ފިތުރު ޢީދުގައި ހިންގި ސިލްސިލާ މާރާމާރީތަކާ ގުޅޭ އެންމެން ހައްޔަރުކޮށްފި
11 ޖުލައި 2022 | ހޯމަ 23:42މި މާރާމާރީތަކާ ގުޅިގެން ހޯދަން އިއުލާން ކުރި 7 މީހުން ވެސް މިހާރުވަނީ ހައްޔަރުކޮށްފައި
ގްރޫޕް ހަދައިގެން ތޫނު ހަތިޔާރު ބޭނުންކޮށްގެން މާރާމާރީ ހިންގި މައްސަލައަކާ ގުޅިގެން ހޯދަމުންދާ މީހުން
ފިތުރު ޢީދު ބަންދުގެ ތެރޭގައި މާލޭގައި ސިލްސިލާކޮށް ހިންގި މާރާމާރީއާ ގުޅިގެން ފުލުހުން ހޯދަމުން އައި އެންމެން ހައްޔަރުކޮށްފިއެވެ.
މި މައްސަލައިގައި 7 މީހަކު ހޯދަން ފުލުހުން އިއުލާންކުރީ މެއި 5 ވަނަ ދުވަހުއެވެ. އެގޮތުން، މި މާރާމާރީއާ ގުޅިގެން ހޯދަން އިއުލާން ކުރީ ތ. ތިމަރަފުށި/ ސީނުގެ، އަޙްމަދު ޝިމްހާޒު އާއި ކ. މާލެ/ މ. ލޮނުމިދިލިގެ، ލޫޠު އަޙްމަދު އާސިފް އާއި ގއ. ގެމަނަފުށި/ ކެނެރީގެ، އަޙްމަދު ނާޒިހު އާއި ކ. މާލެ/ ދަފްތަރު ނަންބަރު 2260، މައުސޫމް މުޙައްމަދުދީދީ އާއި ސ. މަރަދޫ/ ކޮރަލް، އަޙުމަދު ސާތިއު އާއި ސ. ހުޅުދޫ/ ނާދީ މުނާދު ޖައުފަރުގެ އިތުރުން ގއ. މާމެންދޫ/ ގްލޭނޫރަންމާގެ، އަހުމަދު ރަބީޢު އެވެ.
މީގެ އިތުރުން ވެސް މި މާރާމާރީތަކާ ގުޅިގެން ފުލުހުން ވަނީ އިތުރު ބަޔަކު ހައްޔަރުކޮށްފައެވެ. މީގެ ތެރޭގައި 18 އަހަރު ނުވާ ކުޑަކުއްޖަކު ވެސް ހިމެނެއެވެ.
މި މާރާމާރީއާ ގުޅިގެން އެންމެ ފަހުން ހޯދަމުން ދިޔައީ ސ.ހުޅުދޫ ނާދީ، މުނާދު ޖައުފަރު އާއި ގއ. މާމެންދޫ ގްލޭނޫރަންމާގެ، އަޙްމަދު ރަބީޢުއެވެ. އެ ދެމީހުން ވެސް މިދިޔަ ބުރާސްފަތި ދުވަހު ވަނީ ކްރިމިނަލް ކޯޓަށް ހާޒިރުކޮށްފައެވެ.
ފިތުރު ޢީދު ބަންދުގައި ހިންގި މާރާމާރީތަކުގައި ތޫނު އެއްޗެހިން ހަމަލާދީ 5 މީހަކު ވަނީ ޒަހަމްކޮށްލާފައެވެ.
