ޢީދު ދުވަހުގެ އުފާވެރިކަން ލިބިގަނެ، އެ އުފާވެރިކަމުގައި އެހެން މީހުންވެސް ބައިވެރިކުރަންޖެހޭ
ކ. ދިއްފުށީގައި ކުރެވުނު ޢީދު ނަމާދުގެ ތެރެއިން
އަޟްޙާ ޢީދު ދުވަހުގެ އުފާތަކުން މޫނުތައް އަލިވެ، ހިނިތުންވުން ފާޅުވެފައިވާއިރު، ދުނިޔޭގެ ބައެއް ޤައުމުތަކުގައި އުޅެމުންދާ މުސްލިމް އަޚުންނާއި އުޚުތުންތަކެއް ބިކަޙާލުގައި ދިރިއުޅެމުންދާކަން ހަނދާނަށް ގެންނަންޖެހޭ ކަމަށް ޢީދު ޚުތުބާގައި ބުނެފިއެވެ.
"ޢީދުލް އަޟްޙާގެ ޙަޤީޤަތާއި މަޤްޞަދުތައް" މި މައުޟޫގެ މައްޗަށް އިއްވި ޚުތުބާގައި ވަނީ، ދުނިޔޭގެ ބައެއް ޤައުމުތަކުގަައި ހާލުގަައި އުޅެމުންދާ މުސްލިމް އަޚުންނާއި އުޚުތުންގެ ޙާލަތު ރަނގަޅުކޮށްދެއްވުމަށް ހެޔޮ ދުޢާ ކުރުމަށާއި، އެމީހުންގެ ރައްތަކަށް އަމަންއަމާންކަން ވެރިކުރައްވާތޯ ﷲގެ ހަޟްރަތުގައި ދުޢާ ދެންނެވުމުން ޢީދުގެ އުފަލުގައި އެމީހުން ބައިވެރިކުރެވިގެންދާނެ ކަމަށެވެ.
މާތްﷲ ޙައްޖާއި ޢީދު ޝަރުޢުކުރައްވާފައިވަނީ މި އުއްމަތުގެ އެއްބައިވަންތަކަން ދެމެހެއްޓުމަށް ކަމަށް ޢީދު ޚުތުބާގައި ފާހަގަކޮށްފައިވެއެވެ. މީގެ އިތުރުން ޢީދަށް، ޢީދޭ ކިޔުނީ ކޮންމެ އަހަރަކު އައު އުފާތަކާއެކު މި ދުވަސް އަންނާތީކަމަށް ފާހަގަކޮށް، ޢީދު ޚުތުބާގައި ބުނެފައިވަނީ، އިސްލާމީ ޢީދުތަކުގައި އޮތީ އުފާވެރިކަމާއި މުނިފޫހިފިލުވުން ކަމަށެވެ. އެއީ ހިތްތަކުގެ ސާފުކަމުންނާއި، މޫނުތަކުގެ އުފާވެރިކަމުން ކަމަށެވެ.
އިސްލާމް ދީނުގައި ޢީދު ފެށެނީ ތަކްބީރުން ކަމަށާއި، އެއީ އެންމެންނަށް އިޢުލާނުކުރެވޭ އުފާވެރިކަމެއް ކަމަށް ޚުތުބާގައި ބުނެފައިވެއެވެ. އަދި އެއީ ހުރިހާ ގިންތިތަކަށާއި، ފަންތިތަކަށާއި، އުއްމަތުގެ އެއްވެސް ފަރުދަކު އެކަހެރިނުކޮށް އެންމެން ޝާމިލުވާގޮތަށް އޮތް އުފަލެއްކަމަށެވެ.
