މާލެ ސަރަހައްދުގައި ދުއްވާ ޓެކްސީތަކުން ދަތުރުތަކަށް ނަގާ އަގުތައް ޓްރާންސްޕޯޓް މިނިސްޓްރީން ބޮޑުކޮށްފިއެވެ.

އެ މިނިސްޓްރީން އަންގާރަ ދުވަހު ނެރުނު އިއުލާނެއްގައި ބުނީ، ޓެކްސީ އަގުތައް ބޮޑުކުރީ ރާއްޖޭގެ ބާޒާރުގައި ތެލުގެ އަގު އުފުލިފައިވާތީކަމަށެވެ. އެގޮތުން އަންގާރަ ދުވަހުން ފެށިގެން އާ އަގުތަކާ އެއްގޮތަށް ޓެކްސީތަކުން ފައިސާ ނެގޭނެކަމަށް އެ މިނިސްޓްރީން ބުނެއެވެ.

އެ މިނިސްޓްރީން ވަނީ މާލޭގެ އެތެރޭގެ ދަތުރުތަކާއި އެއަރޕޯޓަށް ކުރާ ދަތުރުތަކާއި ހުޅުމާލޭގެ ދަތުރުތައްވެސް ބޮޑުކޮށްފައެވެ.

ކުރިން މާލޭގެ އެތެރޭގެ ދަތުރުތަކަށް 25 ރުފިޔާ ކަނޑައަޅާފައި އޮތްއިރު، މިހާރު ދަތުރަކަށް ނަގާނީ 30 ރުފިޔާއެވެ. މިއީ މާލެއާއި ހުޅުމާލެ ފުރަތަމަ އަދި ދެވަނަ ފިޔަވަހީގެ އެތެރޭގެ ދަތުރުތަކަށް ނަގާނެ އަދަދެވެ.

ޓްރާންސްޕޯޓް މިނިސްޓްރީން އިއުލާންކޮށްފައިވާގޮތުގައި، އަންގާރަ ދުވަހުން ފެށިގެން، މާލެއާއި ހުޅުމާލެ ފުރަތަމަ ފިޔަވައްސާ ދެމެދު ނަގާނީ 85 ރުފިޔާއެވެ. އަދި މާލެ އާއި ހުޅުމާލެ ދެވަނަ ފިޔަވައްސާ ދެމެދު ދަތުރަކަށް ނަގާނީ 100 ރުފިޔާއެވެ. ކުރިން މާލެއިން ހުޅުމާލެއަށް 75 ރުފިޔާއަށް ދެވޭއިރު ދެވަނަ ފިޔަވައްސަށް ދަތުރަކަށް ނަގަމުން އައީ 90 ރުފިޔާއެވެ.

މި ބަދަލާއެކު މާލެއިން ހުޅުލެއަށް ނަގަމުން އައި އަގު ވަނީ 70 ރުފިޔާއަށް ބޮޑުކޮށްފައެވެ. އަދި ހުޅުމާލެ ފުރަތަމަ ފިޔަވައްސާއި ހުޅުލެއާ ދެމެދު ދަތުރަކަށް ނަގާ އަގު 80 ރުފިޔާއަށް ބޮޑު ކޮށްފައިވާއިރު ދެވަނަ ފިޔަވައްސާ ހުޅުލެއާ ދެމެދު ނަގާ އަގު ވަނީ 85 ރުފިޔާއަށް ބޮޑުކޮށްފައެވެ.

މީގެ އިތުރުން ހުޅުމާލެ ފުރަތަމަ ފިޔަވައްސާ ދެވަނަ ފިޔަވައްސާ ދެމެދު އަންގާރަ ދުވަހުން ފެށިގެން ޓެކްސީގައި ދަތުރު ކުރެވޭނީ 40 ރުފިޔާއަށެވެ.

ދުނިޔޭގެ ބާޒާރުގައި ތެލުގެ އަގު އުފުލި ރާއްޖޭގައި ވެސް ތެލުގެ އަގު ވަނީ ވަރަށް ބޮޑަށް އުފުލިފައެވެ. މީގެ ސަބަބުން ޚަރަދުތައް އިތުރުވެފައިވާ ކަމަށްބުނެ ޓެކްސީތަކުން ވަނީ ދަތުރުތަކުގެ އަގު ބޮޑުކުރުމަށް މިނިސްޓްރީގައި އެދިފައެވެ.

ޓްރާންސްޕޯޓް މިނިސްޓްރީން ޓެކްސީ ދަތުރުތަކުގެ އަގު ބޮޑުކުރުމުގެ ކުރިންވެސް ބައެއް ޓެކްސީތަކުން ދަތުރުތަކަށް ނަގަމުން އައީ ބޮޑު އަގުތަކެކެވެ.