ހއ. އަތޮޅުން ދ. އަތޮޅާ ހަމައަށް ވައިޓްއެލަރޓް ނެރެފިއެވެ.

މޫސުމާ ބެހޭ ޤައުމީ އިދާރާއިން އެ ސަރަހައްދަށް ވައިޓް އެލަރޓް ނެރުނީ އާދީއްތަ ދުވަހުގެ މެންދުރު 1:30 އިން ހަވީރު 5:39 ހަމައަށެވެ.

އެލަރޓުގެ މުއްދަތުގެ ތެރޭގައި ގުގުރުމުގެ އިތުރުން ބޯކޮށް ވާރޭވެހޭނެ ކަމަށް ވަނީ ލަފާކޮށްފައެވެ. އަދި ގަޑިއަކު 19 މޭލާރި 24 މޭލާ ދެމެދުގެ ބާރު މިނުގައި ވައިޖެހޭއިރު ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ވެސް ވަނީ ލަފާކޮށްފައެވެ.

މީގެ އިތުރުން އެލަރޓުގެ މުއްދަތުގައި ހއ. އަތޮޅުން ދ. އަތޮޅުގެ ރަށްތަކުގެ ކަނޑުތައް ގަދަވާނެ ކަމަށް ވެސް މޫސުމާ ބެހޭ ޤައުމީ އިދާރާއިން ވަނީ ލާފާކޮށްފައެވެ.

ރާއްޖެއަށް ކުރަމުން އަންނަ ވިއްސާރައާ ގުޅިގެން މި ދުވަސްވަރު ދަތުރުފަތުރު ކުރާ ފަރާތްތަކުން މޫސުމަށް ސަމާލުކަން ދިނުމަށް ކަމާބެހޭ ފަރާތްތަކުން އެދެއެވެ. އަދި އުޅަނދުތަކުގައި ރައްކާތެރިކަމުގެ ފިޔަވަޅުތައް ފުރިހަމަކޮށްފައިވޭތޯ ބެލުމަށް ފަރުދީ ޒިންމާ އަދާ ކުރުމަށް ވެސް ކަމާ ބެހޭ ފަރާތްތަކުން އިލްތިމާސް ކުރެއެވެ.