އަމީނީ މަގު ރަނގަޅު ފެންވަރަކަށް ހެދުމަށް ބޭނުންފުޅުނުވާކަމަށް މުއިއްޒު ވިދާޅުވި: އަކްރަމް

މާލޭގެ އަމީނީ މަގު ރަނގަޅު ފެންވަރަކަށް ހަދަން ބޭނުން ނުވާކަމަށް މާލެ ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވިދާޅުވިކަމަށް ހައުސިން އެންޑް ޕްލޭނިންގ މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވެއްޖެއެވެ.

އަންގާރަ ދުވަހުގެ ރޭ ޕްލޭނިން މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައި އަކްރަމް ވިދާޅުވީ، މާލޭގެ ސްޓްރީޓް ސްކޭޕިންގ ޕްރޮޖެކްޓަކީ މާލޭގެ މަގުތައް ރަނގަޅު ފެންވަރަކަށް ހެދުމަށް 2019 ވަނަ އަހަރު ތައާރަފުކުރި ޕްރޮޖެކްޓެއް ކަމަށެވެ. މި ޕްރޮޖެކްޓް ތައާރަފުކުރީ މަޖިލީހާއި އޭރުގެ ސިޓީ ކައުންސިލާ މަޝްވަރާކުރުމަށްފަހު ކަމަށާއި، 2020 ވަނަ އަހަރު ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)އާ ހަވާލުކޮށްގެން މަސައްކަތް ކުރިއަށްގެންދިއުމަށް ސިޓީ ކައުންސިލާއެކު އެއްބަސްވުމެއް ހެދި ކަމަށްވެސް އަކްރަމް ވިދާޅުވިއެވެ.

އަކްރަމް ވިދާޅުވީ މި އެއްބަސްވުމުގެ ދަށުން މަސައްކަތްތައް ކުރިއަށްދިޔައީ ރަނގަޅަށް ކަމަށެވެ. ނަމަވެސް އައު ކައުންސިލުން ބަދަލުތަކެއް ގެނައިކަމަށާއި، ބޮޑެތި ބަދަލުތަކެއްވެސް ގެންނަން މަސައްކަތްކުރިކަމަށެވެ. އަދި މަސައްކަތްތައް މަޑުޖެހިފައި އޮތުމަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އަމީނީ މަގު ތަރައްގީކުރަން ބޭނުންފުޅުވެވަޑައިގެން ޕްލޭނިންގ މިނިސްޓްރީން ސިޓީ ކައުންސިލާއި ބައްދަލުކުރި ކަމަށާއި، ކައުންސިލްގެ ވިސްނުމަކީ ވަރަށް އާދައިގެ ގޮތަކަށް މަގު ހެދުން ކަމަށް ވެސް އަކްރަމް ވިދާޅުވިއެވެ.

އަކްރަމް ވިދާޅުވީ އާދައިގެ ގޮތަކަށް އަމީނީ މަގު ހަދަން ސަރުކާރުން ބޭނުން ނުވާތީއާއި ސިޓީ ކައުންސިލުން އެ މަގު ނުހަދާނެކަން ޔަގީންވުމުން މިނިސްޓްރީގެ ދަށަށް ޕްރޮޖެކްޓް ބަދަލުކުރީ ކަމަށެވެ.

އަކްރަމް މިފަދައިން ވިދާޅުވީ އާރްޑީސީއާއި ސިޓީ ކައުންސިލާއެކު އަމީނީމަގު ހަދަން އެއްބަސްވެފައިވާ ކަމަށް ވިދާޅުވެ، މުއިއްޒު ތުހުމަތުތަކެއް ކުރެއްވުމުންނެވެ. ނަަމަވެސް އެފަދަ އެއްވެސް އެއްބަސްވުމެއް ނޯންނާނެކަމަށް އާރުޑީސީގެ މެނޭޖިންގ ޑިރެކްޓަރ މޫސާ އަލީ މަނިކު (މޫކޭ)ވެސް ވަނީ ވިދާޅުވެފައެވެ.

މޫސަ ވިދާޅުވީ، މާލޭ މޭޔަރު ހައްދަވަނީ ކަނޑައެޅިގެން އިތުރުފުޅެއް ކަމަށާއި، އަމީނީ މަގު ހަދަން އެއްވެސް އެއްބަސްވުމެއްގައި ސިޓީ ކައުންސިލާއެކު އާރުޑީސީން ސޮއިކޮށްފައި ނުވާނެކަމަށެވެ. އަމީނީ މަގު ހެދުމަށް މިނިސްޓްރީއާއެކު އާރުޑީސީން ސޮއިކޮށްފައިވަނީ މުޅިން އައު ޕްރޮޖެކްޓެއްގައި ކަމަށާއި، އެއީ ތަފާތު ސްކޯޕެއްގައި ޑީވޯޓަރިންގްއާއި ސްޓޯމްވޯޓަރގެ މުޅިން އައު ނިޒާމެއް ގާއިމުކޮށް، ޖުމްލަ ހައްލެއް އަމީނީ މަގަށް ގެނައުމަށް ވެވުނު އެއްބަސްވުމެއް ކަމަށްވެސް އޭނާ ވިދާޅުވިއެވެ.