ޑިލައިޓް ބަޔާންއަށް

އިޓަލީގެ ޔުވެންޓަސްއަށް ކުޅެމުންއައި މެތިއުސް ޑިލައިޓް ބަޔާން މިއުނިކަށް ބަދަލުވެއްޖެއެވެ.

ނެދަލެންޑްސްގެ ތަޖުރިބާކާރު ޑިފެންޑަރު ބަޔާންއަށް ބަދަލުވީ ފަސް އަހަރުގެ މުއްދަތަކަށެވެ. އޭނާ ހޯދުމަށްޓަކައި ބަޔާންއިން ވަނީ 70 މިލިއަން ޔޫރޯ ޔުވެންޓަސްއަށް ދިނުމަށް އެއްބަސްވެފައެވެ. މީގެ އިތުރުން އެޑްއޮންސްގެ ގޮތުގައި 10 މިލިއަން ޔޫރޯ ދިނުމަށްވެސް ހަމަޖެހިފައިވެއެވެ.

ޑިލައިޓްއަކީ މި ޓްރާންސްފަރ މާކެޓުގައި ބަޔާންއަށް ބަދަލުވި ހަތަރުވަނަ ކުޅުންތެރިޔާއެވެ. ބަޔާންއިން ޑިލައިޓް ހޯދީ އޭނާ ހޯދުމަށް ޔޫރަޕުގެ ގިނަ ކްލަބުތަކަކުން މަސައްކަތް ކުރަމުން ދަނިކޮށެވެ.

ޑިލައިޓް ވަނީ ޔުވެންޓަސްގެ އިތުރުން އަޔެކްސްއަށްވެސް ކުޅެފައެވެ. ޔުވެންޓަސްގައި އޭނާ ވަނީ 87 މެޗުކުޅެ 8 ލަނޑު ޖަހާފައެވެ. މީގެ އިތުރުން ނެދަލެންޑްސްގެ ގައުމީ ޓީމަށް 38 މެޗު ކުޅެދިން ޑިލައިޓް ވަނީ 2019 ވަނަ އަހަރުގެ ޔުއެފާ ނޭޝަންސް ލީގުގެ ރަނަރ އަޕް ކަން ނެދަލެންޑްސްއަށް ހޯދައިދިނުމުގައި މުހިންމު ދައުރެއް އަދާކޮށްފައެވެ.