުޖާލާކޮށް ކަމަށް
ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު
ތަޢުލީމީ އަދި ހުނަރުވެރި ޖީލެއް ބިނާކުރުމަކީ، މިވަގުތު ސަރުކާރުން އެންމެ އިސްކަންދޭ އެއް ކަންތައް ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހު ވިދާޅުވެއްޖެއެވެ.
ރައީސް މިފަދައިން ވިދާޅުވީ މަތީ ސާނަވީ އިމްތިހާނުން އެއްވަނަ ދަރަޖައިގައި ފާސްވާ ދަރިވަރުންނަށް، ރައީސުލްޖުމްހޫރިއްޔާ ދެއްވާ ހާއްސަ ސްކޮލަޝިޕާއި، ހައި އެޗީވާސް ސްކޮލަޝިޕްގެ ލިޔުން ހަވާލުކުރުމަށް ޣިޔާޘުއްދީން އިންޓަރނޭޝަނަލް ސްކޫލުގައި އަންގާރަ ދުވަހުގެ ރޭ ބޭއްވި ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. އެ ވާހަކަފުޅުގައި ރައީސް ވަނީ މަތީ ތައުލީމު ފޯރުކޮށްދިނުމަށް ސަރުކާރުން ކުރިއަށްގެންދާ މަސައްކަތްތަކަށް އަލިއަޅުއްވާލައްވާފައެވެ.
ރައީސް ވިދާޅުވީ ޤައުމިއްޔަތުގެ ގަހުގައި އަޅާނެ އެންމެ ފޮނި މޭވާއަކީ ތައުލީމީ ދަރިން ކަމަށާއި މައިންބަފައިންނަކީ އިލްމުވެރިން ނޫން ކަމުގައިވިޔަސް ދަރިން އިލްމުވެރިވެ މޮޅުވެގެން ހިނގައިދާނެ ކަމަށެވެ. އަދި ކޮންމެ ރައްޔިތަކުވެސް އެދޭނީ އެމީހެއްގެ ދަރިން މަތީ ދަރަޖައަށް ކިޔެވުމުގެ ފުރުސަތު ފަހިވެގެންދިއުން ކަމަށާއި ސަރުކާރުތަކުން ޤައުމުގެ ސިޔާސަތު ބިނާ ކުރަން ޖެހޭނީ އެކަން ދެނެގެން ކަމަށް ރައީސް ވިދާޅުވިއެވެ.
ކޮންމެ ކުއްޖަކަށްވެސް އެ ކުއްޖަކު އުޅޭ ރަށަކުން އިބްތިދާއީ ތައުލީމް ހާސިލް ކުރެވޭނެ މަގު ފަހިކޮށްދެވިފައިވާކަން ފާހަގަ ކުރައްވައި ރައީސް ވިދާޅުވީ ސާނަވީ މަރުހަލާ ތަނަވަސްކުރުމަށް ވެސް ގިނަ މަސައްކަތްތަކެއް ސަރުކާރުން ކުރަމުން އަންނަ ކަމަށެވެ.
ރައީސް އިތުރަށް ވިދާޅުވީ އުގަންނައިދިނުމުގައި އެންމެ އިސް ސަފުގައި ހަރަކާތްތެރިވަނީ މުދައްރިސުންނާއި ޕްރިންސިޕަލުން ކަމަށްވާއިރު އެ ފަރާތްތަކުގެ ނެތް ގާބިލުކަމަކާއި ހުނަރެއް ދަރިވަރުންނަށް ހޯދައި ނުދެވޭނެ ކަމަށެވެ. އެހެންކަމުން، އެކަމަށް ވެސް ސަރުކާރުން ހާއްސަ އިސްކަމެއް ދޭ ކަމަށާއި ސިޔާސަތަށް ގެނެވުނު ބަދަލާއެއްގޮތަށް ކުރެވޭ މަސައްކަތާއި ހޭދައިގެ ނަތީޖާ ވަރަށް އުޖާލާކޮށް ފެންނަ ކަމަށް ރައީސް ވިދާޅުވިއެވެ.
އަންގާރަ ދުވަހުގެ ރޭ ބޭއްވި ރަސްމިއްޔާތުގެ ރައީސުލްޖުމްހޫރިއްޔާގެ ހާއްސަ ސްކޮލަރޝިޕް 6 ދަރިވަރަކަށް ވަނީ ލިބިފައެވެ. އަދި ހައި އެޗވަރސް ސްކޮލަރޝިޕް 79 ދަރިވަރަކަށް ވަނީ ލިބިފައެވެ.
ރައީސުލްޖުމްހޫރިއްޔާގެ ހާއްސަ ސްކޮލަރޝިޕާއި ހައި އެޗީވަރސް ސްކޮލަރޝިޕަކީ މަތީ ސާނަވީ އިމްތިހާނުން އެއްވަނަ ދަރަޖައިގައި ފާސްވެފައިވާ ދަރިވަރުންނަށް ދެމުން އަންނަ ސްކޮލަރޝިޕްތަކެކެވެ.
