ދިރާސީ އައު އަހަރަށް ބޭނުންވާ ބިދޭސީ ޓީޗަރުންގެ ފުރަތަމަ ބެޗް ރާއްޖެ އަތުވެއްޖެ

ދިރާސީ އަހަރަށް ބޭނުންވާ ބިދޭސީ ޓީޗަރުންގެ ފުރަތަމަ ގްރޫޕް ރާއްޖެ އަތުވެއްޖެއެވެ.

އެޑިއުކޭޝަން މިނިސްޓްރީން ބުނީ ދިރާސީ އާ އަހަރަށް ސްކޫލްތަކަށް ބޭނުންވާ ބިދޭސީ ޓީޗަރުން ރެކްރޫޓްކުރެވި، އެ ޓީޗަރުންގެ ފުރަތަމަ ގްރޫޕް ބުރާސްފަތި ދުވަހު ރާއްޖެ އައިސްފައިވާ ކަމަށެވެ.

އެ ޓީޗަރުންނަށް މަރުހަބާ ކިޔާފައިވަނީ އެޑިއުކޭޝަން މިނިސްޓްރީގެ ހިއުމަން ރިސޯސް މެނޭޖްމަންޓް ޑިވިޝަނުގެ މުވައްޒަފުންނެވެ.

ރާއްޖޭގައި ޓީޗަރުން ލިބުމުގައި އަދިވެސް ދަތިތައް ހުންނަކަން އެޑިއުކޭޝަން މިނިސްޓްރީން ވަނީ މީގެ ކުރިން ފާހަގަ ކޮށްފައެވެ. ޓީޗަރުންގެ މުސާރައަށް ގެނައި ބަދަލާއެކު މިކަމަށް ހައްލެއް ލިބޭނެ ކަމަށް އެ މިނިސްޓްރީން އުންމީދު ކުރެއެވެ.

މިނިސްޓްރީގެ އެންމެ ބޮޑު ކަންބޮޑުވުމަކަށް ވެފައިވަނީ ރަށްރަށުގައި ކިޔަވައިދޭނެ ދިވެހި ޓީޗަރުން ނުލިބުމެވެ. މިކަމަށް ހައްލެއް ހޯދުމުގެ ގޮތުން އުފަން ރަށް ނޫން އެހެން ރަށްރަށަށް ދާ ދިވެހި ޓީޗަރުންނަށް 3،000 ރުފިޔާގެ އިތުރު އެލަވެންސެއް ދޭން ވެސް ވަނީ ނިންމާފައެވެ.