އޭޝިއަން ކަޕް ކޮލިފައިން: ބޫޓާން ބަލިކޮށް ރާއްޖެ ފުރަތަމަ ތިން ޕޮއިންޓް ހޯދައިފި

އޭޝިއަން ކަޕް ކޮލިފައިންގައި ބޫޓާން ބަލިކޮށް ރާއްޖެ ފުރަތަމަ ތިން ޕޮއިންޓް ހޯދައިފި އެވެ.

އަންގާރަ ދުވަހު ކުޅުނު މެޗު ބޫޓާނާ ވާދަކޮށް ރާއްޖެއިން މެޗު ކާމިޔާބުކުރީ 0-2 ގެ ނަތީޖާއަކުންނެވެ.

ބޫޓާންގައި ކުޅުނު މި މެޗު ފެށިގެން ދެޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. އެގޮތުން ލަނޑު ޖަހަން މެޗުގެ ފުރަތަމަ ކޮޅު ރަނގަޅު ފުރުސަތުތަކެއް ދެޓީމަށްވެސް ލިބިފައެއް ނުވެއެވެ.

ފުރަތަމަ ހާފްގައި ރާއްޖޭގެ ހަސަން ނާއިޒް (ދާދު) އަށް ވަނީ ލީޑު ނެގުމަށް ރަނގަޅު ފުރުސަތެއް ލިބިފައެވެ. އެހެންނަމަވެސް ދާދު ފޮނުވާލި ހަމަލާ ދިޔައީ ގޯލު ދަނޑިމަތިން ބޭރަށެވެ.

ފުރަތަމަ ހާފް ނިމުމުގެ ކުރިން ރާއްޖެއިން ވަނީ މެޗުގެ ލީޑު ނަގާފައެވެ. މި ލަނޑު ރާއްޖެއަށް ލިބުނު ޕެނަލްޓީއަކުން ކާމިޔާބުކޮށްދިނީ އަލީ ފާސިރު (ސެންޓޭ) އެވެ. މި ޕެނަލްޓީ ރާއްޖެއަށް ލިބުނީ ޕެނަލްޓީ އޭރިޔާ ތެރެއިން ސެންޓޭއަށް ބޫޓާންގެ ކުޅުންތެރިޔަކު ކުރި ފައުލަކާ ގުޅިގެންނެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ބޫޓާންގެ މައްޗަށް ރާއްޖެ ކުރީގައި އޮވެގެންނެވެ.

ދެވަނަ ހާފް ފެށިގެން ރާއްޖެއިން އެޓީމުގެ ކުޅުން ރަނގަޅުކޮށްފައިވާއިރު، ލަނޑު ޖެހުމަށްވެސް ފުރުސަތުތަކެއް ރާއްޖެއިން ވަނީ ހޯދާފައެވެ. އެގޮތުން ކޮމްބިނޭޝަން ރަނގަޅު ކުޅުމެއްވެސް ރާއްޖޭގެ ފަރާތުން ވަނީ ފެނިގެންގޮސްފައެވެ.

ރާއްޖެއިން މެޗުގެ ލީޑު ފުޅާކުރީ އަހުމަދު އަބްދުﷲ (ލިލީ) ކާމިޔާބުކުރި ލަނޑުންނެވެ. މި ލަނޑަށްފަހުވެސް ރާއްޖެއަށް ވަނީ ލީޑު އިތުރަށް ފުޅާކުރުމަށްވެސް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ރާއްޖެ އޮތީ ތިން ޕޮއިންޓާއެކު މައިނަސް އެއް ލަނޑާއެކު ގްރޫޕްގެ ތިންވަނައިގަ އެވެ. ބޫޓާން އޮތީ އެއްވެސް ޕޮއިންޓެއް ނުލިބި މައިނަސް 16 ލަނޑާއެކު ގްރޫޕްގެ ހަތަރުވަނައިގަ އެވެ.

ގްރޫޕްގެ އެއްވަނައިގައި ތިން ޕޮއިންޓާއެކު ފައިދާ 14 ލަނޑާއެކު އޮތް އޮމާން އަދި ތިން ޕޮއިންޓާއެކު ފައިދާ ތިން ލަނޑާއެކު ދެވަނައިގައި އޮތް ފަލަސްތީން ބައްދަލުކުރާ މެޗު އަންގާރަ ދުވަހުގެ ރޭ ކުޅޭނެއެވެ.